Wednesday, August 1, 2012

Yes Sir, yes Sir


(Dt 28 July 2012 prayer fellowship na ah ka sharing)

Tulai in ka ngaihsutna ah a om mahmah zan nitak ka Daily Bread simna ua topic zong ahi ka gen ut ahihleh, thumanna ahi. (1 John 5:3). Naupang in meikuang etlawm leh hoih a sa mahmah a, a khut in a khoih sawm hi. Khoih leh bang ci ding cih a thei hetkei. A nu a pa ten theilua ahihman in a khut in a khoih ding a khaam uhi. Khoih ken a ci uhi.

Hi bang mah in I heutute, boss te, i u te leh nu le pa ten a BIG picture mu zaw deuh uh ahihman in ei sang in a theician zaw uhi. Hih in, hih ken a cihte uh thuman top ding ahimai. Laisim in a cihleh sim ding ahimai. Hih ken a cihte uh hiloh a hoih pen hi.

Nu le pa thu ana mang hileng hitan kia ka tung kei ding. Thumang hileng a thupi zaw leh vanglian zaw in ka om ding cih ka thei. Hi bang mah in nouten zong ngaihtuah le u cin na phawk ding uh a om ciat ding in upna ka nei hi. I lohsapna leh I tun ding tan I tun zohlohna pen I thuman loh hang ahi cih nakpitak in ka gen ut hi. Lohcinna thuguk bang dang hilo in, thumanna ahi. Nu le pa, heutute thu man ahi.

Ka nu le pa khanglui deuh, ka boss pa gen dik kei na ci kha mai thei. Sawl a na om bang in na hih ziak in buaina hong om hial leh ngoh ding na nei hi. a diklo hih dia hong sawl ahih tak leh zong amah a moh a ki puak ding cih ziau phot lel ni. Nasem a kiloh ten zong a neitu deihdan toh kituak a sep leh bawl ding thupi leh poimoh hi. Kua hiam khat, mi inn bawlsak dia a kuan(kiloh) hi. Inn neipa deihdan sangin kei deihdan in ka kilh thouthou ding a cimok hi. Kiloh, mi nuai a om ahihlam ki theilo cihna ahi mai. Tawpsak in omleh koiah nek a zong dia? A hoih ding theizaw ahihleh awl a gen ding ahi. Hoihzaw hile zong aneitu deihdan mah a poimoh hi. Thuman mah poimoh cihna ahimai.

I nu le pa, pi le pu ten thumanna a poimoh dan a thei ua paunak ana bawlkhia uhi. Nu le pa thumang nah lawh peek, a ci uhi. Sing nah(teh) a peek a hoihleh zatna ding a tam mahmah. I Topa Jesu in zong, Kei nong it leh ka thupiakte zui in, a ci hi. (John 14:15). Thupiak zui I cih ciang in thumang cihna ahimai. Jesu hial in thu man ding ci ahihman in ei Kristiante a dingin thuman ding ahihdan a ciang. Tua ahihman in I hinkhua ah, Yes Sir cih ding ahi.

No comments: