Tuesday, November 10, 2009

KHUADO PAWI i cih bang hiam?

Thupatna

Leitung minam khempeuhin akibanglo Pau leh Ham Nik teen Puansilh, Lai, Pawi leh Ngeina kinei kim ciat a, Ei minam aa tek, a thupi pen leh ih gamhluah ahi hi. Tua ahih manin, khangthak ten, kem in zuun in, ih puah ding ki sam hi. Zomi (Chin ) te zong leitung minamte sungah a picing minam khat ih hi hi. Kawl kumpi-in minamkhatin hong ciamtehna sungah, ih ngeina pawi dingin KHUADO PAWI hong ciaptehsak hi. Khuado Pawi pen Zomite pawilakah, a thupi pen leh Kumcin kumthak Pawi, Anlakkhit lungdam koh pawipi ahi hi. Thu dangkhat in genleng, dawi gilo kaugilo,khagilo khempeuh hawl khia in, ki siansuahna pawi leh mailam adingin thupha ngetna, thupha dawh na pawipi zong ahi hi.

Zomi ten Khuado Pawi ban ah Sialsawm Pawi, Ton leh Lam Pawi, Zunun Pawi, Sa-aih Pawi, Gal-aih Pawi, Khuai-aih Pawi, Tangza-aih Pawi cihbangin Pawi tampi kinei hi. Khuado Pawi pen Tedim kammal hi-in, Khua cih kammal leh Do cih kammalnih ki gawm hi a, Khua cih kammal pen mun, hun, Khuahun, khuazing khuavaak hun gen na in ki zang hi. Do cih kammal pen hawl khia, not khia, beng khia ahih kei a leh muak, Dawn, Vaak, Do, Hopih cihna ahi hi. Tua ahih manin KhuaDo cih kammal khiatna in khatna-ah khagilo khempeuh hawlkhia notkhia, bengkhia cihna leh, nihna ah Thupha Muak, Dawn cihna ahi hi.

Khuado Pawi pen Kawl te “Mithun Pwe” ( meivak pawi ) tawhzong kibang a, Zomi sungah zong, Haka te’n “Tho Puai” Thantlalang te’n “Thaithar puai”, Falam Laizo te’n “Fang er puai, Zangiat te’n “ Dongpi puai”, Khualsim te’n “Tho puai”, Rulbu te’n “Kuk puai” Sim leh Zahau te’n “Thaithar puai”; Matupi te’n “Cak Zoem Pwe”; Kanpatlet te’n “Nampui pwe” cihbangin lawhna min tuam tuam nei ciat hi. Tedim mite sungah zong, khuakhat leh khuakhat, ih bawldan a kibanglo omkha thei ding hi.

Khuado Pawi Bawlhun

Khuado Pawi pen anlak ( tuktun ) khitteh, a kibawl pawi hi a, nidang hunlai leh tuhun zong kibang nawn lo hi. Zomite kha sim dan;

(1) Theinosih kha

(2) Tuun kha

(3) Dota kha

(4) Dopi kha

(5) Zing kha

(6) Gam kha

(7) Taangsih kha

(8) Khuado kha

(9) Taang kha

(10) Phal kha

(11) No kha

(12) Kau kha te ahi hi.

Nidangin “Taang” kilimciin pen ahih manin, tuktung baih a, Khudo kha sungin kibawl hi, Mikang kha in August kha tawh kituak hi. Tuhun ciangin Vaimim leh Buh kilimciin ahih manin, tuktung hak zawdeuh a, Taang kha beikuan Phal kha kipatlamin kibawl hi. Mikang kha in September kha bei ahih kei leh October kha kipattawh kituak hi. Tua ahih manin, Khuado Pawi pen, ani akha te tungah ki nga hizawloin, anlakkhit (tuktun ) hun tawh kizui-in, kibawl Pawi ahi hi. Khuado pawi pen Kumpi’n October kha sungin hong ciapteh sak mah bang in, Gam tuamtuam a om, Zomite’n zong, a mau mun ciat ah Khuado Pawi bawl ciat uh cihthu kiza hi.

Pawi Kigin kholhna Leh “Sawm” Thu

Nidanglai-in Tangvalte, a zi neih masiah uh munkhat ah, giakkhawm uh a, tua mun pen “Sawm” kici hi. Khuakhat ah beh zui-in ahi zongin, khua tawh kizui-in ahi zongin, “Sawm” thum leh li om hi. “Sawm” ah, mitampi lupkhawp theih nadingin, taupi kidawh a, tua pen “Thaam(Khaam)” kici hi. Tua lai ah, makai khat om in, tuapa pen, “Thaammang(Khaammang)” kici hi. Zan ciangin, khuadamin, zanpuan a lumkhawp ding neilo uh ahih manun, lupnatau ( Thaam/Khaam ) nuai ah, meiphual cih uh hi. Meiphualcih ding sing kidong, singtom uh a, tua pen “Thaam/Khaam sing” kici hi. Thaam/Khaammang makaihna bangbangin nasemin gamta uh hi. Ih pu ih pa te’n, pilna sangpipi neilo napi, khat leh khat thu ki mangin, vaihawm makaihzia siam mahmah uh a, kipawl khawmin, thuvaihawmkhawm uh hi.

Khuado Pawi hun hong nai ciangin, “Sawm” ah nungak tangval ten, nitak simin, khuangtum, phiit lemin, lasa uh a, Khuado Pawi adingin, kigingkhol uh hi. Khuado Pawibawl ding hun hong tuntak ciangin, Hausapa te’n, upa makaiteng, kimutuahin, Khuado Pawibawl ding hun hong kikum uh hi. Sim leh Zo, anlakkhit ding hun, khualzin gamvakte, kimtheih ding hun, hunlem pen ding ngaihsunin, Khuado Pawi bawlni ding, hong khensat uh hi. Tua khit ciangin, “Taangau/Taangkopa” khua sungah, khuami khempeuh zak dingin, tang ki-au/ko sak hi. A zenzenin, Khuado Pawi ma in, anlak a zonailo a om aleh zong, khat leh khat kihuhin, kilakpih, kipuakpih uh hi. Ih pu ih pa te, Christian hilo napi, Christian nuntak zia tampi, na neikhin uh a, ki thutuak tak in na nasemkhawm uh hi.

Meilahsat Ni

Khuado Pawi ciang, meivak dingin, Taakkung panin, Taakciimte, “Meilah” sat uh hi. Tu hun bangin, meivak tuamtuam te, kineinailo ahih manin, Zomite limzat pen meivak in Meilah ahi hi. Tua ahih manin, Pawi tunma in, meivakdet dingin, meilahsat masa uh hi. Pawlkhatte bangin, Khuado ciang zatding ci-in, kum kipatcil pan, meilah a ki gingkhol bang om liang hi. Khuado Pawi tawh kisai-in, kithawi masak pen ni ahi hi.

Kaubet Ni

Kaubet ni-ih cih pen, dawigilo kaugilo leh khagilo khempeuh hawlkhiat, notkhiat, bengkhiat ni hi a, ki “Siansuahni” ahi hi. Hihni-in, Pawl omkhawmta uh hi. Pawlkhatte’n, inn ah a khawi uh khuaite hal uh a, Pawlkhatte’n, gamsunga om, khuaite sim uh hi. Khuaino pen Zomite meh lakah, mehlim mahmah khat ahi hi. Pawlkhatte’n, saphelh ( zusa phelh..ete..) awmin, pawl omkhawm uh hi.

Nitak sangam melmak hunciangin, khangnote, a “sawm” tek uh ah, kikaikhawm uh a, tua panin, “Tualteekte” innah, pai uh hi. Khuazinkhit ciangin, “Tualteekpa” in meilahsippi khat, de a, a veilamkhut ah tawi-in, a taklamkhut ah, Tuga khat tawi hi. A nungah, Thau Tawi khat, Daktal Tawi khat, Zam Tawi khat in, zui uh hi. Kaubeng dingin “Tualteekpa” hong kipan a, Tuga tawh, mimbeem taangbem teng satin, “Kau aw ciahta in, na zun na ek namsia, na ni na kha cingta hi. Manlangin ciah in” ci-in kikokawmsa in, Innsungpi pan, Kongbiang ah, Innliim ah, Innka-ah, Tuangdungah, Innkadawn atun tak ciangin, nakpi-in kiko a, “Ciahta vow!” ci-in, a Tuga tawh, Sialkong dengphei hi. Tua khit ciangin, a nungah, Thau Tawi Pa in, a thau lawn hi. “Tualteekpa” in, a meilahsip, khennih suahin, huangkongpi sak leh khang gawl tungah, alomin suang hi.

Tua khit ciangin, mipi-in, “Tualteekpa” meilahsip pan, meideciat in, kigualdiudeu a, Khua nawl muallam manawhin, pai uh hi. Khuanawl mual tun ciangin, “Gimlua tahang ei, ih meilahsip zong tumta ei, ko hong zuizo nawn kei nung ei”, ci-in, paulap tuamtuam zongin, meilahsip lomkhat cihsimloh teng, sumit uh hi. Meilahsip lomkhat pen, detsain, singdawn ah suang uh hi. Tua khit ciangin, mipite daikhipkhep in, khuazing sungah lampi zawtkhiankhian in, innlam zuanin ciah uh hi. Tua pen, a hawlkhiat kaute in, aleh zuihkik loh nading deihna ahi hi. Khuasung innsung a om, kha gilo, dawi leh kau khempeuh, Kido, Kihawlkhia, Kinotkhiain, “Kisiansuah” ni ahi hi. Christian ih hih mapek in, mitin ih muh theihloh, khagilo, dawigilo kaugilo te, tua bangin, ih Pu ih Pa te’n, nahawlkhia uh hi. Hibangin innsung khuasung na siansuah uh hi. A zingciang a, khuavak kal ding, ngak lah mahmah tek uh hi.

Ompi Ni

Phalvak tungin naupangte, ihmu thei nawnloin, thobaih uh a, sa em nadingin, khuapua lam ah, singkangtom uh hi. Thangmualdawn ah, ni hong suak a kipanin, khuasungah vok ham ki za ziahziah hi. A tamzawin, vok go uh a, pawlkhatin “Meipum” a go zong om uh hi. Meipum cih pen Sial, Bawng cihte pawl hi.“Pawlsa” pen, kumsimin, innkhatkhit innkhat ban pai-in, a khawi uh ahi hi. Sagawh ciangin, nangkhau tawh tuuk teh hamtang uh a, Papite a kiho uh ciangin “No tutung na pawlsa uh a limci hiam tuk bangzah” cih kammal pen, dotmasakin, kinei uh hi. Gentehna in, Salep hi, Tukli leh belitung hi, Tuknga leh beliphei hi, Nupi-tuk guk hi e, cih bangin kidawng kik uh hi.

Sun in, khangno pawlkhatin, nitak khuai lakna-ah, puak dingin, Zozu, innkhat lawhta, lawhneu khatta khon uh hi. Tua pen “Khuaisahzu” kici hi. Inn ah Papite’n, sa huan kawmin, zutaak kisuah uh a, Zozu khum a dawn kawmsa un, mailam nuntak khuasak ziading, kikum tangtang uh hi. Sunni hong kai ciangin, nitak annek ding kivaihawm pah hi. Banghang hiam cihleh, Ompi ni pen, si-ansiah ding leh nitak ciangin, Khuailak ding vaithupi neilai uh hi. Annek ciangin, Khanghamte,sasin,salung, sakal leh sanangkhial teng umkeu khat tawh a tuamin ki pia a, Uham, Khangham te, zahtakna upat na ahi hi. Tua bek thamlo in, Uhamte ankuang sawk masiah, khangno te’n, an kinelo hi. Christian ih hih main, Zomite ngeina sungah, Uham, Khangham, Pi leh Pu, Nu leh Pa te, zahtakzia, upatzia kineikhin lua hi. Tua bangin khatleh khat itna tawh sakibaakin, zukitulh uh hi. Nitak an nekkhit ciangin, naupangte Sangoi leh Sabaak pawlkhat tawi-in, a lawm itte tawh lamdung lamkal ah “Zawl-an” kipuak uh hi. Tua pen naupangte adingin kumkhat sungah nop asak pen hun uh ahi hi. Zomite ih naupanlai, ih neutung hun mahin zong “Zawl leh Lawm” cih athupi sak, a ki nek ngaih vauvau, a ki-it phadiakte ih hihna kilang hi. Nungakte’n zong alawmngaihte uh ahawh ding lamenin, kongvang pan khuadakdak uh a, meh leh an khentuam in, siah uh a, an nek ding ngak uh hi. Hi bang ngeina hoih tampi, Zomite sungah ih nei khinkhian hi.

An nek khit ciangin, Papi te’n, hong nusia(misi) sazian om zah tawh ki zui in, “Sanam” (Satak, Sasin, Salung, Sakal, Satuap, Sazel, etc…) Naangkhau tawh khilin, tua leh zu, niangtui, thawlkhat tawh, Si-an puak uh hi. Tua pen “Si-ansiah” kici hi. Nidang lai-in, Sanam, Zutaak, Zu-ha, leh Sathau te pua in, hanmual ah, asisate Luhawmte, anvakin, sathau kinilh sak hi. A sisate zahtakpiakna lim hi a, a maute kha in, hong thei hi cih, upna nei uh hi. Kisiansuahna lim zong ahi hi. Sihkhit nungah, nuntaakna om hi cih pen, ih Pu ih Pa te hun lai, Christian ih suak mapek in, na om khinzo hi.

Nitak khuamui ciangin, khangno khempeuh “Minam-puan” tawh kizemin, Khuaila dingin, Sawm ciat ah kikaikhawm uh hi. Kumkhat sung nungak tangval te ahoih pen ni, a Vam pen ni ahi hi. Khuaila dingin apai uh ciangin, Daktal, Zam, Khuang, Phiit, Nanglukhu nih, Khuaikhau, Zubeltungneukhat pua uh a, mimalkimin, meilah lompi khat tek leh Cimbeng sukvuisa honkhat tek pua uh hi. Pailamin, lampi ah daikhipkhep in, pai uh hi. Khuailak nading mun a tun uh ciangin mihonpi munkhatah khawl in, “Siampupa” Zubelneu leh Nanglukhu nih tawh khuaila dingin pai hi. Khuai pen mei tawh hallo, phuisamin, a khut tawh la a, khuaibu sung pan, khuaipheekhoihpen la in, Khua gamlim tawh kituakin, Sak leh Khang, Nisuah Nitumnate ciamtehin, Nanglukhu nih sungah khupin, hong paipih hi. Tua khit ciangin, mipi-in, melahsippi khat tek tawh, khuaikhau len kawmsa in, kigual diudeu in, ciah uh a,“Siampipa” masa, Daktal, Zam,Khuang, Sialki leh Phiitmutte in zomin, gualzawhna tawh innlam hongzuan uh hi.

Phiitmut kawmin, “Khuamual” hong suak uh a, mipite in meilah kuangah Cimbengvuite thehin, tezaizai sak hi. Phiitging pen ngaih mahmah in, Soprano, Tenor, Alto, Bass cihbangin, aw tuamtuam tawh zaknop mahmah hi. “Khuamual” ah innngakte in, Zutaaklim pen tawh dawn uh a, Zutaak, abanban in, kigualtulh uh hi. “Khuatual” tuntak ciangin, tawlkhatsung, Phiitmut in, laam uha, tuakhit ciangin, “Siampupa” in, “Khuaibu hong ta ni ei” ci-in, nakpi takin kiko a, mipite daikhipkhep uh hi.“Siampupa” in, Nanglukhu hongkhia in, Khuaipheek tungtawnin, kumkhatsung nuntakziading, tangko khia hi. Gentehna in, Khuaino, a pusuak a om leh, Khuadangah, atai, alal omding ci hi. Khuainosi a om aleh, tua veng ah, misi omding ci hi. Khuainobusa a om aleh, nuamsa in, ahau om ding ci-in, mailam thupiang ding genkhiatna nei hi. Zomite zong, mailam thupiang ding, a theinuam mahmah minam ih hihna kilang hi.

Tuakhit ciangin, numei leh pasal kikalhelh uh a, Phiitmut in lasa a, Sawm zui-in La kidemin, nopci mahmah uh hi. Hi bangin zanthapaai gualnuamin, Khuado Pawi bawl ziahziah uh hi. Khuadola dawng zanihval bang a omte, sa ziahziah a, ciah ding hun ciangin, tawpna la khat om in, tua asak khit uh ciangin ciahpan uh hi. Khuado Pawi pen nithum panin, kalkhatval bang, omkhawm uh hi. Sun in, Innkatau ah, Daklaam in, khangnote gualnuam uh hi. Dak pen, aw namthum om in, Soprano, Tenor leh Bass cih bangin, aw zaknop huai takin tum uh hi. Khuang leh Zam , Phiit leh Dak te tawh la-aw a tuamtuam in, tum uh a, zaknop mahmah hi. Ih Pu ih Pa te hun lai-in, amau Khuahun tawh kizui-in, Music, Lam, na khauh pai mahmah veve uh hi. Hibangin kalkhat sungbang Khuangtum, Zam tum, Sialki tum, Dak tum, Phitmut, Lasa in, Zomi Ngeina, Khuado Pawi, kumsim in nuamtakin, bawlkhawm ziahziah uh hi.

Thukhupna

Pasian hong piak’ ih ngeina pawite hangin, ih lungdam hi. Ei ut, ei teel ahilo, minam hangin, angtangin, ih ngeinate, zunin, puahin, kemcing ding hihang. “Zomi-in kei kapiang a, Zomi bangin ka nungta” cih, La a om mah bangin, ih Minam it in, Ngeinate thupi ngaihsut ding hihang. Minamkhat in, hong kiciaptehna, ih Ngeina pawi, a manthan loh nadingin, Zomi a it, U leh Nau khempeuh aw, ih Ngeinate, kepsiam ding hihang. Khuado Pawi-in, Zomi khempeuh, hong kipumkhat sak hi. Unaukhat, Innkuankhat, ih hihna hong kilangsak hi. Kampau, hong deidanlo hi. Biakna, hong deidanlo hi. Numei Pasal hong deidanlo hi. Khangmoi khangham hong deidanlo hi. Mipil mihai hong deidanlo hi. Mizawng mihau hong deidanlo hi. Beh leh phung hong deidanlo hi. Zomi khempeuh i, Ngeina Pawi ahi hi. Khuado Pawi pen, Zomite adingin, Pasian hong piak thupha lian mahmah khat ahi hi. “Ngeina in, Minam kipsak, khosak a, Ngeina in, Minam tangthubu ahi hi.” Christiante, nuntak zia hong hilh, Zo Ngeina Khuado Pawi, Zosuan vontawi, Tun leh Zua, Ciin leh Tuai aw, zuunin, puahciat ve ni.


Tawng Do Cin

No comments: