Friday, June 12, 2009

Kisak kholhna

Zanlam in Cl-X leh Cl-XII Exam result hong suak pen a lungdamhuai mahmah hi. Tampiten hoihtak in zoh lai in bangzah hiamte a fail uhi. Laisimna toh kisai, a ki ging khol leh ki ging khollote a result uah hong ki theipah cih I mu thei hi. Tuabang in mihingte I hinna ding in maban diing ngaihsut leh khual kuul ahihman in, I maban aa ding in kisakkholh kuul ahihdan phawk huai hi. LST a Paunak 29:18 ah I muh bang in 'Maban muhkholhna omlohna ah mite a puuk uhi' ki ci hi. Tua ahihman in I maban ding hoihtak lunggeel a I ki sakkholh ding poimoh leh thupi hi. I laisimna hiam aw I nasepna khat peuh ah I maban ding ngaihsun kawm in pang ni. Sum le paai, tha le zung mawkseen diing hun hi nawnlo hi. Ngaihsut leh lung geel detdet theihna a neilo ganhing bang a I hin ding ahi kei hi.

Tuhun a I omdan in I maban diing bawl ahih lam mangngilh kei ni. I kum tam in tawm tase leh lungpii geel a picing tak a I gamtat leh khosak diing ahihdan mangngilh kei ni. Ni dang ciang in mite eng lel ding I hi hia, ahk mite een ding I hi hiam cih pen ei tung ah a kinga lel hi. Sawtlo cik I nuntak hunsung in mite neih le lam va een det ding pen hithei lo ban ah uthuai lo hi. Hi bang in na ngaihsun ngei hiam? Ngaihsun mah dih. Ki phal leh utlo ding na hihdan ngaihsun thei ing. Tua ahihman in lunggeel thak ni, sanggam. A ki kheel ma in pan in. Paite khonung pil kei ni! Ki siik ngai sese lou ding in kipan pah fetfet ni. I hihtheih bang in sem in pang phot peuhmah le hang bang tan hiam beek I tung ding hi. Hih ding a poimoh a I theih teng hih peuhmah le hang a hoih ding. I hihkhaklohte tung ah I kisiikna ding a tawmdeuh mah na. Ziingciang a pat ding in siit ken. Tu leh tu mahmah a pat ding ahi. Ziingciang hong tung ngei kei diing.Tuban kum 5 ahk 10 ciang in ci phei kei le hang zong, ziingciang hun a ding in na ki man hiam?

**TAZENSAM News a dia ka gelh ahi**

No comments: