Thursday, February 19, 2009

Lamka ah tui haksa

Kavei leh puaknat gige ahihman in ka hong gen/gelh deuhzut ding. Lamka, Manipur mi hilo te’n hong na ngaisiam mai un Lamka toh kisai gen ding i hihman in.
Lamka ah tui haksa chih gige mahmah zong chimtak huai ei! I Mata dam ahk Khuga dam pen multipurpose project bang ki chi jojen ven tuineek ding beek ngahtheihna hong hileh ka chi mahmah mai. Tuineek ding innchiat ah hongkai kaal ngaklah huai na e. DONER nuai ah project min pen “Augmentation of Water Supply for Churachandpur town from Khuga dam (Khuga river source)–Zone-III” kichi in Rs.815lakhs sanction, release bel Rs.783.5 lakhs as on 31.12.2008 [a website uah] kichi. I Manipur Express date 18-02-2009 issue in Rs. 300.77 crores ki releaseta chi.
A thubul theiten hong gen mah dih ua. A kibawldan leh cement zatdan mahmah zong thupilou a chih uh kana zakha jel sam a...Hong gen beh un. A project design leh planning toh kisai nikum masalam in kakan leh kuaman a hong dawng kei a, a theite'n hong dawng dih ve ua.Tulai pau leh mipi ten social audit chih bangpian pan le hang hoihsa ing ei. I pianpih Unau sanggamteng tuiduh in siphial le uh kilawm sa mawk veng aw. A leizoute leiding in tui kizuak bel chi ven. Aihhang kei' kilohtawm pa'n leizoh chihthadah bang hun in tuitha luitui tawi man ding ka hiam? Tuitawi na ding lah gamla ven, tuitawi ding in vakuan hileng banghun a kiloh man ding ka hiam? Meithainu'n bang hun in tuitawi man ding a hiam? Job card lah kuan uthuai.
Tua ahihman in pangkhawm ni. Bangzah ki sanction a hia? A ki releasete bang chi kizat hiam chih etkai tuak mahmah kasa. A fund divert a om hia? kuate a hi ua ? Hibang a i zomi pihte hamphatna ding a na huaimangte pen lauh ding hikei. Lauhna ding zong om kei! [ken kuamah lau vetlo, zahtaak nei lel ing].
LAMKA POST; 18 February 2009 issue ah hibang news report om:
Committee on Govt. Assurance team in Khuga Dam pha
Khuga Multipurpose Project pen kum 1983-‘84 in kipan a Rs. 335.15 crores bei a zohsiang ding chih ahih toh kiton in 31st. Dec. 2008 tan in Rs. 300.77 crores zat bei hita a, March 2009 a zohsiang hiding a gintak ahi. Hiai Dam kiching 230m in sau a, 38m in lian a, right canal 60 Km in sau a, left side canal 6.50Km in sau hi.Tuilou 15,000 ha. tui supply thei ding a, dawn ding tuisiang 5 MGD leh meivak 1.5 MW piang sak thei ding hi.

Hiai Dam nasepna Head Works, Canal system leh Power Component in kikhen a, head works ah Dam, Spillway, RCC Works leh Radial Gate te 100% zohsiang hita hi. Canal System ah right side canal 0 Km apan 18 Km 90% zohsiang hita a, 18Km apan 40 Km 40% zohsiang hita a, tuabanah 40 Km apan 60 Km 35% zohsiang hita hi. Left side main canal ah 0 Km apan 4.50Km 90% zohsiang hita a, 4.50Km apan 6.50 Km 40% zohsiang hita hi. Power Component ah Civil works 95% zohsiang hita a, electro-mechanical equipment toh kisaite company apan order hilel chi’n tuni a Dam toh kisai thusuah a bawlna uah taklang uhi. Dam zohsiangna ding in project cost apan 10.18 behlap ngai ding a, huai bel hoihtak a zohsiang ahih theihna ding in Rs. 369.26 crores bei ding hi.

Committee on Govt. Assurance team [ W. Brajabidhu, Chairman, Dr. Ng. Bijoy Singh MLA,  Member, Th. Nanda Kishore Singh, MLA, Member Smt. Y. Indira Devi, Jiont  Secy., Smt. Lawmkimi, Dy. Secy,  Th. Khelendra Singh, Under Secy,  Smt. Sushila Devi, Under Secy, leh P. Manglem Singh A/C.O hi uhi. Amaute IFCE official apan SD Gangte  Addl. Chief Engineer leh Karuna Chand Singh Supdt. Engineer ] tuni a hong zinte’n Khuga Dam nasepna hoihsa in lungtunhuai a sak thu uh gen ua, himahleh centre apan sum hong pai a ze-ol ziaka nasep deih bang a kin theilou hi’n leng gen ua, tua pan kha 2/3 sung a zohsiang ahih ngei lamethuai a sak thu uh leng gen uhi. Amaute’n a genzelna uah, hiai Dam pen CCpur District mipite a ding ahihziakin mipi’n mahni a bang a kem ding in ngen uhi.
Hong gen/gelh un, bang chi hih hoih ding hiam? Tuineek kaal ngaklah huailua...

WELL neiten midangte tui hong tawisak kei zomah d ua maw...

No comments: