Tuesday, November 9, 2010

Lauhuai maw Pilvanhuai ?!

Tuhun pen i theihna uh kikim phial hita ahihman in kampau kidop kul mahmah hi. A diklo leh dik simlel vagen pen lauhhuai thei hi. Tuamah bang in zohthohthu leh thatang a ki ngohhih ding zong ahi non kei hi. Na gamtat ana thei kiukiau khat in genkhe thei ahihna ah mi tungah pilvan poimoh ahita. Thu hoihlo khat kia ziak in maban bing thei ahihman in pilvan ding thupi hi.Minsiatna I cihpen va bawldikpah theihloh leh va leitheih hilo ahihman in pilvanhuai diak hi. Sumhaute leh thunei ten I hihna zatkhelh man in mite hamsiatna tuah theih hi. Hamsiatna I cihpen a khang a khang in bangtan hiam thuak theih ahi.

Hihkhial pen hihkhial ahih bang in diklo pen diklo ahi. Gen siam thu a dik kik thei ding ahikei hi. Ka thugelh hi in ka kampau toh kisai a dik ahih nak leh vauna laikhak, email leh phone call muh ding lau kei ing. Ka muhdan tak mah gelh/gen khe ka hihman in hong bawlse dingte a ding in ka leh lauhuaizaw hi. Va kamtam leh uang gen leng kei a ding in bel apoi ding hi. Ka vei leh puaknat ka gelhte hong ki suahsak ut keileh zong mundang ah a suahkhiat theih veve hi. I gamtat gentakloh I kampau/thugelh lel in zong mi sihna ding tun thei hi.

Zanlam in I nam sepaih I cihten mikhat a hong satlum jel uhi. Nam sepaih I cih ten a tung ua thuneizawte deihdan zui a gamtang ahi uhi. Makai, worker leh thunei I cihten ‘gam a dia sem’ kici le uh zong a bang/kua dang a dia seem hilo in mipite a dia seem ahi uhi. Mipite vaang a hing ahi ua, mipite deihdan a a sep ding uh ahi. Cihnopna in ah thuneihna sangpen mipite khutah om cihna ahimai hi. Mipite zong worker te tungah kipahdan I siam ua zatdan I siam ding kisam hi. Khat vaang a khat hing te I hihman in pankhom siam ding hipen mai hi; ki gimneih leh kigaal bawl ding ahi non hetkei. Lauhuai ciat ihihman un pilvangtak a kampau leh gamtat ciat ding ahi.

No comments: