Friday, September 18, 2009

Bo Khai Za Kham Minsiatna Thu

Bo Khai Za Kham in Tedim khua khuk sungah inn khat K.3500/- in a lei-a, Lawibual khuk sungah innpi khat mah a lam hi. Palik Vuandok (Dy. S.P) za zong ngah to dingin ki um mawh hi. Tuate hang inah Bo Khai Za Kham in a etsate mahin amah a haza uh a el uha, makai in a lang pang uh hi. Mi tampi kikum uha, Bo Khai Za Kham in sumsim nee hi, bawl hi, bang hi, ci-in a khia uh hi.
Tua hang in kumpite in Bo Khai Za Kham pen khasum lang tawh tawlngak tadihna (under suspension) tawl khat sung a pia uh hi. Tua sung in Bo Khai Za Kham nasep zia, a gamtat zia, a om ziate leh sumsim bawl, bawl lo cih ama nungsang taangthu a kan sim uh hi. Ahih bangin amah in sumsim paaisim peuhmah lah bawl ngei lo, sumsim lah nee ngei lo, thuman thutang tawh Palik a tum cil kum 1928 kum akipan a sum kholna dan, a sumcilna dante, ama sum mi dangte in a meet a khang a leitawi nadan khawngte a muh a theih uh ciangin a pei a heek a khiate khialhna, a gitlohna hang uh hi cih kumpite in a mu a thei khia uh hi. Tua ahih man Bo Khai Za Kham in a thu a zo hi. Ahih hangin amah a pei a heekte hanciam lai lai na hang mah in ama nasep sem zom sak kik loin 1-9-1961 ni a kipan pensen a pia mawk uh hi.
Tua ciangin Bo Khai Za Kham inzong: “Kei pensen cing nai lopi pensen nong piak uh, ka mawhna lah om lo hi. Kei utna leh ka thukimna om lopi, hong dong phot lopi-a, tu-a banga nomau ut thu tawh pensen peuh nong piak uh upadii tawh kituak lo hi”, ci-in Palik zum bul pi(Zechoh zum) ah a zu a khan hi. A zu a khan mah bang in zo leu leu a, 24-1-1962 ni a kipanin a Palik nasep za mah ahi, Palik bawk nih(CIP) za mah tawh kumpi nasep a seem zom kik hi.
Tua banga, nasep hong sep zom ciangin amah zong hanciam sem sem a, gam aading leh gammi aading a deihsakna in Cikha Zeken pen Zesakhan in phuan in a puah pha hi. Lai Sinna Sang zong hanciam pih lai-a, Koletciantkhaingzi hmu Daw Muai Ci ton pih in 12-2-1963 ni in Mal kual teng a khawk khawk in bawlung kidemna in suh zong a tuam tuam a pia hi. Tua bawlung kidemna suh a piaknate khawng uh datpong zong Cikha Laisin na Sang' zumpi-ah kisuang lai hi.
1963 kum June kha sung in Kawl mi gilote in Tuul sukah damiah taih in ei Khamtungmi Theizaang khua mi Thang Khaw Mang a thatlum uh hi. Tua a muh pen I.P. Khai Za Kham in PSO te sawl loin ama pumpi mahmah hanciam in kana, tua mi thatte 2 a man pah hi.
Tua ni a kipan Bo Khai Za Kham in gam mite lung nop taka, a zin suk a zin toh theih nading deihsakna tawh Tuulsuk zaangah Zeeken khat phuat na ding, tungsiah ah lai nakpi in at hi. Tung siahte inzong a sang uha, Tuulsuk zaangah Zeeken a phuan paha, Tedim Palik te ngaksak in a cingsak pah hi. Tua zawh nungsang mi gilo damiahte tua mun kim tengah om nawn loin gammite lungnuam takin a zin suk a zin to, thei uh hi.
TG.Vum Khaw Thang a pa neu Bo Khai Za Kham in thumanna leh thutanna tawh a gam leh a mi aadiing deih sakna, tawh na a sep ziak in haza a, a elte in a heek a pei uh hangin zo zo lo uh ahih manin anuai a la dawng (20) a phuak hi.
1. (a) Sing a pau gual a pau te'n ee na pal tual khia ding ci ee;
(b) Mui bang ong pei mi singta aw ka paal tual kia tuan lo ee.
2. (a) Zaata'n sai bang ban napi-a lumbang ki sung zo hing ee;
(b) Lum bang kisung zo hing aw ee, ngal thal bang do zo hi' ng ee.
3. (a)Gual tung tuanna vaimang siamsil ka duangah ong baang nawn ee;
(b) Mui bang ong pei naang bang heekte na selung a zuang, nam aw.
4. (a) Ka min lawi bang a than thanna ka tong dam zaa ta'n deih ee;
(b) Ka tongdam zaa ta'n deih aw ee tuizum vaimang te'n deih ee.
5. (a) Gual tung' va bang ka tuan tuanna zaa ta'n zua pa in nei ee;
(b) Zaa ta'n zuapa in nei aw ee tong dot lun niang pa hi'ng ee.
6. (a) Naang bang ong heek mi singta aw ka paal lai ki dang lo ee;
(b) Sak duang gia bang taang hiveng ee sinlai tui bang siang hing ee.
7. (a) Ka leen lai taang ka laan lai in sing ta'n sawm ee kai lel ee;
(b) Singta' sawm a sai lelh sin thu'n ka min lawi bang thangsak ee.
8. (a) Thei bang sen in tun leh ka zua kulsinah sia zo ing ee;
(b) Sang ka gah pih ciin leh ka tuai sang cih tuang tut zo ing ee.
9. (a)Tun leh zua kulsin a taan ni'n von nih thum' nau bang kap ee;
(b)Nah sing nuai sang zawi ka kian ni'n sang tun nu nau bang kap ee.
10. (a) Ciin leh tuai tawh kil bang khang ing vaimang tongdam sang ing ee;
(b) Zaanglei donah han mawl lai-ah seino ka gual sing ing ee,
11. (a) Paak bang tawi ding ciin leh ka tuai kul sinah sia zo ing ee;
(b) Sen aangkawi leh von Thang vangin sau-phah gel cin' zo ing ee.
12. (a) Sawn cing meel hoih gual in el ven pupa khan sing lo ci ee;
(b) Pupa khan siang ka sial gel cing ka tapna ka sawn Kham Sian Cing hi ee.
13. (a) Vaimang tongdam ka san lai in ka min vui sai bang lian ee;
(b) Vuisai bang lian ka sial na'n ee sawn min Kham Za Lian ci'ng ee.
14. (a) Pupa lungdeih zaangkhen kawlciang namcih ta'nmung bang tum ee;
(b) Zaangkhen kawlciang ka zeek lai in ka sawn Kham Khen Mung hi ee.
15. (a) Kimpih ka gual ka khup na'n ee sawn min Kham Lian Khup sang ee;
(b)Phung leh gual teng khai ki sang ee sawn min Kham Khan Khai sang ee.
16. (a) Liat leh mang min ka suan nan ee sawn min Kham Lian Mang hi ee;
(b) Suasuan minthang ka tap na'n ee ka sawn Kham Lam Thang aw ee.
17. (a) Taang ka khan in mang ki sa'ng ee ka sawn Kham Khan Mang ci'ng ee;
(b) Zata' tongdot pa hi veng ee sawn min Kham Za Dong hi ee.
18. (a) Sinthu guikhau bang a nawk te'n ka siang ah tuang tung hi ee;
(b) Kimpih gual lo bang a lel te'n ka min thei bang suang hi ee.
19. (a) Zaata sinthu sut ki sa'ng ee sawn min Kham Za Sut ci'ng ee;
(b) Than leh lian mang ka sut gel cing sawn min in sial kim ing ee.
Lavui (Khupna Lunmual lasak in khai pah ding)
20. (a) Sing tawi laang ven huihkhi bang laang e taang kei laan aw a zam ziziai ee;
(b) A zam ziziai zaa ta'n lel nah ee zaa ta lel ging lawi bang thang nah ee.
A tung a, la dawng (20) a phuan mah bangin kuamah in amah bangmah cih zo lo-a, gam aading leh a gam mi, taangpi taang ta khan toh nading hanciama, na a sep laitakin a kum kum (55) cingta ahih manin l963 June kha 30 ni a kipan pensen la-a, a tawlnga ta hi.
Pensen la-a, a tawlngak nungah khua sung hausa upa kiteelna ah upa dingin a kiteel hi. Khawk uk upa ding in zong a kiteel lai hi. Tedim Myo Lawibual zat kuat satungtu tamah vua zamah vaihawm upa dingin zong kumpite in a teel hi. Tua tham loin Tedim gam Athu' Zazavuat Khungzungah zong a hihna dingin kumpite in a teel khia uh hi. Tua khungzungah a tut nak uh leh nitha K.25/- kumpite in a pia hi. Tua bangin Bo Khai Za Kham in kumpi nasepna pan tawlngak hun(pensen) a ngah hangin a pua lam pan tawlngak hun ngah thei tuan lo hi.
Tua banah Tawlazi kumpite deihna mah bangin Zinci-Hmuh lam panin: “Pu thu pa thu, taangthu tuam tuam, nopthu, dah thu, lo khawh sing puak, biakna paaina leh nungak-tangval thu tawh kisai, Tedim gam mi pupa ngeina thu laigelh kidemna-ah Bo Khai Za Kham in a khatna ngaha, kumpite in pathamah suh ci-in sum K.l50/- a pia uh hi. Tua hangin zong a min a thang, leu leu sawn sawn hi.
1963 kum March sang khakpi sungin a tapa TG Vum Khaw Thang in Zomi Tuiphum Sangpi (Zomi Baptist Academy) Tiddim a, a sangisa na sepna pan a tawp khiat na ding lai tua sang vaihawm upate tungah a pia hi. Tua-bang a, a tawp na ding lai a khiat ciangin sang nei sang vaihawm Upate TG.Vum Khaw Thang kiang ah va pai uha: “Nang, tawp ta ding cih a kizak ciangin sang naupang pawl khatte lungkia, lungleeng uha, kumpi sangpi-ah tai sawm kheukho uh cih thu ka za uh hi. Tua a hih ciangin a kum tampi zong hong hah cih ngam nawn kei ung; tu kum peuhmah sang hong honpih lai inla, hong hanciam pih lai tapeuh in,” ci-in a thum uh hi. Tua a thum uh ciangin amah zong thukkhual khat hi-a, Biakna lam zong a hahkat mahmah khat ahih manin tua kum in tua ABM Sang pi-ah a nasep a seem zom lai hi.
1964 kum April Sang khakpi ciangin tawp nading lai at leu leu a, tua sang nei sang vaihawm upate tungah a khia leu leu hi. Tua kum in sang nei upate ngam cial pha ngam nawn loin ama agetna bang lung kim takin a sang thei uha, tua kum akipan a sang sia nasepna pan a tawp suak thei ta hi.
TG. Vum Khaw Thang in 1960 pan 1964 kum, Kum (4)sung Tedim gam Tuiphum Tapidaw Sangpi (Zomi Baptist Academy, Tiddim) ah laihilh Sia nasep sung in sang naupang ukdan, khaldan, pantah dante leh lai hilh dan siam mahmah hi. A Biakna aading, a sang aa ding leh a sang naupangte khantoh nading a deihsak pha diak a hanciam pha diak sia hoih khat ahi hi. Tua ahih manin kum (4) sung tua Manglai Tan Sawm sang panin ama sang naupangte in kumpi laivuanna-ah kum sim in 85% bangin a zo khia den uh hi. Tua bang te hang in a sang naupangte in it lah it, zahtaak lah a zahtaak pah sam uh hi. A sangsia pihte uh in zong sang vai lam sangah a suan a muan pen a dot pen khat uh ahi hi. Tua bang mah in a sang nei sang vaihawm upate in zong a it, a pahtaak, a muan, a khenlah phat diak uh sia hoih mahmah khat ahi hi.
l964 kum sung in Siktaw Laikhet Sinna leh Kammal Mat Lai Sinna (Letzitu-Shorthand) Sangah kha (2) sung kah in sin a, a nam nih mah in a zo a, zawhna Letmat (Aung Lethmat) zong a nam nih mah in a ngah hi.
1965 kum Mau kha ni (l) ni a kipan Pah Pah Kah zumpi-ah khasum 40+ 1+ 50 sang in Lai-at huh (Aku sazi) min tawh kumpi nasep akipan phot hi. 1965 kum September kha in Lai-at neu Lai vuanna hong om a, a vuan leh zo ahih manin, 1965 kum September kha ni (10) ni akipan Lai-at neu (LDC) a ngah to leu leu hi.
1968/69 kum sung in TG Vum Khaw Thang in Tedim khua Manglai Tan Sawm Sangpi-ah Lungeh Ziza Nitak Sang ah a kumpi nasep tawm in tan (9) a sim a, tua kum in Lungeh Ziza Tan (9) a zo hi. Tua khit zawh a lei tung pumpi dam loh na hangin a ban a zom to zo nawn kei hi.
1973 kum ciangin TG.Vum Khaw Thang in a lawmnu Bawmkhai beh U Khup Za Nang tanu upa pen Teel Khaw Cing tawh Pasian piakna bangin ta pasal in (1) Lian Suan Mang, (2)Kham Lam Thang, (3) Nang Suan Hau, (4)Kham Dong Kim leh ta-numei in (5)Luai Lam Niang te a nei uh hi.
Tu-in TG.Vum Khaw Thang in Kungtuaizi (Township Trade) zumpi-ah Lai-at neu (LDC) za mah tawh kumpi na a seem lai hi.
TG Vum Khaw Thang sang a kai lai in kimawlna (Aakasa) lam a uk mahmah hi. A diak diak in bawlung suih lam kiva pha diak in a siam hi. Khamtung Saklam Gam Mang lai Tan Sawm Sangpi Bawlung kidemna ( INTER HIGH SCHOOL FOOTBALL TOURNAMENT) ah zong Tedim Sang pi panin kum 1957/1958 leh 1958/1959 kum kum nih ki zom a pai hi. A kum nih sung mahin a khatna (WINNERS) a ngah uh hi. Bawlung suihna tawh kisai inah NGUN MEDAL zong guk a ngah hi.


Source: Tawmging beh khang tangthu, 1973

No comments: