Wednesday, July 4, 2007

NGO for our Socio Economic development

I society uh I et chiang in i pona in bang chileh ki khangtou thei ding hiam chih I ngaihtuah bek tham lo in I hihtheihdan khomkhom in pan kila tou hi. Lamka context ah enle hang organisation I phutkhiat te uh a taang pi a et in HIV/AIDS leh Drugs a buai te lunghimohna in NGO tuamtuam ki phutkhia in a hi thei bang in fund te kai khawm in pan nasatak in Ia I uhi. Lam khat ah pahtaak huai mahmah. Hiai banah I hih nailouh khat uh ahihleh I tuailai te uh bangziak a sia uh hiam chih I ngaihsut leh hih ding phatuam, economic activities khat peuh a omlouh man ahi deh aw chih a hong ngaihsun sak hi. Rehab ah I graduate chiang unle hih ding poimoh dang a phatuam omlo ahihman in ah mi tampi i puuknawn uhi chih le I thei. Nna phatuam sem in buai peuhmah phot le hang guuktaakna, khamtheih hihna, sum ki ngetna letter muh a tawm dia I hinkhua mahmah uh nuam tuam ding in I ngaihtuah hi. Hiai bang a hihna ah economic activities lam buai pih ding in NGO khat training petu ding omleh mo I chi ngutngut hi. I siat gawp ma un leh a zawn gawp ma un thil phatuam sep khiat a ngai! Govt programme tuamtuam te I phattuam pih theih na ding in Trainning fund te kailut in trainning petu/arrange thei ding NGO muan huai mahmah khat I poimoh hi. Trg programme leh Scheme tuamtuam muhtheih ding a tam mahmah hi. Tua bang I phattuam pih theihna ding in NGO khat I poimoh uhi chih haihvual ahi kei. Bangziak in eita na chi mai thei. Trg prog leh Scheme tuamtuam te NGO through a ki route thei a hihman in.
Singtang I lo neih uh ki ngakna taak ahihloh dan leh khek a ngaihdan I thei chiat. Hiai bang khekna nna a hong patkhiat pih thei ding in state govt departmentte I ngansiah theikei. Horticulture lam I try theilua uh. Hamphat huaitak in I gam ua khaichi piangte a limdeuh se hi. Leihoihza lah zatluat ngailo. I product hoihsak peuhmah le hang market ding a buaihuai masa kei chih I theih a ngai. Agriculture leh Horticulture lam ah graduate I poimoh mahmah ua, I khangthak ten hong sin in hong graduate khe le uh I chi hi. Active NGO hiai lampang a saithei ding I poimoh petmah uh. NABARD ah sem ka hihman in kou department a pat scheme tuamtuam eite a ding in phattuam thei ding a tam mahmah chih ka gen thei hi. I din mun in zillo a hihman in I avail theikei uhi. Hiai ah a tam zote Grant ahi a Loan a hikei hi. Arunachal Pradesh ah NGO khat through in singtang innkuan 500 te a ding in leengthei leh sekkhum chiinna ding in sum tampi a ki sanction hi. Manipur, Mizoram leh mun dangdang ah le a kipan khe khinta. Ei kiang ah bel hi nailo. Ka ngaihtuah chiang in enle I poimoh mahmah khat hilo hia ka chi hi. Kei mahmah le Lengthei leh Hai ziak a sum mu leh hingkhia khat ka hihna ah a phattuamdan leh hihtaak na a hihdan ka thei hi. Hiai bang nna poimohtak sem khe ding in ngaihtuah in NGO khat hong ding khe mahmah leh I chi hi.

No comments: