Saturday, September 13, 2008

Editorial:The Lamka Post | September 13, 2008

Tuahsiatna tungtawn a kibawlhoihna

Tukum,2008 mel i muhma deuh ua pat gari toh kisai in tuahsiatna gen tham ching om vengvung hi. Piphema leh Medziphema kikal a T. Kamzalian S/o (L) T. Kaimung of Tangnuam leh a sungte tuahsiatna ahihkeileh, Khotuh leh Hengkot kikal a Tuilaphai zuan passenger bus Maha Maya tuahsiatna bang gen tham ching diak hi. 2008 i hong lut ua leh hiai bang tuahsiatnate’n kiamlam sang in pun lam manoh a bang hi. Gari toh kisai a tukum bel kum hoihlou ahi chileleng chih theih ding khop in i district sung uah gari accident om mun petmah hi. Kuaman a sihloh hiallouhnate bang uh theih seng ding leng ahi nawnkei a, himahleh, Lamka khopi sung a gari accident-te banah Behiang lam kia ah leng gari accident nasa mahmah nih, Ngasuon lei a truck tuahsia leh Behiang phakma deuh a Hitler bus tuahsia bang gen tham ching petmah hi. Thil mak deuhdeuh a tun muh mahmah zawkmah toh, dawi kaih zek leng dawite ziak ahi bang leng chih theih leh kilawm phial hi. Himahleh, bang ziak a accident hichituk a om mun ahia chih pen thutuam hiphot zezen leh, hiai bang accident a om teng in i Damdawi Inn uh ginatlouh dan chiang petmah sek khol diak hi. Maha Maya tuahsiatna, Hitler tuahsiatna ahihkeileh Ngasuon Lei tung a truck tuahsiatnate bang ah, a hoihlam in gen leng, mi phatuamngaite a dia phattuamngaihna suahna hun lemchang in dim a, liamte damdawi inn tut ahihnung un leng meivak hoihlou, generator thoh ngai, lupna kidaihlou, drip khaina khuam kidaihlou, nurse kidaihlou etc. etc., (damdawi etc. kilei ngai…chih dan deuhte leng gen phak hinailou) i damdawi inn uh pauthei hileh “ka kisuanglah lua” chichi maimah leh kilawm hi.

Vangtahhuaitak in zan in Chiangpi zuan a passenger pua Tata 207 DI, zing dak 8 vel in S. Kholian kho kiang ah hong tuahsia hi. Vangtahhuai thouthou di’n, pauselou in, mi khat kia, Mrs. Nemdoiting (38) w/o. Khamlal of Phaipheng in sihloh vanglak a, himahleh, tamtak liam veve uhi. Hiai tuahsiatna Assam Rifles-te’n hutkhiakna nasep pan ngal ua, Henglep OC makaih in Lamka apan in leng delh ua, liamte sunma dak 10:30 vel in Lamka damdawi inn tut uhi. Assam Rifles-te omlou hile uh tua sang a tamzaw in a sihloh kei ding uh chihngamhuailou hi. Hiai bang tuahsiatna hun ah National Rural Health Mission nuai a Mobile Medical Unit gari nih i neihte uh bang laboratory, X-ray machine leh oxygen banah generator tel a vanzat tuamtuam bukimtak toh kithuah, damlou gimzualte leng a poimoh leh emergency minor operation bawl theih ding ahihman in zat tuak mahmah hi. Himahleh, semtu ding Driver-2, Lab. Technician-1 leh X-Ray Technician-1 lakna dia August 1 a interview neih a om pen tunitan result suaknailou ahihman in a khoih ding omlou hi. Huai banah, a khe a niamluat ziak in lampi hoih mahmah ahihkeileh zat theih ding vual hilou lai hi. Ahihleh, Lamka Damdawi Inn a ambulance pen bangchi? A lui pen zattak nawnlouh in om a, casualty kong khong ah khawl dedaw maimah sek hi. Ambulance thak, a zattheih lai Mahindra Max ahihleh i nei ua, Upa Dr. N. Tualkhankham, Dy. Medical Superintendent in August 18 in Pathian kiang ah ana lan khinta hi. Himahleh, gari buk kidaihlou ahi ngei ding a, Medical Superintendent (MS) in a inn ah hoihtak in koih hi. Zattheih mai ding bang mahleh ambulance poimohna a om teng a a hektu’n MS’ inn apat gari a valak gige ding chih mawk ahiding mah ahi diam? Ahihkeileh, a hektu ding omlou zel hia? Apaisa March 31, 2008 sunnung dak 2:30 in MS in a office ah Lamka pansan thuthaksaite kimuhpih a, Lamka Damdawi Inn’ taksap leh haksatna tuamtuamte a pulak banah MS a let sung a a hihtheihna chiangchiang a Lamka Damdawi Inn puahphat sawm ahihdan gen in kuapeuh kithuahna poimoh ahihdan leng gen hi. Lamka Damdawi Inn puahna dia mipite’n i hihtheih bang bang ua thuneitute kithuahpih ding mah ahi a, huai kawmkawm in, MS in leng a hihtheihna chiangchiang a, a gensa a sepsuah ding sam ahi.

No comments: