Thursday, December 2, 2010

Zo minphuah leh gelhdan

[Hih ka thugelh na ah min ka lohkhakte pen selphona leh personal attack hilo a, ka gen sawmpen a kichetsemna ding a zat ahilel]
Zomite min pen khiatnanei leh omze neitak a phuah leh piak I hi. Khanggui simna in kizang thei kia hilo in I min pansan in kua' tu kua' ta I hiam cih suut theih hi. I min in I hihna hong taklang a, ei deihbang leh hoihsak bang a mawk khengtheih ahikei. LST ah nidanglai apat in adiak in mihing leh mun minten a khiatna hoihtak nei ahi cih I mu thei hi. Tua ahihman in min pen mikhat I hihna gen a a kiciantak neih kisam mahmah hi.
Sing leh ganhing ban ah nna teng min pen mihingte mah in I phuak leh piak ahi. Min phuahdan ci tuamtuam a om. Tulai a cindan khat ahihleh, a pa leh nute lam a minte gawmkhom in tate min kiphuak hi. Unau teng min gawmkhop in zong kiphuak omta hi. Hibang ahihna ah I tate'n min dukdak a nei kei ua, khiatna kiciantak min a neikhalo abang uhi. Min pen ei aituam ahihman in a kiciantak a phuah ding thupi hi. Khangluite in naumin aphuah ciangin, abeisa hun-a apu apate khan kilangsak hi.Nidang in min thupi lua kiphuak ngamlo a, a zawngkhal te bang a min paw zolo hi cih ngaihdan kinei hi.

Phuahdan dangkhat ah a pasal leh numei lamte hawm bawl a upa pen ta pasal masa kia in a pu a tamhkha hi. A sanggam dang te tate'n min pen a uzawte'n a phuak ua, kikhil diudeu in a om hi. Kei ngaihsut na ah ta masa teng pen a pu leh a pi mah in phuak leh hoihsa ing; a diak in tapa te. Hibang ka gen ciang in unau Kuki te phuahdan bel hisam kei leh; ta pasal tengteng a pu in phuak, ta numei tengteng a pi in phuak, thusia a omma teng. Tapa masa teng pu in a phuah ding ka cih ka deihna in, Tousa I goh khit ciang in innkuan tuam leh mituam hi deuhta a, khanggui hoihtak a ki suut theihna ding in tapa masa teng a pu [ a pa' pa] mah in a phuak ding hoih hi.

Nidang in naumin phuahni ciangin, innsung a upa pen in tuiphih in min apna kinei hi. Nau min phuahna ak gawh en in, naungek mailam ding a genkhol uhi. Tuabang in Lawki te'n [ Kristian lote genna ahi] tuiphih lohin naumin phuaklo uh ahihleh ei Kristian ihih toh kiton in nau minphuah ni beek in apna khat nei sese leng lungkim huai deuh hi.
Min phuah kia hilo in a gelhdan mahmah zong kiciantak neih poimoh hi. Min gelhdan pen I nam a ding in eimi teng in a kician khat, i ngeina dan a neihtheih ding, banah min tamtu te deihna tawh kikalh lo ding neih a poimoh hi.
Internet hong om toh kiton in minkhem (nick name) hong thang mahmah hi. email ID leh chatroom a zat ding in nick neih pen hong thang mahmah mawk hi. Pa leh ta ahk unau bang chatroom ah midang bang in ki chat khak theih hun a om hi. Email ID toh hih kua a cih theih zoh ding haksa mahmah hi. Kaam awng khawng I fill up ciang in mail ID piak kul ahihman in email ID ei min mahmah a neih a poimoh hi. A tuung a pat in ei min mah toh email ID/account hong le hang hoih pen hi. Tua bang hi keileh email ID tampi neih kul banah password bang mangngilh khak theih ahihman in a diktak khat nei giugeu le hang hoih pen hi. I mintak a laktheih non kei leh behmin toh koih ding hoih hi. Mintak gelh ngamlote pen mi dawilok va cih ding lah hikei in, a gen didan thei ke'ng.
Nam leh gam a tuam dungzui in min gelhdan tuamtuam a om hi. China ten a min uh hibang in na gelh hi: Surname, Generation name, given name. Korea ten bel Family name, Given name. English, Japanese, North Indians Hindu leh Thai ten min a gelh ciang un Given name, Surname ci in gelh uhi. South India ten bel Given name, Father's given name in na gelh leuleu uhi. Sikh ten bel numei a ding in 'Kaur' leh pasal te a ding in 'Singh' na koih uhi. Hibang in zong a gelh jel uhi-Given name, surname, Place name.
Zomite'n I tenna mun ua minam te gelhdan zui in min kigelh hi. Manipur a om ten Meitei te mingelh dan in behmin (surname) lamtom min mai ah koih uhi. Kawlgam a om Zomite'n zong Kawlgam a om minam te min gelhdan zui in pasal te min mai ah "Tang or Salai" koih a numei te min mai ah "Lia or Mai" koih uhi. Unau Mizo te'n numei te mintawpna ah "i" koih in, pasal te min tawpna ah "a" koih uhi. Numei leh pasal min kibang omthei ahihna ah khentel theihna suak ahihman in kizen mahmah hi.
I unau Myanmar lam a ten min a gelhciang un a beu beu in a gelh diak uhi. Kei min pen Kam Za Lian in ki gelh ding hi. I min phuak pa'n bel ama min tawpna pen hong piak hita ven, a dangte toh gelh khawm geih le hang hoih kasa hi. I min tang thumte English te a bang in first, middle leh last (sur) name ahi zenzen kei hi. I behminte uh zong hong suantu pu-pii min ahihman in I behmin te uh Tungnung, Tonsing, Kopsiam cihte hibang in; Tung Nung, Ton Sing, Kop Siam kigelhlo ahi cih ngaihsut ding kisam hi.

Gelhdan tuam khat ah beu nih phasak hi. A phuakpa min tawpna leh a piak min. Tua bang in kei min gelh ding hileng Kam Zalian chi in ka gelh kul hi. A petu/ phuak tu in a bul ding a piakkhit hinapi nanga/ama ahi ci deuh in a dang toh gawmkhop utlohna toh kibang kasa hi.
Mizo leh Manipur a omten min i gelh ciang un a kizom in min beu thum/nih teng ki gelh khom hi. I min beu thum/ nihte pen a kigawmkhop ciang in min khiatna diktak piang thei pan ahihman in gelh khop ding hi ci ing. Tuhun in i gelhkhop pen i behmin in zui leh hoih zomah ding hi.
Thukhatah midang ten ka mintaktak a theihloh ding lauhuai sa zaw ing. T. Kamzalian ci in ka gelh hi. Ai'hang T in Tomging, Tangpua, Tonsing, Tungnung ahk bang cihna a hia cih pen mite buaina hithei hi. Tua ahihman in behmin pen a sau a gelh hoih kasata hi. M Tangpua pen kua hi ding hiam cih theihbut ahi kei hi. Na theih mahmah na lawmpa na hikha thei hi. Ki sapdan zong I theih kei leh ki dot tuak thu khat hi. Kei bang zong Kam toh hong kisam deuh hi. Pawl khat a theilo ten Lian cih peuh in hongsam uhi.
Nidang in Zomi ahk Paite cih peuh toh min ki gelh thei hi. Milip tam deuh ihihman in I neu paisuksuk ngaita hi. Hih pen nang leh kei a bang min nei tamta ahihman in a kul hong suakta hi. Cihnopna in ah Mang Zomi> Mang Paite> Mang Guite> Mang Sianthuam, Mangzou, Hauzel cih bang in ki gelh ta hi.Unau Chin state a te'n bel a khomin utoh gen phei zel uhi. Tu laitakin pu leh pa te'n tate min ah amau min va koih ding hoih leh kul kasa nai kei hi.
Min phuandan mumal neilo Kawl ten zong English te minpiak te deihlo ahihman in ei, Zomi min phuahdan kiciantak a nei te'n English min va deih masak ding ahi kei hi. English min neih pen buaihuai thei hi. Khatvei ka pute khat a sih in kava gaal hi. Amau bel Catholic te hiven, a pasta (Father) in hun hong zat ciang in a misi ka pu pen John toh hong lou den hi. Ka pu sihni in a min thei pan ka hihman un ka u toh a nuingam lah omlo in ka ki-en giaugiau lel uhi.
I minte uh zong I gelh ciang in hoihtak leh kiciantak in gelh ding hihang. eg. Suan bang Swan cilo ding. Tua bang mah in Lian pen Lyan, Khup pen Khoop or Qoop, Tonsing zong Tonxing leh Samte pen Xamte in gelhloh ding ahi. Mi nam khat I hihna I minte apan in genkhiat theih ahihlam mangngilh kei ni. Zomite gamdang pai kitamta hi. Gam 41 ah ki om leh thehzak ta hi hang. Tua ahihman in I zo min pen zat ding a lemtang kei leh zong I behmin bek gelh teitei le hang hoih sa ing.
I zo min neihte uh ki cing mahmah lai lel hi. Ka theihna tan ah Zomi te'n min ding in kammal 196 kinei hi. Bangzah hiam zat ahi non kei hi. Esn Thon, Vat, Ciang etc. Tua bang in bangzah hiam mah I laklut uh a omta hi. Esn Rou, Ram, Chhung etc. Minmal pen numei a deuh banzah hiam om a pasal a deuh mah bangzah hiam a om hi. I min uh mal thum pha ci le hang I minmal neihte u toh 7.4 million kiphuak thei ding hi. Tuhun in malnih pen behmin toh gelh kilawm ahihman in hong thang non hi. Mal nih nei min 38 thousand lam kiphuak thei hi. Churachandpur ah mihing 0.23 million bang ahi a, UN record na ah ZOMI [Chin] Myanmar a omte 1.5 million pha kici hi. Khang khat pen kum 80 in tuat le hang min I zatding khop ki phuak thei cihna hi. Mundang a Zomi omteng I simkhak loh teng pen CCPur leh Chin State a omte eimi kia hilo ding ahihman in a mihing omteng eimi ding in koih phot le hang zong minphuah ding bel ki cing lai sam hi.
Tua banah behmin koih loh zawzen pen I min phuah theih in ciangtan nei ahihna leh mituam I hihna I behmin in genkhe thei hi. Kei bang in zong behmin va gelh ngaina khollo ka hihhang in ka gelh hong kulta hi. Ka khosung uah kei min toh kibang mi khat a om kia hilo in behmin hong kibang sawnsawn hi. Ka behmin toh ka min gelh geih hileng laikhak poimoh bangzah hiam ama kiangah va tung masa lou mah ding hiven, ka ci lel hi. Pawlkhat ten min a gelh ciang in Son K Tombing ahk Mercy Kim Tombing cih bang in a gelh uhi. A sapna ding pen gelh khe geihlel un ahihna ah ki lawm leh dikmoh kasa kei hi. A buaihuaina ahihleh bel khang sutna ah ahilel. A mintak theilo ten a suut thei kei ding. Min mal thum pen sau vasak luat na ding om kasa kei hi. Tuate zong behmin toh gelh lai le hang sau lua sam kei e;leitung ah min sau mahmah te ngaihsun in. Min kiciantak a I gelh theihna ding in i minphuah ah kinga hi. Thang Joseph cih bang in min kiphuakta hi. Amah tan in a poina om kei. Thang Joseph Tonsing cihbang in gelh thei ding ahihna ah. Ai'hhang in bang ci'n aman min a puak diam cih bel ka guuk buaina khat ahi. Tuadan bang in Vung Mary in zomin koicin a phuak diam mo? Minphuahdan leh gelhdan in thu na paw mahmah ei maw!

References:
1. Laisiangtho.
2. Tual Khan Suan, Min gelh zia kikupna
3. Tg. Suang Dal, Zolai gelhzia pawlkhat.
4. Taang Zomi, In How Many Countries Do Zomis Live?
5. Census of India, 2001
6. Dr Tualchin Neihsial, Lai gelhdan tangpi.
7. Thang Siangh, Pupa Ngeina Zukholh.
8. Gin Khan Nang, Min gelhzia, (submitted to zomibaptist.com on 15.04.2009)
9. S. Ngulzadal, Mih leh a khiatna, Siamsil tongsan, PLS, Lamka Manipur, 2000.
10. Myanmar site: http://www.myanmar.com/people/chin.html
11. Tual Khan Suan, Kawlgam sungah minam tanh kikim na ding leh Zomi.
12. Gin Khan Nang, Statistics on Zomi.
13. T. Kamzalian, Innkuan min phuahdan, Oct 2008.
14. Guite Khangthu, Published by Raja Goukhothang Memorial Trust, 2008
15. T. Kamzalian, Zo min gelh dan, 62nd Anniversary of Tangnuam Souvenir magazine, 2008

No comments: