Wednesday, October 6, 2010

NAUMIN PHUAHNA A THUGEN

Tuni hibang a hun hoihtak hong musak kia hilo in tapa min phuah na dia thupha hong pia I biak Pasian tungah lungdam thu ka gen masa hi. Ban ah innkuan, tanau laina te, lawm leh gualte kou kipahna ah na hong kipahpih man un 'ka lung dam in ka lung khempeuh a dam hi'. Hiteng ban ah ka team te; nu pen Guwahati a pat hong kuan vengveng, Biakthang hi in Ngaihlun ten feltak a inn na hong sepsak. A diak in ka gen ut Ching hahpanna ahi. Amah Foreign apan hong kuan. Hong kuan kia hilo in ko hong khual man in kuankik nailo zawzen ahi. Hospital ka omlai un 'gum om' ek mai kahi uhi. Inn lam a pat ann kipuaksak cihte hih vetlo. Canteen ah khatvei neekpih. A pawlam ah khatvei 'thali' vala. Tualo in ann ngawl pih simsim a ompih ek maidan kahi. Hibang a mun leh thil omdan toh kituak leh theisiamtak a hong thuakpihna ah zahtakhuai kasak kia hilo in thupi zong sa ing.

Nau neihna toh kisai:

Thohlehni 28 Sept in doctor nu muh ding cih ahi. Hitamahleh ka tanu uh Muankim hong damlo; khuh leh cisa ahihman in doctor pa kiang ah kava zingtai uhi. Hospital dak 10 a tun ding pen dak 11 lak in ka tung pan uhi. Doctor nu'n buaina dang nei ahihman in hong lemtang kawikawi hi. A poimoh teng sai neuhneuh in dak 1pm in waiting room ah ka lut ta uhi. Bangmah hih pahlo ahihman un inn ah ka giaksan mai uhi. Mobile phone khat a guk in tawisak ua, call tengteng Ching' phone ah divert din set, vibration mode a koih, msg bel received thei, call bawl thei in ka set uhi.

Zingsang baihtak in ka taisuk uhi. 6.40 lak in induction a pan ua dak 10am lak in hong sam uhi. 'Ceaserean hih ngai ding' cih ahihman in suai ka kai hi. 10.30am a lut pen 11am lak in hong sam non ua. Nau nei khinta, A nu leh nau hoih uh cih kia a hong theisak uhi. Bangtan hiam khit in a naungek hong pomkhia ua, nursery tan hong zuisak uhi. A lutpih dek in hong lak a, 'en in numei hia pasal'? cih hong dot khit un a kemta uhi. Pasal ahihman in tapa nei ka hita hi. Kipahhuai diak khol a bang.

Maban ah zong note'n na hong makaih ua, na hong hilhtoh jel ding uh hong ngen ing. Tulai pau leh ' laisiam nupa' hile ung zong takepna toh kisai kisimkhalo, theilo hetlo ka hi uh. No a palsuak khinte mah in na hong hilh ua na hong pattah kei uleh picing zolo ding hi ung. Ta neih kia hilo in hoihtak a etkoltoh pen poimoh zaw tham ahihna ah. Hizah toh hunsak phot ning. Ka zi Ngaihlian in gen ut a neihleh ka hong angkhak deh...


Nau min pen a pu kitamhsak in Kaimung>Mungsuan ka phuak uhi.
Khiatna:
1. I biak Pasian pen belhtak leh SUANhuai ahihna genlatna ahi.
2. Naungek' pi leh pu hi in a nu leh pate pen SUANhuai ahihna genna.
3. Deihna bulpi pen ahihleh naupang pen midangte a ding in SUANtaak a hong hih ding ahi.


No comments: