Wednesday, June 20, 2007

Pu Chin Khenthang :Ka Tanu Khakna

          (Kei' tung a thiltung ahihman hiam, pawlpi a heutute hiam, mimal hiam sukminsiat nop man a hiai thu hon suah ka hi kei. Heutute'n ka tung a a thilhih uh diklou leh kilawmlou ka sak thu amau ka zasak. Hihkhial kisa lou ahi ding uh, tuni tan in diklou akisakna thu uh kam khat leng akiza kei. Hileleng ke'n dik sa thei lou, aku-akua' tung ah leng tuabang in kihih nawn kei leh chi ka hihman in leh, hiai thu (issue) poimohtak ahihman in mipi'n leng lunggel vengveng in ngaihtuah leh ka chih man a hon suah ka hi). 

          May 12 ni a ka tanu khakkhiakna ah thuhilhna leh vualjawlna
thuumna hong neihsak ding in local pastor ka chial hi. Hiai ah, "Ka tanu' pasal neihna ah akiteengsaktu in hong pang in," chi hilou in, "Ka tanu khakkhiakna nei ding ka hi a, vualjawlna thuumna leh thuhilhna hong neihsak in" chi ka hizaw, chih leh, hiai khakkhiakna pen biakna vaai hithou mahleh, social vaai, suangkuan vaai ahizaw, chih I theih masak uh ka deih hi.

          Atuung in pastor in lem asa a, Dorka leh Tuailai Committeete'n leng amau' committee min a hong uap sawm uh hi in akigen. Pastor in lauthawngna nei thak ahi ding, local committee memberte khat leng kikuppih lou a Dorca hall a heutute ana dot leh, ka tanu' pasal ding Kristian himahleh 'Gindan kibatpih lou ahi, nana hih kei un," chi in thu pia uhi. Tua ahihman in, saptuam' min a hong uap thei om talou uhi. Tuabang a heutute'n ka' tung a thilhih uh theisiam lou a lamdangsa ka hih man in, hiai ka dotnate hon dawng a hon theisiamsak le-uh chih ka deih hi:

          (1) Kivaipuakna Dan Article II 26 A.(j) lou ngal Pathian awilou hiam, gindan kibatpih lou hiam toh kiteenna thu genna himhim I bye-law uah ka mu kei. Hiai Article in, "Saptuam sung mi in Pathian awilou (saptuam sung mi hihna neilou, record a a min omlou hilhial) vanei taleh kingaihna khelhna mah ahi," achi. Hiai a 'Saptuam sung mi hihna nei lou' achih EBC mi hilou chihna hia, ahihke'h saptuam himhim telna nei lou, chihna hia chih achiang kei.

          EBC mi hilou, chihna dan in la zual le-hang, EBC mi hilou peuhmah I record ua a min uh omlou ding ahihman in, tuabang mi toh kiteen peuhpeuh 'kingaihna khelhna' hisak vek I hi ding umaw? Pathian awilou, ahihke'h koimah saptuam a tellou chihna dan in I la leuleu ding. Tua hileh, ka tanu' pasal ding Pathian awi Kristian ahi a, amau' saptuam' record ah a min om hi. Amau' deihteelna a dan siangthou a kiteeng ding leng ahi uh. Tua ahihman in, hiai kiteenna 'kingaihna khelhna' hithei lou hi. Khakkhiakna hun in ka tanu pasal nei ahi naikei a, nei ding chih thu lel ahi. Hichibang ahihman in atung a Article kigen pen ka tanu' tung a bulh (apply) theihna thu omlou hi.

         Tuabang ahihngal leh, pastorpa'n thuumsakna leh thuhilhna hong neih ding, saptuam pawl in hong uap ding pen bang bye-law, bang Article pansan a Dorca Hall a heutute'n khaam uhiam? Ahihke'h amau' ut dandan leh amau' lung phut dandan a dan bawltawm theihna leh thu piak theihna nei uhia? Pastorpa'n leng theihsiamlouh (doubt) leh lauthawngna nei ahihleh, local committee member khat leng dong masa lou a pawlpi a heutute adot, local committee memberte muan taak leh kup taak asak omlou hive maw?

          (2) Ahihleh, Catholic hi in adangdang hileh, EBCte' gindan kibatpih lou teng hotdam ahi kei ding uh, I chi ngam uhia? Amau hiam, Pathian awilou hiam toh kiteeng teng mikhial, hotdam hilou ding, I chi ngam uhia? Ginglou toh kiteeng a kituakloupi a hakkol po khawm lou ding in Lai Siangthou in ahon hilh a, hileleng, "Ginglou pasal tuh gingtu ji in asiangsak (sanctified) a, gingtu hilou ji leng gingtu pasal in asiangsak," chi ahihman in, ginglou hiam,  gindan kibatpih lou hiam toh kiteen pen khelhna (sin) hi hial di'n ka ngaihtuah kei. Kiteeng chih man a amau' gindan va pompih chihna leng hi pah lou hi. Ahihleh, ka tanu in gindan kibatpihlou Kristian akiteenpih ding pen pastor' thuhilhna leh thuumsakna, saptuam in hong uap ding phallouhna ding (deny/withhold bawlna ding) khop khelhna khawk hi hia?    

         Jesu'n, "Achidam mite'n doctor akiphamoh kei ua, achidamloute'n akiphamoh uh," achi. Sawltaak Paul in leng, "Unaute aw, mi khat khelhna ah awk taleh, nou khamite'n amah nunneemtak in tungding nawn un," achi. Ka tanu khelhna khawkpi a awk hi a ngai I hih ua leh, pastor' thumsakna leh thuhilhna khaam naksang a, thuumsakna, thuhilhna leh nuneemna toh amah I tunding nawn ding uh hizaw lou maw? Pawl dangte' sang a khamizaw, ginna leh sinsakna dikzaw tawi dan a kikoih lah bang ngal, mi khelhna a puuk dingte khoih sianglou (untouchable) dan a koih a, nungngatsan a taisan mai ding I hihleh, bangchibang Kristian, sinsakna leh ginna dik tawi hi ding I hi uhiam?

          Kristian, Kris' nungjui diktak I hihleh khentuam neilou a, Hindu, Muslim, Catholic leh Catholic lou khenlou a, thuumsakna leh thuhilhna kiphamoh leh ngainate thuumsak a I thuhilh ding hizaw lou hia? Reinhert Bonke, Peter Youngren, Benny Hynn leh adangdangte'n, nangzaw Hindu na hi, Muslim na hi, gindan kibatpihlou na hi, mikhial na hi, k'on thuumsak kei ding, achi ngei kei uh. Khentuam nei lou in athuumsak jel ua, mite'n lamdangtak a damna mu in Pathian' thupina alangsak jel uh. 

          (3) Hun paisa ah hichibang thil ana omta hi in akigen a, ka theihkhelh ahihleh n'on ngaihsiam uh k'on ngen masa hi:

          (i)Ginkhozam' tanu Seventh Day mi (gindan kibatpih lou) toh kiteeng ding a  khakkhiakna uah EBC pastorte va kihel in thuumsakna leh thuhilhna ava nei uh.

          (ii) EBC General Secretary in a ceremonial dress silh hial in  gindan kibatpihlou Seventh Dayte' (Dallian') function ava uap a, laibu honna ava neihsak. Social vaai ahi, apoi kei, I chi uh ahi maithei (social vaai ahihleh bangdia ceremonial dress silh, chih theih ahi). Ka tanu khakkhiakna leng social thil, family vaai ahi.

          (iii) Pawlpi' Kivaipuakna dan Article II 26 A. (a)na in, "Nungak leh tangval kiteenna om masa lou in lupkhawm asiang kei, tuabang a lupkhawm pen kingaihna khelhna ahi," achi. Kigu  leh kitaipihte kiteenna om masa lou a lumkhawm, asiang lou bang a pawlpi'n angaih ahi. Tunaizek in heutupa T.Phungzathang tapa in ji agu a, alawm uh. Huai lopna ah local pastor leh D.S. in thuumna, vualjawlna leh hasotna ava neihsak uh.

          (iv) Thumanlouh leh thulimlouh man a khamtheih chiing a site, mahni kithatte  (solkal' dan leh ei' dan in tualthat bang a ngaih) leng I  pastorate mah in a vuina (ceremony) hih jel uh hi in ka thei.

          (v) Pathian awi hi in awilou hileh, damloute, liamna tuakte leh adangdangte leng I pastorate leng adangdangte'n leng thuumna I neihsak sam ding un ka ging.

          Hiaite hih kei ni, chi ka hikei. Kristian tak kichi teng hiaite ahih luat ding ahí. Hileleng I heutu liante'n hiaite midang' tung a hih ding khaam lou a kou' tung a hih ding akhaam sese uh, kou' a dia dan (bye-law) tuam, tehna tuam om sese hiam? Bangding a khat tung a ni sasak a, khat tung a ni liapsak (vuah zusak) sese uhiam?

          Achik-achik in leng I pawlpi ua heutute' thilhih dan ka et chiang in, Kristian heutu bang a vaihawm sang a solkal a thuneite bang a vaihawm, khentuam nei, adik-atang a vaihawm lou,  ngaihdamna lam a thasial/zekai a mi gawt ding a kal kin suan, a thuneihna uh mi' hoihna ding leh koujanna ding a zat sang a mi' tunggikna ding a khetbuk a zang, ahihkhelh leh hihdiklouhte  "Ka hihkhial," chi nuam lou a kel-pan a pang a kidiksak sawm teitei mi ahi uh,  chih ka muh dan ahi.

 
 

                                                                                (H.Chin Khenthang)

Source: http://groups.yahoo.com/group/siamsinpawlpi/

No comments: