Tuesday, July 12, 2011

Bombay, eh Mumbai local train







[I theih khit dimdem ma in I gelh leh mawl sim thitthet, generalisation tamlo, theih a theihsiam thohna omlo ahih man in sim nuam in ka thei zaw hi. Sepna toh kisai in Mumbai ka tungsuk a a theipen cihna hilo in tamlo leh bucinglo sim in ka hong gelh khia hi.]

Naupan lai pek a kipat 'Bombei mithai' tungtawn in Bombay khopi ka thei hi. Tu hun ciang in Mumbai a ci ta ua hiven! I tungsuk zaw Bombay mithai kia muh ding a om kei. A khopi a om hamphatna, 'mumbai mithai' muh som mihing a tam petmah hi. Kuate hiam gendan in "khompi om hia"? cih theih d khop ahi. Mihing lu ngen ngen kimu ahi mai. Ofis leh munteng ah mi tam ahihman in 'mi khat' va ki hi lel mai dan ahi. Mikangte cih dan leh "just another guy". Public transport din bus leh train ahi, taxi leh autorickshaw om mahleh. Metro life, social life leh professional life cihte sang in a minthang mumbai local train tawh pan ni.

Mumbai local train
A min than na hin te. Minit 3/4 hal a tai bogey 9/12/15 nei train ahi. Hun teng in a tuang ding mi a om hi. Hih train zaw mi tamlua a ban a pen ah ka tuang mai ding cih a phatuam kei. Va phut ek a lut ding ahi mai hi. Train leh bus ngakna mun te ah line (Queue) system ahihman in ki zen mahmah. A ngakna mun queue ah Saheb, Sir, Madam leh mi poimoh cihte a om tuan kei. Na boss pan na din na mun hong tuh som leh na tongh(elbow) in phu geih le cin ki suanglah dia, a nung lam ah pai mai ding hi. A tuam mahmah khat ahihleh, mi tam sawm ve le zong tuan man a pia vek uhi. Ki pe ut ciat hileh kilawm in ka mu hi.


India a ding in Kolkatta khopi ah metro om masa pen mahleh tram zong a zang lai uhi. Tram pen a khopi ah tai doldol ahihman in a etlawm kei mahmah. Mumbai ah metro omlo, tram omlo (Eh metro bawl panta uh). Local train a om hi. Train masapen Mumbai to Thane km 34 a gamla 16 April 1853 in a tai panta hi. Line 3; Western line, Central line leh Harbour line in a kikhen in, a khopi ngat cik ahi a train in zik paisuak ahihman in ki vei kualna a lemtang sak mahmah hi. Train te Slow leh fast in a ki khen. Vai film a a tangval ten train tai lai delh cencen, delh pha cihte 'a hi thei kei ding' cih ka mu. A tangpi in 65Kph in a tai hi. Slow te chu station teng ah ban khawl to himai. Fast te bel station lian deuh ah a khol lel hi. Train teng station teng ah khawl lo ahi cih lesson dang khat ahi pah mai. Station khat ah second 30 kia khong khawl ahihman in pilsiam a ngai mahmah. A pawt khia lah chu miksi/khuai beel hih tap khak mah bang in a taikhe zoi hi. Tua khit phet in lut diam uh cih ding ahimai. Train a lut dan bel 'lut khak' som ding ahi mai. A pawt khiat dan ahileh bus tai lai a tawm khiat bang deuh ahi mai. A lut som mipi in hong phu hehu ding ahih man in kumh khiat manloh a lauhhuai. Tom/kumh khiat dan ci thum om in ka mu hi. A siam nailo leh dawilok deuhte a kongkhak ah ki luai in a tai awl mahmah ciang in leitual a siksuk pan uhi. Khat te lah ki tom khe leuh in a tuang hetlo dan in a pai bal bal uhi. A thumhna din, kei style, mipi hong lut d te lak ah kitom khe suk geih a fuh pen kasa. Bang hang in maw? Mipi lak ah kipuk cih om sese lo. Lut ut ahihman un a heh man kei uhi. Style tahtah a tomkhiat ngai a khoo.


A tangpi in zingsang lam in North South direction ah a rush diak. Nitaklam in South North direction. Mipi vai kuan leh ciah hun pen 'rush hour' taktak ahimai! Kei vai kuan/ciah na lam bel opposite direction ahi. Mi tam kei ci leng zong tam veve. [A pix en mah dih. Hun tom kha lel zong ka lakna phone camela ki lik to theilo khop ahi.] 'Tuni train ah mi tam petmah' ka cih ciang in ka zi in, 'nang paina lam a tamloh pi, a tam na taktak tuak kha nailo na hi' ci zomah lai ei. Ni khat in mihing 6.95 million kileh gige ahihleh a tam ding mah hi, ka ci thei khong hi.

Thudang ah, gari heek pen a nuamlo ahi tuan hetkei. Delhi bang lo tak in 'ki theisiam tuah tak in' gari ki heek hi. Lampi neucik. Taxi leh auto meter a pai, deek (bargain) ek ek ngailo, makhai tanpha kileh kik ciatciat ahihna ah khopi dang te zuih ding om eih ka ci lungsim hi.

A train tai teng a bogey/compartment kigualh dan ; numei bogey, first class, handicapped, second class cihte kibang vek ahihman in a masa pen in koi platform, koi muntak ah ngak a hoih a. Koi ah ngak leng a bogey nai pen ka 'class' a hia. Ka pawt khiat non na ding leh FOB a kahtohna mun tawh a ki tuak geih leh lemtang pen hiam? cih theih khiat a hoih. I lut khit phet ciang in I kumh khiatna ding station pen, platform vei lam hia tak lam cih theih pah ding ahi. I theih kei leh kan pah ding a, tua lam pang naih pah a kumh ding in kisak pah ding ahi. Pawtkhe ding te ki gualh na ah ki gualh pah, I ma ah midang a omleh a liang bet kheuh kheuh a 'Pudhchya (Next) station var utraycha aahe?' ahk 'uttar na hai' cih d himai. A kum kei ding leh a nunglam ah dingh in cih ding ahi ziang. Lut khin phet a pawt khiat na ding lampang Sepaih te march khe ding bang in maingat in din ngal ahi. Khong khak na naih pah keileh na tomkhe man kei dia, hong khel bawl kha ding ua, next station ah hong kumsak thei tuan kei ding ua saupi na tuan kholoh ding hi. Therefore pil pah ding, kong khak naih pah ding ahimai. Din kom a newspaper lemtang lo deuh a simdan leh dingh kom a ihmut dan bang na muhleh lamdang sa ken!

A tuan man a tawm mahmah. Ni teng a ticket va lei tom gige sang in pass bawl a lemtang pen. Kha thum sung zat ding second class pass ka bawlsak leh Rs265/- kia ka seeng. Kha khat a din Rs90 khong, ni khat (22 working days) in Rs4, one way Rs2 kia seeng lel cihna ahi mai. Ni khat a khatvei kia hilo in ut zahzah vei tuan theih ahi lai zomah hi. Uang gen leng 'a thawn a tuang' ka himai. Fast leh slow train a tuan man a kibang geih hi.
Mumbai train theihsiam na din va tuankhak poimoh hiveh. Tuang lo a thei te na hampha uh! Tadak, tadak, tadak.

Train timings: CLICK

No comments: