Tuesday, March 2, 2010

TANGNUAM KHUAMI I CIH CIANGIN

~Kapsianthang [s/o Jamkhosuan, Hausa veng. Tangval kizen leh biakna ngaihsak mahmah ahi a, YWAM ah training lel ahi]

Khaw sunga piang /khawsa citciat hikei tase leh ‘Tangnuam te’ kici kammal a zak ciang in a koilai hiam khat ana kivut vil vel thei mite genna hi.

Tang kitawi lit let, gaal kidon etlawm mual nih leh haanmual zaang, suahlam ah Lanva leh Thingkangphai, Tumlam BSF camp leh Mission compound, Mallam ah Pangzawl, Simlamah Gangpimual leh Mualkoi in gawl bang a um dim diam na, gamnuam leitang a teeng ‘mithupi te’ genna hi.

Damtui lim lian ngalhat Tuinu lui luanna, ciim kilkel dum dii diai zaitha tawlnem saklui khukpi leh singta leel phak loh tongteh zatam nuai a siktui phuul handpump damtui ning bang a dawn mi zatamte genna hi.

Kawlluai gam, Routhanglian gam, Dimta’ mual, Haipi bul, Zawngtahphai, Leipi zaau, Hathoih gam, Taatlui cihte bang hi a, koimun ah om hiam cih kuamah hilh a kul sese lo mite genna hi.
Tuibuang lei siat siat manin a lungkham khawm, tuinek haksat manin a lungkham khawm, khosung lampi buannawi luat man in khedap tung ah polythene a bulh khawm nainai mite genna hi.

Tangnuam mite pen…
kuama hong zatpih theihloh kammal hoih nono aneite ihi hi: Tazensam, iau, gawp ngii ngei, chiru, ignou(va va va), igpi (hurrr), igla, mawk mahmah, ong hi mawk mah ei, ek mai sam! cihte banah kisapdan : Maichock, chaibok, lainok etc etc. a tuam neih vilvel te ihi hi.

Kithutuahna leh phattuam ngaihna a mi’ tung a leng NGEI te ihi hi. Tangnuam mi kici peuh mah Pu Mangpu leh Pu Thangmoi kua hi a, a talent uh bang hiam cih a theih kei leh Tangnuam mi hi taak lo hi.

I field kiim teng ah tu dim lii liai in ‘Tolnamen’ om ciang in fei fiit, suk fiit, to fiit, a ci khawm zai zai te ihi hi. Guah zuk ciang a dau neilo te ihi sese a, zoh kei sim leh hehpan cihte goutan a neite ihi sese sawnsawn hi.

Zomite vaphual tawh ki ciamteh a, eikhawte pen ‘GILO’ cih kammal tawh mihing ciapteh NGEI te ihi hi. Nungak nangawn hong kiheel ngam lohna khua ihi ngei hi.
Biakna tawh i khawsung lawk zo hetlo napi in Raising day/ function khat i neih ciangin khawzaang in i so ziah ziah thei zel hi. Ciamnuih leh la khel nono sathei i tamse hi.
Aneu a lian kizaahtak khuk omlo in kiciamnuih phil phel theite ngen ihi hi. Hausa ngaina leh zahtaksiam phadiak khua te ihi zel hi.

Pasian in a hut vinven, galte’ khut tawh inn khat zong a sia lo, huihsia natsia hi leeng in a nawkloh, mihai sahai, mittaw liangvai omlohna Pasian’ kep bik bek mite ihi hi.
Hong tung ding hun ah thupha/vualzawlna nak ngahlua kisa in, mite’ lak ah angtang takin
Tangnuam te kahi”cih khiat kal a ngaklah zezen ding mite ihi hi. Tangnuam te ihih lam hong kitheih ciangin zahtaakna leh lauhguukna tawh maivil kawmin hong ki hopih ta ding hi.

NA UP NAKLEH PASIAN VANGLIATNA NA MU DING HI - Johan 11:40

© Kapsianthang & 62nd Anniversary Tangnuam Souvenir Board

No comments: