Monday, January 4, 2010

Pau dangh zilna

I omna mun a pau kizangte theih kia hilo in zattheih leh siam a poimoh hi. India gam a omte a ding in Hindi na poimoh a, gamdang/mundang i cih Korea hin Japan hitaleh tuamun a pau kizangte theih a kul hi.


India ah THE OFFICIAL LANGUAGES ACT, 1963 ana om hi. Tualo in, gam laibupi, Constitution Article 120: Language to be used in Parliament leh Article 343: Official language of the Union toh kisai a genkia hilo in Official lai Hindi in gelh a poimoh hun a om hi. India danbu a ombang in sepkhiak a hihtheihna ding in State capital leh mun poimoh teng phial ah Hindi a ziltheih hi. Lamka ah zong zilna mun a om hi. Tualo in galzil theihna toh kisai ngetna Dy. Director (Sansthan) Central Hindi Training Institute, 2-A Prithvi Raj Road, New Delhi-110 011 ah kumteng in 1st May apan 20th June kikal hun in a khak theih hi. Galzilte a ding in kum khat ahih banah viva voce exam a omsak se uhi. Training laktheihte PRABODH, PRAVEEN leh PRGAYA ci in min a pia uhi. Tualo in Typing leh Steno zong a om hi. India pen Region A, B, C a sehkhen ahi a kum 2015 ma ngeingei a region teng a siam ding uh cih hunsalo in President order a hisak hial uhi.Three languages formula a cih zong na om veh aw.


All India Service i cih IAS, IPS leh Sepaih saab hi in Service khat pepeuh ah Hindi siam a poimoh hi.Kei bang a CBSE nuai a lote leh Hindi siamlo ten training neih a kul hi. Dialect i cih, Language ahilo Paite pau pass maimai kei bangte a ding in a buaihuai hi. 'Paite pau bang ahia' cih natan ka thei naikei. Lamzang pau ci leng hilo. Bukpi pau, Val pau banah Kangkap leh Songtal pau tualleng te lah na hisamlo. Dapzar pau lah hiboksilo. Paite pau om nailo, 'in the making' ci mai ni. Tuamah bangin Tedim pau i cih Sihzang pau ahikei a, Dim, Vangteh, Losau, Khuano leh Hausa pau ahi, Teizang pau zong ahi samkei hi.


Pau dangh ka zil khakna ka hong gelh ding. Computer programming languages toh bel ka hong mekmat kei ding hi.Ka Sepna terms and conditions ah kum nga sunga siam ding cih ahi. Kei mipa ana siam manlo tageet hi veng aw. Siamloh manin Annual Increment hong block ciang un heh lamlam bang a suak hi. Lah phatuam hetlo. Salah.


Hindi kizatna leh poimohna mun Delhi i cih Hindi Region/Zone A ah ka hong posting hi. Hindi ka theihdan toh amau paudan a ki bang kei khopmai. Ka sappa North Indiate hiven North East, Itanagar ah a kampau theisiamlo ahihman un ken ka 'Hindi pau theihpen' zangin thugen/trg ka piak zangzang ciang in miten man' mahmah pouh uh ei. Ka pu Mang in Hindi zong a 'bukpi pau' om ahi ana ci hial hi. Ka nu khozakna hoihlo a' bilkiang ah ka nau Biabiak toh speaker koihin a Radio a ka thugen ka ngaihkhiatsak ek lai bang ka phawk a. Tualo in ka samggampa Paul toh broken deuh in Khasi pau bang, Assamese, Nagamese leh Nepali khong a ka pau bualbual uhi. A hitaka genin ka pau fuaifuai te uh ka ngaihtuah thak ciang in jokal kasa hi.


Hindi training ding in Office in a hong sawl hi. Class lak theihna mun tampi om mahleh kei Planning Commission Building, [Hindi in Yojana Bhavan a cih uh; Hindi zangpah chat le maw] Sansad Marg ah Monday, Wednesday leh Friday pre lunch in ka hoh kauhkauh hi. Class kaima in Library ah ka lut a Magazine tuamtuam ka simkhitin class ah vatu, Ofis a lunch ne malam in Ofis kai eh virtual world ah shout kawm in nna kasem hi. Multi-tasking himai. Ka class kaipihte, ei theihdan a vaite hithou,Tamil, Bengali leh Hyderabad mi bangzah hiam ahi uhi. Tualo in Lower class ah kei bang a Manipur mi nupi khat leh Nagaland te khat zong a om uhi. State lian leh namlian ten Hindi a ngeingaihloh man un eipawl a ding in nuamtuam ana hi phiangsan hi.


Orissa ah ka omlai in a CM pa uh Naveen Patnaik mah bangin, Oriya ka theikei hi. Oriya theihngai hita. Class ka pai masak ni in teacher in hong gen/hilh bangmah ka thei sekei.Test of patience kaci maive. Amah University Professor hi zomah lai. Class kai gige ka hihman in a ni ni in ka hong theisam hi. Kuate hiam cihdan leh annnekna di khop ka thei. Melhoih tho ka hi di foreigner hong sa uh banah bahadur hong ci hetlo uh eingal ve.

Hindi level nihte Prabodh leh Praveen 6months regular course tuak hiven ka pass khitin level thumna, Pragya ka kai non hi. Exam day 29 Nov 2009 a hong tungta hi. Ka kisak in ka late khasim hi. Ka zi mundang hohna ding nei in bangtan hiam a hong zui ut hi. Gari heikhe din innnuai ah ka kumsukpah hi. Minit 5 sungin a hong kumsuk keileh taisan di himai.


Gari in kikhoh cencen, Google maps a driving route ka ciamteh ka cih hi a taibuai veve. Exam centre omna lampi/road kamuhtak in damhuai kabang. Gari koihna ding buai hita. A centre lutna kiangah gari koih, kikhoh khengal in gate a omte kiangah gari ka koihlut theidiam ka cihleh, 'haanji' ci uh. Gari heklut dia kava naih leh maijen, gari chabi a sungah kalh khumkha! A Exam center zonna dia admit card ka lakkhiat leh mobile ka khut ah ka tawikha lel hi. Spare chabi pe ding in ka innkuanpihte hong pai buai khaleh ci in keimah in kava lakkik a poimoh hi.


Exam gelh cencen. Ka Exam pihte a upa mahmah uhi. 'Kha non a pension ding ahi' a cih uh bang a om hi. A hong dot bawl ua, a question te hong simkhia in ka ci a ken a dawnna ding ka hilhtheih bang a om zeih hi.


Sentence bawl leh translation, Office noting leh Official letter cihte a hong pai hi. Gari chabi lakkik leh Police ten a kaihkhiat khak ding kia ka lungsim ah om ahihman in Leave khat ka sanction kei maive. [Ka exam question khat Leave sanction case toh kisai ahi] Autorickshaw in taitou cencen kawm in 'ann nektheih ngal din na koih un' ka ci malam hi. Dailen suak zomah. Buaina i tuah ciang in a lom a hongtung mah bang kasa taktak ahihchu. Anne khin ka kuankhe non ngal hi. Autorickshaw ka tuan in ka chabi laakpen a dik mah hia, gari khatpen chabi hikei mo ci in ka en phapha zawzen hi. Centre tung nonta. Gari ana kaikhelo uh, kipahsak in. Heklut ngal in ka Exam non ziahziah hi. Theih tawm hia gelh kin hia theikhang paikhe masa pen in ka pang hi.

31 Dec 2009 in http://rajbhasha.nic.in website ah result ka check hi. Ka min banah mark omte column by column in ka en pheiphei hi. Last column ah pass cih na om zeih. Nuam. Topper award cihte chu kahase. Ko Office ah bel i pass nakleh Honorarium a omzek. Government sepna hileh loh punna ki enjoy d hi a. Course teng pass vekta ci in kifuhsak deuh a ka omleh hicin a gelh uhi: Prabodh is an elementary course, equivalent to Primary level as regards to knowledge of Hindi is concern. Praveen is an intermediary course is equivalent to Middle level. Pragya is the final course equivalent to High School level cih ahi. A poisekei. Poimoh a cih uh 'Working knowledge in Hindi' pen 'Certificate-ly qualified in Hindi' toh kumthak 2010 zang ding ka hita. Fuhtho hilou.

Pauman kila naikei mahleh mawk pau theih ahikei. Grammatically correct leh legally true ahih kul hi. 'Midangte'n pau bang ci zil ua, nekzonna a zangthei uh hiam' cih ka theikei. Ken bel ka siamlohna ka thei deuhdeuh.

No comments: