Thursday, March 17, 2011

Pasian maw Pathian?

A dik tuak lel hi. Ahih hang in a thu omdan kansui ni. Pa leh thian/sian kammal kigawmkhom a bawl ahi uhi. Pa pen theihsa in koih phot ni. Thian leh Sian bel Thianglhim/Siangtho kammal apat kilakhia ahi cih, Zomi toh kisai I research scholar uh H. Kamkhenthang in a mukhia hi. Mizo pau thianglim apat in THIAN cih kilakkhia cihna. Paite LST pen Lusei LST apan kiletkhia ahihman in amau gendan kizui in Pathian kici paisuak hi ding in a uphuai hi. A cetna ahihleh; I minphuahte uah THIAN pen paite LST a om khit in kizang pan hi. I minphuahte uah THIAN pen kei khang toh teh in ka pa khang ah a om nai kei. Pasian I cihpen hong gawt ding kia in kimu nonlo a eite hong deihsak, thupha hong pe ut leh hong tankhia ahihna kiphok in Kristian I suahkhit in A min ki deih zaw deuhta ahihman in sakmin ki tam phuahta hi. Sian leh Thian deihbawl in kizang ziahziahta hi.

Pasian toh kisai pen Sing Khaw Khai in a sutkhiatna ah, nidang lai pek a pan Pasian kammal ana kizang ahi ci hi. Kristian I suahma ua I kithoihna ah " Ka Pasian, ka lungzai..." Cih na kizang khinta hi. I tangthu uh Neino tangthu ah Pasiante unau cih kammal om leh kizang khinta ahihlam zong mangngilh kei ni. Pasian i cih pen 'dawi leh kaau' te genna hituanlo hi. 'A biaktak Pasian i theih ma pek in Pasian cih min pen ana kizang ta' ci in khiatna neile hang hoihlel ding in um ing. Hi bang ahihna ah Pasian cih kammal i neihsa gige pen zattoh ding in kilawm leh dikzaw in thei ing.

Paite LST sunthak dek uh cihthu om hiven bang kammal hong kizang diam na enkhe ni.

No comments: