Tuesday, January 26, 2010

Indongta level a kiho cih mahmah

Zaak cimhuai sa ing. Khampi in kham ing. Anthropologist, Sociologist ahihkeh 'ist' a kici theite khat beek zong hikei mahleng ka ngaihsutna leh muhdan toh kituak kasa kei hi.
Nidanglai in a lianpen leh thupi pen khat a i neih uh Sial toh na teng ki teh hi. Mihing hinna pen a man kiteh theikei mahleh tehkakna in kizang hi.

Ka omkhakna munkhat hong genzel le'ng. Arunachal gam ah ei bang in Sial a ngai thupi mahmah uhi. A nou piangtung nasan Rs.10,000/- a mansak uhi. Zanlam in Tangnuam khua 63rd
Anniversary lopna ding in Haiciin khua a kipan in Sial nih a vakai uhi. Aman Rs.45,000/-. Sial piching khat a tawmpen in Rs.20,000/- man cihna .

Hibang in hisap ding cile hang mihing man pen thah ahihleh liau ding Sial 50 ahihmanin tuhun in Rs.10,00,000/- cihna toh kibang hi. Luangman pen a rate fixed leh kiciantak omsak ding cihna hi in ka mu kei. Mihaute'n luangman i cihpen hong pepah mawkle uh, ka 'sangam uh' hinna ka zuakkei kici ut ding hizel.Mihing hinna tehtheih leh leitheih ahikei hi. Nidang in Sial 10 ka neihlam uh ka thei kei. Singtang khua ah zong inn khat in a nei uh cih zong kaza ngei beek kei hi. Khelhna khat kia a sihna [only one sin] apat tatna ding Pasian in a tapa hilhial hong sawl kul ahihleh mihing man gen thei khang. Luang khat in luang dang khat mah poimoh hingel ding hi. Khutkhial leh kithahna toh kisai in liau-le-pan ding ka hong gelh suk deh:


  1. Khutkhial:
a) Liamtu ki-etkolna teng a seeng ding,
b) Kilemna a bawl ding,
c) Ngaidam ngetna singpi a lum ding,
d) A sih leh misi puandum in a tuam dia Sial 20 a liau ding.

  1. Tualthat:
a) Hiamkham a kici kheli nei a gou ding,
b) Misi puandum in a tuam ding,
c) Sial 50 a liau ding.

Numei-pasal kal hi in guta-lata kaal ah liau-le-pan dingte ka hong taklang kei hi. Liau ding pen va liau pah leh kipiak khitpah cih a hithei kei ding. Mihaupa’n zong a hong thah khit ciang in a Sial/sum hong pe somsom theikei hi. A process om a khu. Inndongta te boss tahtah ave. Lungkimkei leh Tribe Council um nalai. Tulai paidan in hihni I cihleh gam kivaihawmdan in mansak zomah le hang hoih in teh.

Kristianna a hong lut ciang in ngaihdamna leh kingaihdamtuahna ki thupisak in i paidan uh a dausak hi. Hih ahi kristian sahkhua hoih kasaklohna. I paidan teng hong vatmangsak!kasa mai hi ! Ngaihdamna pen nak bawl law zawzen hihang. Khelha pen khelhna hi; kingaihdamlo ding ka cihna bel hipah sam kei. Ka huat mahmah mikhat tungah va khutkhial in that leng zong insungdongta vai a kiho lel na toh hong ngaidam mawk ding uhi. A haute pen ut-le -dah in gamtang theiding bangliang sa ing. Mi i thah ut tinten pen i thah khit ciang in ut zahzah liau leng zong poi a kisa hetkei ding; i deih leh utpen hihkhin ihih manin. Ngaihdam ka mu zomah ding hi.

Nidang in liau-le-pan a ki omsak pen khelhna bawldikna/ngaihdamna ding hilo in a khamna ding a kihoih hiding in umzaw ing. Sial 20 tak liauna pen i insungdongta kia gentakloh i beh i phung in i liau kul ding hi. Tualo in liauzoh ding ahikei. I tanau laina, beh le phung tengin thuakkha ding ahihman in a khialpa maitaang nonlo ding a, a hinna mahmah zong nuamlo ding in upna nei ing. Innsung, beh leh phung lakah talo cihpen na’ mahmah ding hi. Hi banga khelhna toh kisai liau ding pen lauhhuai lua ahihman in khelh ding hong kham/dal deuh ding in mu ing. Kristian i suahnung in hih i tawndan inndongta culture pen paihkhia tuanlou ihihmanin ciimtak leh kiciantak a zuihthak leh etthak kisam kasa hi.

NB: Hiamkham a kici Violence pen prevent cihna ahi.

References:
  1. Chin Customary Law

  2. Paite Customary law

  3. Guite khang tangthu

  4. Tawmging beh khang tangthu




No comments: