Lamka | By E. Vungkholian

“A tul ngeilou diing Zogam khopi ‘Lamka Vangkhua’ aw, na hong kipat dan leh na hong khanlet dan a thupi in, kou na sung a ngabang leng te’n ka ngaihtuah bankei ua, na sung a teng te thupi louh dan, ‘Lamka’ na hihna, na min nasan leng hon posak zoulou in ka om ua, hehpih in hon ngaidam in.”

Zahtakhuai Editor, Siamsinpawlpi Annual Magazine 1987 in ‘Lamka’ thu i magazine ua suah di’n hon gelh thei lechin honchih ka zaak in kipahhuai ka sakna om mahleh a hong kipat dan a thubul leh a dik pen haksak ka sak man in ka buai sim mahmah a, kei lah naupang chik ka hih ziakin upa lamte dongkual kawikawi in hihtheih khamkham in ka hon kaikhawm hi. Theihkhelh ziak a a diklou a om zenzen leh ngaihdam i kingan masa hi.
Lamka Vangkhua

Nidanglai ipu-ipa te hunlai a Chin State lak vel a i teenlai khawng in hiai ‘Lamka’ a na om naikei mahleh, hiai Lamka te hi sazawi khawng na hihdan ahi. Tua Mualveng pen na saang deuh ahihman in Tedim Road leh Tipaimukh Road munte na niamdeuh a, sa te’n zawi a na nei masa hidan ahi. Ahi a, mi hong kitam deuhdeuh a Chin State apan Mallam (North) zuan a i hongpeem chiang in hiai Lamka kiim khawng ah i hongteeng masa phot a, hiai i khopi mun pen ahihleh sa betna munpi in a na zang masa uhi. Ahihhang in Umphal (tua Imphal kichi) leh Moirang khawng a bazar kai hiam huailam khawng a khualzin khawng a om chiang un Lamka gen pen in kinei hi uhi. Aziak tuh tulel a Tipaimukh lam a teengkha Zomi teng leh Tedim lam a teeng Zomi te bazar kai hiam, khualzin hiam te a kihilhna pen uh leh a kithukhah pen uh tuh “huai Lamka na theikhial kha dia, na hong gammang kha de,” chih ahi hi.

Ahi a, khua chih diing om naikei mahleh 1904 vel diing apan in British te’n Tamenglong Circle apan i Zogam hon enkol ua, bial a veh chiang ua hiai Lamka a hongtun chiang un hiai lampi pen koilam paina hiam chi khawng a a nungzui te uh a dotchiang un hiai lam pen huailam paina ahi a, huailam pen hiailam paina ahi, chi khawng in Tedim lam manoh a paina leh Manipur apan Aizawl lam manoh a paina hiai lampi kathuam (junction) apan na hilhchian in khualzin mite diing a chiamteh taak ‘Lamka Thuam’ na hipah hi.

Atawp chiang in hiai lamka apan a kho naipen leh singtang khuate lak a upa pawl Hiangtam khua (Pu Thangkhanlal, Ex MLA hauhsakna khua) paina a hihchiang in chi in ‘Hiangtam Lamka’ chih British te’n hon na phuahsak in leh hon na record sak u hi. Tua chi’n awlawl in hong kithei deuhdeuh a, 1917 chiang in British te’n Hiantam Vuum or Munpi khua a munpi khat hon neih ua, Liimlangpute (kihouna chi khat sai pawl) hong khosak ua hong kihou chiang un Hiangtam or Hiangtam Lmka chih khawng honzang ua, a min hong lang hiaihiai hi.

Hichibang zel a hong minthang touzel in 1920 vel in Phamsa Pu Zenhang’ pa te leh Pu Phungkhothang Guite toh pangkhawm in Bijang Loubuk (Lower Lamka) hon saat ua, huainung 1930-33 in Phungkhothang in Mualveng honsaat nawn leuleu a, ‘Hiangtam Lamka’ or ‘Upper Lamka’ honchi leuleu hi. Huchi’n amau geel khosaat masa te hong kikhen in Lower Lamka (Lamka Nuai) leh Upper Lamka (Lamka Tung) in hong kikhen khia ua, tua Lamka Nuai chih tuh tua Police Station kong a Tipaimaimukh Road leh Tedim Road kisuktuahna nuailam ahihziak in Lamka Nuai kichi mai a, huan Lamka Tung or Upper Lamka chih leng huai Lamka Tung lam a a omziak a Lamka Tung kichi mai ahi hi. Tua chi’n Lamka tuh a tung leh a nuai a khen hong hi a, a pumpi a gawm in ‘Lamka Khopi’ ahi topmai hi.

Atuung lam a i gensa bang a British te hongluut un missionary te’n honzui ngal ua, mun-le-mual hon zong uhi. Huchi’n Mission Compound, huai hunlai a Suangpi kichihna mun ah mun honbawl uhi. Ahihhang in, Manipur Leng in gen neise ahihman in amau (missionary te’n) mundet deih ahihman un a pauthei peuh su lungkim in tua Suangpi leng Churachandpur chi’n Manipur Leng, Churachand Singh mintam in honphuak thak uhi. Huchibang a missionary te’n mun honneih chiang un leh Manipur Lengpa deihsakna in hongkhang mahmah a, Daak Inn, Lambu leh Quarter chih khawng haksa lou chik in bawl hong hingal a, NEIG Mission Headquarters chih hong hingal in, Mission High School, Hostel (Boys & Girls), Bible School, Printing Press, Mission Hospital leh Daak Inn khawng bawl hipah ngal hi.Hichibang a Churachandpur a hongkhan sung in Lamka leng na khang mahmah a, khua 8 sang a tawm zawlou in na kibehlap hi: (1) Bijang Loubuk (Lower Lamka), (2) Hiangtam Lamka (Upper Lamka), (3) Bungmual, (4) Phailian, (5) Bijang, (6) Hill Town, (7) Headquarter Veng, (8) Sielmat, (9) Chiengkonpang chihte in.

Ahi a, India in Independence a ngah nung a Republic Day zat pat a hong hihkum 1951 in Tamenglon Circle Headquarters pen Kumpi in deih bang salou deuh ahi ngei dia, eilam ah hon koih ua, hiai Circle Headquarters koihna diing in Manipur Leng in amah mun Churachandpur a koih a ut a, himahleh lem tanlouhna ziak tampi leh communication a fellouh ziak in hiai Lamka khua ah hon koih ua, Lamka Circle or Sub-Division chilou in Churachandpur Circle or Sub-Division honchi ua, a omna lah Lamka hingal, a min lah Churachandpur hizel in Circle Headquarter New Churachandpur honchi zomah uhi. Huchi’n tua I.B. kiim khawng ah office building leh govt. quarter diing khawng honbawl ua, Lamka tuh mun poimoh khat ahihna diing kipanta hi. Ahi a, Churachandpur Circle chihna diing a Churachandpur a om khalou ahihman in Churachandpur Mission Compound pen Old Churachandpur hon chi ua, Circle Headquarter New Churachandpur chi a bawl a hong hita hi. Tuachi’n Churachandpur 3 mahmah hong om teltul hi (Old Churachandpur , Churachandpur Circle Sub-Division leh New Churachandpur). Tuni chiang in 4 mahmah pha zomah lai a, a 4na tuh Churachandpur District ahi.

Hichibang in kizang mahle “Churachandpur pen Old Churachandpur chih diing ahi a, Sub-Division leng Churachandpur Sub-Division chih ahi dia, Circle Headquarter leng New Churachandpur chi diing ahi,” chihna order omlou hi. District min diing in Churachandpur chih diing ahi chih louh ngal. Hiai District min pen ahihleh 1983 a kibawl lel ahi. Hichibang ahihziak in i mawllai a ut dandan a hon na taalkaih ahi uh chih a chiang a, huai pen tuni chiang in khangthak te’n kingai thei nawnlou hi.

Hichibang in Lamka khua hong kipan a, himahleh Lamka chih pen tak kua phuah hiam chih bel kithei zoulou hi. Bangteng hileh Kol-le-Vai hiam nam dang hon phuahsak bel hilou in, ei Zomite lak a kuahiam khat phuah bel hina ahi chih i theichian hi.

Hichibang a i mawl lai a order hiam public dotna hiam om tuanlou a min hichi zahzah piakluih a i om pen kuamah in kingai theilou ahihman in “Lamka pen theihphak louh khop apan ka min dik uh ahi. Huaiziak in Churachandpur hon thaimangsak unla, ‘Lamka’ hon chita un,” chi’n Pu Rishang Keishing, Chief Minister, Manipur kiang ah dt 27/10/82 ni’n a thu omdan hoihtak a hilh chian in Memorandum All Paite Students’ Union (APSU) in pia a, ama’n leng diksa ahi ngei diing a, Pu KV Singh, IAS (huai hunlai a Deputy Commissioner) kiang ah comment bawl di’n thu pia hi. Hichibang thu a om laitak in Lamka College Students’ Union a Gen Secy, Zomi Sangnaupang Pawlpi leh ‘Lamka’ khopi sung a Hausa 7 te (1) Hiangtam Lamka, (2) Bijang Loubuk, (3) Bungmual, (4) Tuibuang, (5) Chiengkonpang, (6) Phailian leh (7) Headquarter te’n a dikmah ahi chi’n APSU thilhih gum in Deputy Commissioner kiang ah lai pia uhi.

Phuut a a om bang in D.C. in leng hoihtak in comment bawl ngal hi. Amah comment pen paitou zel in Manipur Cabinet level tung tou a, himahleh Pu Ngurdinglien (huai hun a Agriculture Minister) in a deihlouh bikbek ziak in Manipur Kumpi’n Lamka chi ngamlou in, Manipur Secretariat Orders No. 6/1/8[kisim theilou, 82 hiam 83 hiam hi di] -/2735 dt 1/8/83 dungzui in Churachandpur tuh Lamka a kheek diing in lemsa lou chih order suah daih hi. Pu Ngurdinglien in bangchi dan a ‘Lamka’ deihlou hiam? Huchi’n memorandum khia in helna kibawl mahleh bangmah phattuamna omlou a, a lohngaihna theilou in tawlkhat ki-om hi.

Hun hongpai in, nidang a lalte hong kia a, Kumpi thunei te hong kikheng a Pu T Phungzathang in Cabinet Minister hon tangkha hi. Ki lametna liantak toh dt 29/8/85 in amah Pu Thang kiang ah Memorandum khat leh a thu omdan genchetna kipe leuleu hi. Huai hunlai in ‘Lamka’ Municipal President post hongbuai a, Pu T Dongzakai Gangte in kei President a ka hongpan zoh ngeingei leh a lampi diing ka hon bawlsak diing, na lunghimoh kei un chi’n hon chiam hi. Pasiam lemsak ahingei diin a, Municipal President hongkai petmah hi. A chiam bang in dt 18/12/86 ni’n Memorandum khat piakna leh nohna kinei hi. Ama’n leng a thuchiam thei gige in leh Municipal Board Vice-President Pu T Vunglal leh Ward Commissioner te deihna bang in 44th Municipal Board Meeting Misc Agenda No. 4na dt 18.12.86 ni’n Churachandpur pen diklou mah ahi a, ‘Lamka’ mah ahi. Huaiziak in, Kumpi’n hon khekta un chiin decision hon bawlta uhi.

I khopi vaihawm te’n hon bawlsakta ahihman un chi’n kipahna lian mahmah a, a Board Meeting Proceeding copy khat toh Pu Gen KV Krishna Rao (retd.), Governer of Manipur kiang ah nohna memorandum kipe leuleu a, ama’n leng Municipal Board decision ahihman in ahisa ahi chi a hon khamuan hial in No. GSM/Gen/1/86 dt 15/1/87 ni’n Chief Secretary, Manipur kiang khakphei leuleu a, Chief Secretary in No. R/CS/24 dt 15/1/87 ni’n Commissioner/Revenue kiang pesawn in tuachi’n No. 23/79/86 R file move hong kipan leuleu a, dt 13/2/87 ni’n Deputy Secretary leh Commissioner/Secretary (Revenue) te’n Pu M Ibotombi Singh, Minister (Revenue) kiang na pelut nawn uhi. Himahleh Minister pa’n na pending sak naw vengveng ahihman in 9th April, 1987 ni’n Chief Minister kiang ah Governor leh Municipal Board te deihna bang in order hon bawlsak in chi’n memorandum khat kipia in nohna kinei nawn hi.

Huchi a memorandum piak ahihchiang in Minister in leng haksa sa ahi ngei diing a, delaying tactic hong luut in kou Revenue Department te bawl diing ahikei a, Local Self-Government bawl diing ahi chi’n Department honkheng leuleu uhi. Huchi’n LSG Dept in Deputy Commissioner, CCPur kiang comment thak hon ngen leuleu ua, Pu DS Poonia, IAS, Deputy Commissioner in leng No. 2/DC(S)/234/83 dt 21/5/87 ni’n comment na lai pe nawn hi. Tu’n Government ah file pending lel hi.

Tu’n ahihleh ei District mi mahmah, a awlmoh thei diing Minister khawng neita i hihman in, amau leng gam-le-nam khualna toh nna honsep ua, bawlfel pah ahih i lamen in i ngaklah mahmah hi.

Khatvei bawl khelh bawldik nawn na’ng in hunluut petmah a, tuaban ah hak leng haksa ahihman in kong bangkim ah pilvang tak leh tunung diing ngaihtuah detdet sawm diing ahi chih khangthak te’n mangngilh hetkei ni hang.

Huchibang  in ‘Lamka Khopi’ hong kipan a, tuni chiang in kum 50 khawng diing lel a upa himahleh khang mahmah ahihman in Educational Excursion a hongpha tam mahmah hi. Tua kia leng hilou in minthang petmah hi. Tuaban ah Government a sepna nei singtang mi hi’n namdang hitaleh hiai i khopi ut in kituh zen uhi. Tua ahihman in hiai i ‘Lamka Khopi’ khovel a khopi khanghat te lak a khat ahih chih mangngilh ke’n.

Tuban a khang hong paizel di a, hiai i Zogam khopi ‘Lamka’  in lah masawn deuhdeuh diing ahihdan ka ngaihtuah chiang in piang baih ka kisa lua a, a khang bangzah hiam na te lah hiai i khopi sung ah …….

*Hiai thu a gelhlai in All Paite Students’ Union (APSU) President ahi - Admin

[25th Siamsinpawlpi Annual Magazine 1987 apat laaksawn ahi.]