Laigelh I cih...

Laigelh I cih thu baih ahi het kei. Kua hiam khat in nasep toh a tehkak na mah a, 'a baih liailo nna' ahi. Lai I gelh ciang in deihna khat ki nei a, gen ut leh tangko ut ki nei hamtang hi. Ciamnuih nasan gelh hile hang zong tangko ut kinei giugiau hi. Lungsim a dimlet kamah pawtkhia cih bang in gelh thoh in kipawt khesak bel ahi peuhmah. Laigelh leh a gelhtu a poimoh dan gen tam kei le hang zong I theiciat uhi. Mipi' ngaihdan piitu leh hei lamdangtu banah genkhiatna ahi. Hibang ahihna ah laigelh leh gelhtute pahtak/zahtak tham cing ahi uh cih zong ka gen beh ut lai hi.

Laigelh siam kei mahleng Zomite khua van nuai Zogamonline ah columnist cih min piak in ka om hi. Lai gelh gelh mi ka hih loh lam ka thei cian a ka ki sit hi. A website sungteng ka ctrl+F (search) leh kei toh kisai 40 vaal bang ana om samta ahihman in columnist title piak a ka om pen ka nawlhkik non kei hi.

Laigelhmite pahtawi tuak sa ing. Ni bangzah hiam paita in Zogam.com leh Zogamonline.com ten regular writer, columnist te pahtawina a pia non uhi. Pahtak a omkhak a lungnop huaidan lawm Suanlyan Tungnung kampau ka hong gen son ding:

I don't think, even in my wildest dream, that someone will acknowledge me as a writer. But this happened today. I was emotional (and shed tears) when I heard that Cicily Zou has collected the trophy for me. I wished I were there! KK Valte, Son Khuptong, Mangzou VL, Kimbawi Pa, Nengkhanlun, Lun Samte, Kaimuanthang and www.zogamonline.com, I will never forget your contributions to (and in my) life. Thank you. LONG LIVE ZOL, GO FORWARD AND UPWARD! Thank you Cicily Zou for taking the pain for my sake.

Mihing I tuam dungzui in gelh ut leh tangko ut a tuam ciat hi. Ken bel social issues leh techno lam ka hih theih khomkhom in ka gelh hi. Political issues lampang gelh ding pen ka theihna in zong a baan kei hi.Lai gelh miten I gendan style kinei ciat hi. A gelhsiam midang te thugelh apat I sin khitciang in tua dungzui in ei deihdan ki paipih in I writing style hong piangkhia mai hi. I deih masa ahihleh: I gen ut pen simtute theihsiam ding ahi pen mai.

Lai I gelh ciangin I lungsim a om pen gelhkhia ihi mai hi. I gelh pen sim thak thak. Puah pha. Bangtan hiam sa-uii bang in uii bawl in I gen ut pen I kammal zat in a gen kha hiam cih bang ki dot thakthak hun a om hi. I etkik khit ciangin hoih lel ei cih toh suahkhiat ding in a ki pekhia hi. I gelh tam deuhdeuh leh kammal zat pen ki deih teel deuhdeuh hi. I ngaihsutna leh I gen ut pen a bukimlo sasa laimal toh gelh khiat som hi phiangsan I hihman in I kammal zat pen toh I gen ut pen kilawm khawm pen ei ci in dingh sak hi phiangsan I hi. Tua ahihman in laigelh khat peuh I sim ciang in a kammal zat hi khollou a, bang gen ut ahia cih pen theihkhiat na ding in English ten reading between the lines a ci zawzen uhi. Kampau leh gen thoh ah bel, I awsuak toh pang thei hi hang. I omdan, mit hah dan, tatdan tan in pang thei hi hang. Laigelh pen laimal te kia in hong panpih thei lel hi.

Suah ding a send I mek khit ciang in a suak khiat ding kingaklah pen hi. Hong suah khiat ciang in I sim chaisa hileh zong a sim masa pen bang in ki pang zomah hi. Ngaihsutna seeng a piangkhia ahihna ah I laigelhte pen miten hong muhsakna ki thei ut sese hi. Real time a comment theihta ahihman in i thugelh' toh kisai kimtak in kigelh sipsip lo a a simte a ding in hong kupbeh ding un kisiit hi cih blogger Carey Suante toh ka cindan uh ahi. Comment a omleh sim pah. Ngaihsun kik. Ka gen pen theisiam mah maw cihte kingaihsun hi. Naupang huai tak a hong ki comment sakleh pen ei lam kingaihsut ding himahleh a deihlo ki hi mai hi. Ka gimpih ka tawlpih eive. Nang zong na ngaihsutna mundang ah bang ding a gelh lel lo na hiam kici ut pian hi. Hi bang ciang in I facebook account wall ah mi tampi hong ciak bang in ki ngaihsun in ki personalised lak mahmah se hi. Comment tungtawn apat in I thugelh pen feedback ki en ahi. Mi ten bang ngaihsutna nei uh ahia cih bang. Hong pompih maw, pompih lo.

Hih ka hong gelh na san ahihleh laigelh a poimohna lian mahmah ci ut hi ing. I history leh thu tuamtuam ahi bangtak a record leh research ahih na ding deihna toh hah pan kul ahi cih ka gen ut man ahi. Ken zong gelh gelh som. Nang' e?