Tuesday, March 22, 2011

Laisimna leh nekzonna

Tangnuam khosung weekly news, "TAZENSAM" adia ka gelh ahi. Pawl X, XI leh XII exam te khualna a ka gelh ahi:

Laisimna leh nekzonna

I hinna ding in nek leh tak poimoh a, nek leh tak i zonna ding in pilna mah kisam hi. Pil i neihna ding in laisim kul a, Laibu ah pilna ki gelh leh ki ciamteh ahihman in sim le hang ki pilloh thei hi.

Laisim pen thadah bawl thei hihang. Azatna ding i theihloh man hi in mu ing. Ka hinna ding, ka nekmuhna ding leh ka pilna ding ahi ci in theile hang phatuam ding hi. Laisim ding ciang in nang leh na maban a dia phatuam lo thudang ki hihbuaisak leh va ban hih sese ken. Na hun zatdan encian in. Ihmut suak zong ci seselo in pang ni. Pawlkhat te’n Ihmut i khamloh ding lau hi le hang kilawm hi. A kulkal leh tha-it mahmah te'n a ihmut khak ding lau zawsop uhi. Ihmut khamloh man in a si om nai kei cih thei ni. Citak peuhle cin na innkuanpih leh midang te'n ka hong theisiam lel ding uhi.

I laisim pen theih-utna leh siam-utna toh sim cencen ding ahi. Na hinkhua a dia na kisakkholhna haksa sa na hihleh, kiging in na maban ah hinkhua haksazaw in hong ngak ahi. Na maban a dia training/kisakhol na hi cih mangngilh ken. Lai siam theilo hiveng aw, cih ngaihdan neih ding ahi het kei. Hahpan inla na theih ma tan sim ek phot in. Sim ding leh theih ding teng na theih ma ihmu theilo ding in kikoih in. Thei nailo pi in lupsan le cin zong na ihmut a lim hetkei ding hi. Tua sang in theih som teitei ding, theih khit ciang in tomcik ihmu le teh lungnuam tak in ihmu na hih man in ihmut na kham lel ding hi.

Na maban hinkhua na hih sang/niam thei hi. Nang tung kia ah kinga liuliau ahi cih thei in. Genthei leh haksa tak a khosa ding na hiam? Midangte neihsa eng lel dia kiphal na hiam? Amaute sang in lianzaw, thupizaw leh hauzaw thei na hih lam mangngilh ken. Lunggeel inla na utdan tak, a nuam theipen a khosa ding in kisa inla; na deihpen teel in. A kikheel ma in. Nna in hun nei ciat hi. Tua hileh na maban a ding in na pan dingdan na ciang mai ding. Kisa in, ki sin inla pang fanfan ngal in. Na niam kiak deuhdeuh ma in. I sep ding masa pen laisim leh thu manh ahi. Thu manh pen midang I nu le pa, ei sang a upa zaw ten ei theih/muh sang a taanzau zaw in na thei/mu ahih man un leh amau pilna I zat theih na ding in a thu uh manh ding ahi.

A thei ding leh siam ding in khawllo in ki sin sin mah kul ahi cih mangngilh ken. Music siampen zong niteng in ki practise gige ahi cih thei in. Tua mah bang in nang zong na pilna ding leh na nekmuhna ding in na laisim ah tha piak gige kul ahi cih mangngilh lo in deihtak hong pang in. Na maban ah lohcinna, mavanna leh ken ka hong cibai ding uhi. Hong pai in kimu ni.


No comments: