Monday, June 21, 2010

MUSIC leh ka hinkhua

Music in I hinkhua hong sukha ahihman in ka hong gelhsuk mawk deh. Music ka siam leh siamloh pen gen naikei phot zawzen ni in, na simsuk phot lel in.

Missionay a hong tun ma in ei toh kituak in tumging theih leh ki pawlhlim theihna I nei uhi. Ki polh limna leh festival a nei minamte nam thupi in a ki ciamteh hi. Festival neih na ding in hun awl neih kul a, hun awl neihna ding in nek le tak kicingtak kaihkhop zoh kul hi. I tumggingte kia hilo in I tawndan leh omdante hoihtak kepbit ding ahi. Kristian ka hi I ki cihman in koihkhiat ding ahi tuan kei. Gamdang ah Theology va zilte hi in student leh mi khat peuh midangte lakah iva ki hel ciang in I hihna uh lahkhiat a hong kul zel hi. Gam khangto leh kristian a kici ten zong a khanglui vaai uh na hemkhe tuankei uhi. Missionary te hong zilsak late leh lamdan I va lah ciang in, “kou a ei vele, nou a khat beek hong lak ve' cih a kizathei zel hi.

Eipawl mi kidek te ihihman in laa I sak ciang in I deihdan tak in sakhe ngam pah lote i hi uh. Tamveipi gen in sasa leng ki ut hileh kilawm kasa hi. Hih pen nidang a cialpi hong ki bawl lai in I paidan uh paipih suak hi ngel ding hi hang. Sapte natan in la vek kikik cihte a biak kikhopna uah ahih non kei uhi. A la thu I deihna leh hong khoih khakdan toh kisai pen thutuam in koih le hang.

Laa I hong zil a, Keyboard hoihpen, a features I zatkhak ngeiloh di neite tanpha bang I lei zawzen hi. CD bawl chu I next step himai. Lapawl, Quartet, Trio, Duet, mimal leh tumging toh thuah a kidemna a thang' mahmah hi. Kei zong quartet ah khatvei ka pangkha ngei hi. A kum 1999 ahi. A mun Bungmual Tuailai, eh KTP khawmpi ah. Ka zawlpa, Kamzalian in a Soprano, Ka U Ginglianthang in Tenor, Tunlianpau in Bass, leh kei ka aw a zattheihna leh a fuhna mun tak 'alto' ka hong sa uhi. Aw dang in ka sak ciang in buaizak zel cih va gensau dah mai ni.

A kha, a kaal leh ni bangzah hiamtak lazil in a kibuai hi. Namdang Solfa siam ngen toh I lazildan uh a kibang kei khop mai. Khatvei lazilna ah ka pang hi. Kou panmun ciat ah khatvei kasa khom ua, khatvei sa thak ni a hong ci ua, laa ka zil khin mai uhi. Lazilna a thasen pammaih cih di a om kei mongmong! Solfa ettheih d mah hi cih ngaihdan ka neihloh ve.

Ka quartet sak uh ka hong sunzom deh. Zan nitak, a kipat nitak in special number ka present na uah ka zawlpa'n a aw sawikhial ahidiam kidemna ah a awi fuh theikei hi. Kei la chu hahpan himai. Tenor hilo, Alto sa pan a key sanglua baanlo hi thepthup zel ing ei! Sa khial. Pan thak zel. Fuh thei mahmah lo. Kou a zawlpa toh speck bulhtuak a nawl ah ka dingh ua a saanna mun kasak ciang un ka kientuah derder uhi. Ka fans [mipi] ten nalh salua zaw hi d hong hih zuazua uhi. Lasak toh kisai in star ka kai top a bang. Miteng in hong theihloh. Ka lasak uh zaw saanglua ahi ding. Zumna chu ka nei hetkei uh. Nervous cihte a om hetkei. Ka nungzang a hong zausuk hiauhiau khat a om hi. Ka sakkhit un tutna ah ka tut toh kituak in lungme bang a hong zausuk pen ka khoihleh kho-ul ahi phiangsan hi. La nakpi a sakman in kho-ul luang thei mah ahi cih thei ka hih manin midang kho-ul kaai zen a lasate ka muh ciang in, ' hithei mah hi' cih ngaihdan toh ka theisiam hi.

Guitar leh music instrument teng ka tum theihdan Stephen Khualno toh a kibang geih. Ka tum ciang in laa salo, laa kasak ciang in music ka tum kei geih hi. Music toh kichotuah lo chu kahi peuhmah uh. Shillong ka omlai in Guitar leiding in a hong sawl zel uhi. Bangzah hiam tak leikhiatna ahi. Leisiam chu kahi peuhmah ding (uh). Guitar tumsiam deuh D L Muon in a key a dikthei na hia cih lampang a en a, Kamlunmang in a tumnop hiam cih a etkhit in ken a body structure lampang ah 'pass ei' ka cih ngeingei leh leikhiat ahimai. Solfa toh kisai bel tonic a cihte uh 'daw' I cih bang tan a niamsak dia 'fa' I cih bangtan a sansak ding cihte theilo kia hilo in a sandan lunggeel lo ka hi mai. Staff notation a kigelhte a suk a tou in kigelh ahihman in ka ensiam mahmah lel; mi toh I sakkhop nakleh. A beat kinlua a cihciang un bang gen ahi de aw cin ka buai hi. Beat I cihciang in a gindan style ahi a, a kin leh ze-oldan pen tempo kici ahihdan in ka thei hi. Banah Tenor hilo in Alto sa zolo pan chu theihkhiat khat ka nei; pasal ten alto asak ciang in octave khat a sangzaw a sak ngai ahihman in sa banlo ka hi phiangsan hi.

Ka Lenkhop masak ni, Tangval lakthak ka hih tuunglai ahi. Kun den ka himai. La kisa te gen kikkik uh hiven buaipih tuam deuh ka nei hi. Laakhat a tangpi in minit 5 kisa ahihleh dak 730 tan lenkhopna din laa 7 kisa manlai in teh cih khong kana hisap maimai hi. Hithei hileh si lenkhop bang a pii ni Nupi papi teng lengkhom lel uh henla, a tawpni Tuailaite makaihna in la tualleng leh lapawl hoih deuhdeuh I theih ciat uh sa in la zilna lah hikawm sim in sakhom le hang hoih ding in um ing. La kisate record sak ding in a inntekte present geih ding cih ngaihdan ka nei hi.

No comments: