Thursday, July 16, 2009

TG VUM KHAW THANG' VAIKHAKNA

Beh laibu bawlna toh kisai
1. Kum 1956 kum sungin Tedim gam a khua khua a om Tawm Ging suan u le naute kiangah lai hawm in Tedim khua pa, Khai Za Kham innpi-ah 5-1-1957 ni-in gambup Tawm Ging beh kamkup kikhoppihna amasa khat vei a ki bawl hi.
2. Tua kamkup kikhopina sungah pupi min ahi beh min lawhna pen TAWM GING leh TAWM BING min lawhna kam kupna a om hi.

(a)Saizang khua Taangmite in: 'Ko, Saizang khua panin “TAWM GING” mah kana ci ciat uh hi', a ci uh hi.

(b)Pa, Khai Za Kham in a genna-ah:'Ko, ka pu ka pate uhin zong a khang khang a hong vaikhakna uhah ih pupi Tawm Gingte' khan lai-inah gal mat sa mat lamah leh lo khawh sing puak lamah na kiva kim ciat uh hi. Neih leh lam tawh kicing in na go na lup uha, a sun a zan in a khuang, a zam, a daktal ging ging in khua meel tui meel phawk lo in nuam na sa mahmah uh hi. A khua a tui in zong “TAWM GING” te ahih uh mah bangin a khuang a dak uh tawh a sun a zan in ging zo lawm lawm mah uh ei', a ci uh hi. Tua bang ahihna hangin a ih pupi Sim Hang in zong a ta upa pen a pa Tawm Ging tamsak in 'Ging Lam' a na phuak hi, ci-in hong vaikhak uh hi. Tua ahih bangmah in ko zong khang ciaptehna sungah pupi “TAWM GING” mah in a khang khang in a kivaikhak suk ka hi uh hi', a ci hi.

(c)Tedim gam a khua khua pan a hong pai taangmi a a tam zawte inzong, 'Bo, Khai Za Kham' gen bangmah in ko zong ka ciamteh uh hi,' ci-in a gen uha, a thu kim pih ciat uh hi.

(d)Tua kikhop ni-a pan mun len a kiseh upate in zong:'Ko ngaihsutna-ah zong, Tedim gam mi ici peuhmah saizaang khua, Ciimnuai khua pan a ki khang to khia, beh leh phung, nam min a kici khawngte zong a ki min lawh khia ahi hi. Kampau dan, aw kaih ih cih pen ih tenna khua ih tenn na gam leh mun zui a ki pau ciat ahi hi. Tua hi-a Saizaang kampau pen 'Taang kampau' hi ging ahih ciangin 'Tawm Ging' mah man zaw ding hi', ci-in thukim in a kipsak uh hi.

(e) Panmun lente:
(1) Pau Za Gin
Chairman
Tedim

(2) Kham Kho Tual
Vice Chairman
Tedim

(3) Kam Za En
Secretary
Suangphei

(4) Kham Za Laang
Joint Secretary
Tedim

(5) Kham Sial Khup
Treasurer
Tedim

3. Tua ahih manin Tawm Ging leh Tawm Bing lawhna kammal kikupna pan in Tawm Ging lawhna penmah man kisa zaw ciata, 5.1.1957 ni a kipan in 'Tawm Ging' a lawh zawk ciat na dingin ciamteh in a ki kipsak hi.

4. Ei Tawm Ging beh peuhmah ih ki theih theih nading in ih min mai ciatah: 'TG' ci-in gelh ciat dingin zong a kua mapeuh thukim in ki ciamteha, ki kipsak hi.

5. Pupi Tawm Ging' tapasal unau bangzah kipha hiam ci-a, kamkupna ki omsak hi. Tua banga kamkupna a om ciangin Tawm Ging ta pasal unau (6) pha uh hi, cih kimukhia hi. Ahizongin a u zaw a nau zaw cih a khung a tel genthei kuamah ki omlo hi. Tua banga, a ki thei loh hangin a nuai-a bangin a kiciamteh ahi hi.
(1) Sim Hang, (2) Guiziam, (3) Zom Lun, (4) Nei Lai, (5) Lam Hang, (6) Mat Vung.

6. 1969 kum ciangin, Tedim gam party zumpi panin zum lai nambat 230/3U, nimit 28/3/69 tawh Tedim gam sungah a teeng Zomi na kheempeuh in na beh na phung uh leh na khang sazian ciat uh zumah hong puak ciat ta un, ci-in lai a hawm khia uh hi.

7. Tua bang thu hong pian ciangin Tedim khua ah om Tawm Ging beh u leh nau teng hanciam in kamkupna bawl masa hi.

8. Tua zawh nung kum 1969 sung mahin Tedim gam a khua khua a om Tawm Ging beh u leh nau a kua mapeuh kiangah lai hawm in 12.10.1969 ni-in pa Pau Za Ginte innpi-ah gambup Tawm Ging beh kamkup khoppina a nih vei na ki bawl leu leu hi. Tua kikhoppina ah beh min pen 'Tawm Ging' mah kikip phasak kik leu leu hi. Min mai-ah 'TG' a kua mapeuh in gelha, at kim ciat ding in zong ki gen pha in ki kip phasak kik leu leu hi.

9. Tawm Ging sanggam te in (1) Taang Pua leh (2) Gual Nam te hi, cih zong a kimu khia hi. Khang simna sa zian hong ki puak bangin ki ciamteh in ki kipsak pah hi.

10. 1971 kum ciangin Tedim khua a teeng Tawm Ging beh vaihawm upa ahi thei teng Saizaang khuapi-ah va pai uha, Tuulpite pa Thuam Za Cinte innah kamkup kikhopna khat va bawl leu leu uh hi. Tua kikhopna in a nunung pen kamkup kukhopna ahi hi.

11. Tedim gam a khua khua pan a, khang simna sazian hong kipuakna bang ciat in pu Pau Za Gin leh pa Khai Za Kham in hoihtak in gawmtuah in a khang khang a gai gai in gual in lim phatakpi mah in a bawl uh hi.

12. Tua banga a kibawl khit ciangin keimah TG.Vum Khaw Thang in laibu a, a hong pian khiat theih na ding in, hun ka neihna bang siit lo hanciam in bubawl in tu in a hong ki hawm khia zo pan a suak ahi hi.

13. Hih beh laibu sungah khang simna sazian a om kim hangin khang taangthu a om kim kei hi. Bang hang hiam na cih uh leh, Tua khang taangthu a om lote in lai tawh hong khak loin na khang simna sazian uh bek nong khak ciat uh hangin hong ki khumsak tehi lo ahi hi. Nungsang teh bawl phat zawhna ih neih leh no khang taangthu ciat zong a om zawh nadingin hong hamciam ciat ta un.

14. Ei Tawm Ging' suan tuu leh ta u leh nau teng laibu sung khat peuh peuhah ih min ih puam a om a ki khum ih ki muhsak ciangin, “ A lai, amah, ka u ka nau, ka beh ka phung, ka sang ka suai hi mawk lo ahi maw”, ci-a ih ki theih theih ih ki phawk theih na dingin a kua mapeuh u leh nau, note tungah hanthawn in kong thum pha pha hi.
Gentehna: TG Vum Khaw Thang' tapa TG Lian Suan Mang.

15. Ki en kik zo nawnlo ahih manin khialhna khatpeuh a om leh a man a na na puah phat na ding uhin kong thum hi.


Tedim Sd/- TG Vum Khaw Thang
16/5/1973 Beh lai-at huhpa

Source: Tawmging beh khang tangthu, 1973

No comments: