Thursday, March 22, 2012

User Review: Amazon Kindle

(For Stephen Songchinmuan Tunglut)

Kindle I cih tulai a tablet computer cikhat ahi. A diklel in ci leng laibu simna vanzat, e-book reader ahi. Reader ahih ban ah computer features koih beh uh ahihman in tablet zong a ki ci hi. Online/Internet a vanzuakna company 'Amazon' ten Nov. 19, 2007 in a bawlkhiat uh ahi a, e-reader toh kisai a dempha a om ta dih kei hi. Hih vanzat (device) pen tampitak zuak ziahziah ahihman un amau zong om maimai lo in improvement koih behbeh in version tampi a phata hi. Theih beh dia hoih ahihleh US ah laibu sang in ebook a tamzawtham zuakkhiat ahita. A min mah (Kindle-seem kuang, tawh’ kuang cihna) suun in hong seemkuang ua, latest version 4 pen, Kindle Fire a minvawh uhi. Maban ah zong a hoihzaw seem bawlsawm ahihman un hih laigelh pa in neihtuak te lak ah ciamtehna a bawl khin hi.

Back to the olden days:
Computer masa pen in cathode ray tube zat ahihman in lian lua in inn khat a luah dim hi. Tu hun in transistor, integrated circuits (IC) te, a banban in hong palphei in microprocessor leh artificial intelligence a ki zangta hi. A bawm mahmah zong hong neu deuhdeuh in Desktop PC leh LCD screen in hong zomto in Laptop banah netbook hong piangkhia hi. A zangkhai nakleh lemtang deuhdeuh ahihman in, tu hun ciang in tablet (pc) hun a hita hi. Tablet pen a sakmeel et in neu mahleh simmoh ding ahikei. Siamna a sangta. A poimohdan dungzui in complete form in bawlkhiat ahita.

Kindle touch 3G I gen ding
A min dan tak in touch screen a bawl masak pen uh version ahi. Black and White screen ahi a, electronic ink (e ink) technology zang uh ahihman in a hoih mahmah. A background pen lai peek mah bang in a ngo a, a laimalte a vom hi. E ink hoihnatak ahihleh nisa nuai natan a laimal latkhiatdan a buaikei. LCD te sang in mit a din tawldam kia hilo in battery a ne tawm mahmah. Battery dakkal 2 khong in full charge theih, mok bei pah lo, kha khat tan bang daih thei ahihman in 'I am impressed'. Tu hun ciang in laibu electronic version, pdf leh research library te e-form ahi ta hi. Hard/physical copy a bei hiai hiai ta. Kindle sungah laibu tampi a khol theih hi. Kindle ah leetkhe ding e-item tampi nei na  hihleh Amazon in "cloud" space a hong piak ah koih hiau ding ahilel.

Laibu bangzah hiam a thon in sim ding a om hi. A hoih deuh te bel 'there is no free lunch' cih a om bang in ‘lei ngai’. A home screen ah na laibu neih teng' min a hong kigual suk ding hi. Sim ut pen khuttal toh khoih gaih le hang a hong ki hongkhe pah ding hi. Na utna mun ah na pai theih na din 'go to' key a footer ah a om hi. A laimal na lian sak, neusak dan in a peek phazah kinga ahihman in page concept a dik kei a bang. Tua bang pumpelh ding in Bible ah chapter leh verse a om bang in a line basis in 'location' cih kammal a kipia hi. Hoih na sak na munte na mark, highlight leh note gelh theih ban ah na phakna tan bookmark na bawl thei hi. A laibu peek taklam leh veilam khoih le cin next page leh previous page ah a lut ngal hi. A laimal kilatdan, size, style te deihdan dan in khen lamdang theih ahi. Na sim charchar a khutzung nih zang in zoom in leh zoom out le cin a laimal let dan hong kikheng geih ding hi. Tawpsan phot inla, na laibu simpen hong non le teh na tun na mun tak ah hong ki hong khe geih ding hi. Mood fuh sim na hihleh background music kilawmtak play kom in na sim thei. Word theihloh na neihleh a na khuttal toh press le cin a meaning hong kilang mai ding hi. En peih nonlo na hihleh amah leh amah na (Read-to-Me) simkhe sak dia, numei aw maw, pasal aw, kin sim diam awl sim ding cihte na deih bang tak in na peikual thei hi. Definition, quotation cihte byheart sawm a review na din hoih kasa hi. Ngaihkhiat hiuhiau kom in ihmut khak theih ahihman in, Laisim pa ihmu cih category ah lut khak theih cihna bel ahi peuhmah. Laibu kia hilo in audiobooks zong ngaihkhiat thei ding in amazon ten collection hunkhoptak a nei ua, baan ngaihkhiat ding ahimai. Gari tuankom in zong bangmah phoklo zeen in ngaihkhiat theih hi.

Cimphawng’ na ding in 3G ahk wifi zang in net browse theih kia hilo in social networks facebook cihte khuttal toh tatkhe leuh in comment leh status update theih zungzung hi. Lamdang kasak bel net browser, music leh voice text reading (Read-to-Me)  pen experimental a cih se se uh ahi. Hoih hun mahmah hina pi amau a hoihzaw seem bawlsawm uh cih etsakna in ka koih. A sung a application na utut na hih laitak in na escape utleh va close masak kullo in a key om sunsun home screen key, meek ding ahilel.
A letdan bel a screen size Tv screen I teh bang in a kiteh hi. A screen (diagonal in) 6 inches ahilel. A zat zangkhai dan hi ci’n gen ni; Khutzung kaal ah zateep tep bangin veilam khutzung in  tep litlet in lai sim hiuhiau theih. Lamdang kasak non bel net browsing I hihciang in mobile version of the website hong ki load pen tak ahi. Desktop version lutna din khatvei click toh a bawllem ziang theih na a!

Kindle Fire
Nikum November 2011 in a honkhiat uh color screen ahi. Amasa te toh teh in a hatzaw, responsive zaw, gikzaw leh a hoihzaw hi. Ki mawl lunglut te a ding in a minthang 'angrybird' banah motor race, fighting adg adg a om hi. Newsfeed a hoih a, movie suak thak te short clip et ding a koih pah mai uhi. A screen color hoih leh zatnop cih ding hinteh ka tapa kum 1 hipan in a movie omte mithiip sa in a en niloh a, a kaallak in a khuttal toh a dawt zatzat hi.
A content omte gam teng ah access theih ahikei. Bek thamlo in credit card zang in gamteng apat a leikhiat theihkei hi. A hong bawl dik pah uh lamen hang.
A touch keyboard zang in hih rtiCOOL ka gelh a, zat lemtang salo ka hih man in ka BB ah ka sunzom mai hi. Lemtang lo cih bel neu lakloh, a tablet pen bang hiam ah kingai sak a type lut ding lah hilo, table tungah lupsak/phah a type din lemtang lo cih thu ahi. Browser I zat ciang in bel domain name/ website min tom cik gelhna din a lemtang. Space bar pen seh nih ki suah in key khat pen www ahi a a dang khat pen .com ahi. Ctrl+enter omlo ahihna ah lemgeel siam uh kasa hi. File tangpi media file te tel in a hon theih vek banah amazon te file format azw a kici a hong thei hi.
Site admin, web update na din zong kizentak in a zat theih. Heavy user te a ding in bel hikei deuh. For a moving executive it is fantastic himai.

A charger ahihleh phone dangte toh compatible ahi. Charging na mun mah computer toh data teng; laibu hi in, music leh adg adg kipiaktuah na din zat ahi.

Thukhah
Ka lawmte toh ka genkhop ciang un high end deuh iPad kaan a deihhuai omkei ka ci uhi. Laibu simna leh basic teng lel hihna din Kindle a hun mahmah. A hoihzaw iPad leina din I neih I lam teng bungkhe kei leng a hoih ding. Ka cih bel I phattuampihna a tawm a, cost-benefit analysis ah fail cihthu ahi. Steve Jobs bawlkhiat Apple companyte iPad niampen Rs.24500/-, Kindle Fire 199USD, Kindle touch 3G ahihleh 149USD ahi. A man niampen 79USD ahi. Concluding remark ah ka gen ut ahihleh Kindle a hoih mahmah, iPad, BlackBerry te’ (eh RIM hizaw) a PlayBook hi in khat peuh lei som na hihleh 'selung geel non in'. Na phattuampih na diam?



For more pix

No comments: