Monday, January 30, 2012

Book review: Thangzamang


Sutkhiat theih ziang dia a lepsa, a sihsan, a zi pi Chhungi leh a tate pangkhom a 2010 kum in a hong zohkhiat uh laibu peek 220 a sah ahi. Feb 7, 1938 a Thanlon khua a teeng pu Khamkhopau leh pi Ningzaniang te goutan te lakah Sept 15, 2007 tan leitung hinkhua zang kua dang hilo in azahtakhuai pu Thangzamang ahi. Tanu nih leh tapa khat a nei a tu 4 mel a mu man hi. Siamna lam ah M.A English Litt eimi lak ah zo masa ahihkia hilo in IPS lohcingtak a seemto, MPSC Chairman piak a om banah a kampau apat pu H. Chinkhenthang in IAS a muhloh hi. Lai lunglut, word theihbeh som in a ipsung ah laithem kuah in sim kauh zel, nungakte laikhak sim hi dia ngoh a om pa ahi. A theihlohte pitek putek te dongh a laibu/labu khat suah hial cih ka theih in kei zong ka pi toh compact cassette dim khat khanglui laa ka khum uh, ka pa Pau (J.M. Paupu) in a keemta, thu bang ka phawk khiat loh hi.

A laibu bawlte sim vek ka ki sakleh hih laibu pen mukha leh simkha lo ka na hi. Khatvei Mumbai ZCF ah pi Chhung in deihsaktak in ka nupa ua din a hong pia a hampha ka kisa uhi. Ka nupa un pu Mang ka ngaina ua, ka star petmah uhi. A laibu sim masa ding bang ka kituh bawl kha zawzen uhi. Etmai in ama tanchin kia ahi. A bumin mahmah zong ama min a hitop mai a cih khak theih hi. Tua bang ana hihet kei. A inkuan leh midang bangzah hiam ten amah a muhdan leh ama thugelh hoihtaktak bangzah hiam omna laibu ahi. A mah toh kisai mi 23 tak in a muhdan a gelh uh a om banah laphuah 7 leh limlak muhnophuai tamtak a om hi.

Vaikhah a bawlna ah I inkuanpih ten nidang ciang in vaihawm leh makai ding a hong ngak uh ahih thu ahi a, pan la ni a cih ciang in i hinkhua ah ‘The rules, skill, team work, leadership, organisation skill, discipline, observation leh Strategy’ siam ding a gen uang hi.

A mihinzia, a khutsiam dan, a mipolh siam dan leh a picindan miteng in gen uhi. Shillong a Ekant Bungalow, Bishop Cotton Road, Polo ah a omlai un a tanu (Lawmngaihching) in pasal (Mangminthang) a neih dek in cialna card Shillong ZCF a piakpen ama design, a khut mahmah a (caligraphy) nalh deuh a gelh ahihlam tak ka thei lai. A kiten un close group sim a bat man in ka telkha kei. Biakin ah pasal lam te tutna first/second line ah tu gige ka hihman in amah second line a tu a omdan ka thei hi. Lasa khat omleh, siamlua a na ci zel a, a music ding bang a kam in ana bawl zel hi. A damtheihloh sim toh chlorets a toss lut kauh zel hi.

Mi niam cik te natan phok pha ahihna kei leh ka zi hinkhua ah ka thei cian mahmah uh. Accident nasatak tuak khin, kiteng in Delhi khopi ah ka lenlut dek un hong phone a Imphal Airport ah hong delh ahihlam a hong gen hi. Hong mu ut ahihlam a hong gen a, baih deuh lai ahihman in a inn uh Paite Veng lamah ka tai pai suak uhi. Ka gari uh kipeltuah cih aman a thei masa a ana pai ua ka hong delh zui uh a ci hi. A inn uah singpi limtak hong dawnsak a, a inn banah study room natan hong etkual pih in laibu bangzah hiam tak hong present hi. Tualo in Delhi ah ki-ensak ding in a hong hoh in khatvei eh nihvei ka va pha/veh kha sam uhi.

A ngentel dan leh art lam a lunglut dan pu Ngullam Tombing in milim a gelh, a muhkhak a gensawnna ah a kilang mahmah.

Mi heh theilo, a sialam ngaihtuah ngeilo pa ahi peuhmah. A laibu a pat theihbeh tampi ka nei hi. Tu khangthak ten I zakkhak lel uh ak mit-et cih bang ama hinkhua pansan in a genciang a, Shakespeare pianna Stratford-upon-avon lunglut huai tak in a gelh hi. A thugelh hoih diak a ka theih: Proper co-ordination for Security of vital installations, The personal qualities of the preacher banah Taj Mahal bawlpa Shah Jahan's Delhi a hoih mahmah hi. A capital Agra apat Delhi ah a suan thu ka theihcet beh hi. Ama genna ah Agra kholum(sa) leh lampite khocik ahihman in Delhi ah hong suan ci in a gelh hi. A diak in royal procession a pai ciang in lampi a neu ziak in mipite a buai khak pen hoihsalo ahih thu a taklang hi. Amah pahtawina (citation) kicingtak in hih laibu ah a ki gelh hi.

Sahang in bang dia mihing ne a hia cih sakap siam a minthang Jim Corbett gen apat a gelhna ah, sahang a teek ciang in kingang nonlo, a khe leh ha te hiam nonlo leh mihing ten thah dia en ahihman in mihing sa a ne hi, cih.

A gen pipen uh dik a ka theih khak sam amah toh kisai in; mi picing, polh nuam, kingainiam, heh kampau zang ngeilo, midangte khual masa gige, art leh tradition kemcing ut cihte ahi. Tulai pau leh mi COOL ahi.

No comments: