Friday, July 16, 2010

Lamka khopi leh Football game

World cup a hong bei leh football toh kisai daaiduak zawzen a bang hi. A sutzopna dan in Lamka khopi a football toh kisai ka theihkhak na ciangciang ka hong gelhsuk mawk hi. A pekkha leh a kimawlkha hikei mahleng gen ding bangzah hiamtak ka theih a om hi.

Ei Zomite zong football lamah I na maimai samkei uhi. Saisek leh puanlom pek in I kipan a, a hun theihna din puansia khat haal in a kattum matan kipek ding cih paidan ahi. Saisek ahihleh bel a siat matan pek d cih ahimai. Khatvei khota khat ah saisek a pek uleh saisek teng bei, kum non saisek gah ciah sutzop din a kholphot mai uh cih ahi.

A pekna mun ding field/lentual hoihtak neih a haksa mahmah hi. Khokhat ah a field uh maanlo tak zaw ahi ding. A goal tuak kimu, a lai kuak ah ball kituh uh, goal khum dia pek touh ek ngai hial dan hi in maw. Buainoi lak a pek ngaina mun football ground, adiak in Tangnuam kho field ahi. Thagum neilo ten a pek/pang zou sekei. Lamka ground ah zong buainawi a om ciang in Hmarte lo midangte buannawi lakah a che zoukei uhi. Tangnuam te mah bang a taima a nasem, zanglo kaikha ngen ahihman uh ahi. New Lamka Vengnuam ten zong football field hong nei ua 'mantep stadium' cih a suak maive. Bangziak a hibang min nei a hia cih gen a ngai kei. Khatvei cup a suah uhi. A goal khuam ding in Tangnuam ten gua thoh in entry fee a map uhi. A thu omlo a complain theih cih hunlai ahihman in a zohloh ziak un a complain ta uhi. Khotualte utlo. Cihleh goal khuam pokhe dia kisa geihlel. Pansak/ hinsak mai ngai.

Nidang in ball hong kipek taktak ciang un in a sanglam ah pek hathat te bang numei ten a star top mai uhi. Hun hong pailiam in a sang pekte, “hmeichhe lawmzawng'” cih in a om daihta. Goal hunkhoptak khum khit ciang in 'saikot pan' geih. Saikot pan I cih pen hun beina dia OUT (oot ahk wei a kici) lamah pekkhe geihgeih lel.

Tangnuam khua apat in star player Mangpu leh Thangmoi toh kisai tampi in I thei ding hi. Tulai mite'n bel I thei kha kei dia gendah mai ni; tangthu kumlui banglel ding ahihman in. Pu Thangmoi bel qualified pen ahihman in Lamka mawltual ah vaihawmna sangpen nei in sawt kuamtak sukfiit toufiit na nna a sepkhit in a khawlta. Ama nasepna panpih ding in Field Marshall, Robert Ngaihte in OUT cih kigelh toh line sung a dianglut hial a ente hong nohkhe taktak bangzaw aw, ball pek a paihoih tuam mahmah ve.

Goal ngak a pangjel Muzut ahi. Hangsan mahmah, boh vutvut ngam khat ahi. Ball bang a matkhak ciang in spin kawm in a tat chatchat jel hi. Khatvei a naupa'n back pass a bawl leh style tah a a ball lei ah kikhuk pen a na boh zezaw hi. A ball luangsuak hiau in GOAL cih ahita mai hi. A naupa hehlua kisa a gen didan dang omlo.

Full back I cih Defender a pang. Offiside pe fuhlo. Ball a hong carry pa khekop a boh threps. Khemkhiat a om. Hehlua. ' Eh vial oh' cih toh delh thuah cencen. Hausapu hat himai. Midang ten lautop ahihman un a mintaktak a gen ngamlo. U u citop. Aman ball a pek dek teng in hualam ah ka pekdek ci hi awmtak in German salute dan in khut langkhat zaktou zenzan.

Khatvei ball kituhna ah a siam mahmah pa'n a siakkuak in a hong huikhe geih hi. A Ball boot bang savun taktak ahihman in bangtan hiam diahnip toh a Carry cencen hi. Goal sut dia a pek dekleh a half pant tolh.

Skul level a kidemna a hong thang mahmah hi. Ka behpa khat in a naupang kimawlte a thuhilhna ah, 'mei-am sikha bang in na tai kei ding uh' cih ahi. Ebenezer skul ah Sir Khamvum panlai in ball pek a nasa mahmah hi. Teacher vs student hi pahpah mai. Class cancel hial in kimawlna neih ahizel hi. Peon a pang Thangngaihlian a goalkeeper ahi jel hi. A goal zawl ah hong kiluai gaigai jel a, warm up na din hon kiban phei zatzat jel hi. Khatvei goal hong shot uleh aman goal zawl a kikhai kawm in ana pek khe geih lel hi. Fantastic cih loh gen di dang a om kei. Hidanciah in World Cup kidemna natan ah a zang thei nai kei uh. Sir Khamvum ahihleh ball pek lunglut lua Teacher ten a zohkei simleh mai-eng sim zen in a hong heh jel hi. Student te a dia amah va boh a tutkhiat teitei d lah nuam ciahlo.

Peksiam kia I gengen mawk a goal ngaksiam Chalkhum zong Lamka khua ah LSC min in pangjel a a minthang mahmah. Ball dive cih khong a siam lamtak ahi. Goal ngak bel siammah ei a hangsan kei a hiven cih ahi. Ball pekna ah hangsanna ana poimoh eive maw? Ball I tuhkhiat theihna ding in mi boh ngam ngai hivaw. I tuhkhiat zoh keileh a ngaltak a guk a peksak d cih tactic ahimai. Peknat kia hilo in cin a guk a sik geih, su geih cihte eipawl zat masak hi tuanlo in World cup kimawlna ah a hong zang uhi. Ka pumang pen mi' siak pek natsak cihte a siam lamtak ahi a, a guk a suk leh sik cihte Hangzacin siamlam tak ahi jel hi. Khatvei taget lah Hangzacin in ball pek kawm a laizial guthei khat hi ven Sir Thanglianding a laizial in va bi kha laizang... Bungmual te goal ngak hanhatpa cih khong zong na om hi. A phamta Thangchinlian ahi. A omna mun a pan a lawmte hankhum gamgam mai a sam ve. Khamdolian siam/hatdan leh hehbaih dan ka 'miss out' dek ve. A ball pek teng a a Pa'n va en gige cihtoh. Tangnuamten gitlohna a tawpsan uleh Bungmual te hong kipan uh cih d lah ahituan kei a. Zohkei simleh hehpan, vaw suk geih zomah lai. Hagaga...

Under five feet cih a hong thang hi. Tat/pan theihna ding a guk a khawng kigak pawl bang duaisanlo. Khatpa lah zeilaw mahmah kigak selo, kun kheukheu a hong pai. A hici mawngmawng kahi kici. Ta geih. Thudang khat ah Vuahnuai a ball pek a nopdan a theilote hilh dah mai ni.

Nengkhanlian @Nengpi pen ball peksiam leh hat mahmah a thuah hi. Phutzoh vualloh leh tuhkhiat haksa mahmah khat ahi. 1997 buailai in kaplup ahihtoh kiton in a football career bei ahita. Suun thu ka puang. Bungmual a Pu Phungzapau tapa zong hong lar man mahmah hi. Tualo in Khenthang leh Khanthang cih te a hong lar tou ua, Club hoih in a la a hampha kasa mahmah. Delhi khopi ah kum teng in Tamchon Trophy kituhna a hong om toh kiton in SSPP FC cih a hong dingkhia hi. Mibang zah hiam te siamna theihkhak leh Club hoih deuhten a book na uh hong hihloh ding deihhuai kasa mahmah.

Ball peksiam ahihhang in Club in a lakkhakloh eite lak ah bangzah hiam I nei uh. Tua bang a ka theih khak mikhat ka skul kailai a ka lawmpa hi. Zing leh nitak in ball pekden khat ahi. SAI te camp khong ah lut jel a District leh State ai-oh in a kuan jel hi. Skul ah ka pek khop ciang un ball kituh kawm in khe a ki block cihte ka thangsak mahmah uh. Kawng a ki tat geih cih khong ka cindan uh ahi. Aman bel numei hong paite pekkhum a thansak mahmah dangkhat ahi. Ki hazatna ziak khong mah hilo dia a tun d tan a tunkhak lohna. Amah Lamka foot ball field gei a teeng Lalchin ahi.

Final ni ciang in memorial shield te toh kisai a tangthu bangtan hiam ning deuh in ngaihkhiat a ngai hi. Gangpimual ten shield a piakkhiat dekteng a a gen uh om hivaw, ' melhemna hem' cih ahi. Cih bel a shield in siatna leh melhemna a neihkhak leh a hi bangbang a ditkik ding cihna hi. Rolling trophy (shield) ahi tangpi hi. [Trophy a omma in cup leh shield cih ahi tangpi hi ]. Thumvei ahk ngavei lazom a omleh a tangh ding cih ahi deuh hi. A neitu ten tankhe thei cih condition ahi zomah lai hi. Cup a kilak ciang in mi cihdan in, ' kristian pawl'....'hi pi pi phuray' a kici nainai jel hi. A omdantak bel, 'three cheers for ' cih pen a club min a zom in, ' hip hip hurray' cihna ana hi dan ai. . Champion hihna lak ahihciang in Cup lop in a zui ngal hi. Cup lop thang mahmah ahihman in khatvei cup lopna ah ka pangkha hi. Cup tam kila mahmahta hin teh a cup mahmah nou a zang in theitui 'manifru' ngat ka dawn uhi.

Khatvei tei Zomi ten I sunmang beek in World cup ah va pangkha kia hilo in, Champion hihna la din kikoih ni maw.



No comments: