Wednesday, June 19, 2013

Ka Bata khedap

Ka naupanlai akipan in Bata khedap kana ngaisang hi. Kei kia hilo in singtang a khosa ten zong a jang phatuam mahmah uhi. Tua banah 'naughty boy' naupang gilo vuazolo te a hoih mahmah a, a mantam deuh a hiven! A gilo ten midang te ngaltak suihna ding a jang ua, hong suih khakleh; na peuhmah ei.

Ka hong khanglian a tui palna din ka Mumbai first year kum in Bata-Sandal ka lei hi. Ka lungkim mahmah ahihmanin nikum 2012 in khedap pum, Bata bawl mah size nambar 6, Rs149 in ka lei hi. Lungkim mahmah in ka bulh litlet jel hi. Tulai in silh leh ten hi-in khedap hoih sim I cihleh tampipi a man hi. Rs5000 lamlam bang man ahih leh 'khawldih kingaidam zaw mai ni' cih uthuai phial ahi.

Kumkhat khitin ka bata khedap sedek simta, khek ding ahita ve cih ngaihdan ka neihlai in mun minthang Andheri ka hohkha hi. Kuan lam in vuah zu nepnep. Ka kiklam in Bata vanzuakna Station kiang geih a pen ka manoh hi. Ka lut ma deuh in a taak khiat te uh enphei vatvat in a sungah mipi om nuainuai te lakah khatin ka pangsuk hi.

Ka Bata khedap lui bulhlut ka hihmanin, 'hi bang khedap size 6 hong ensak in. A design om teng aw' ka ci hi. Neihsa zatsa mah ci in Bata khedap ka neih lui pen bangbang leidin ka thupukta hi. Khedap thak bulh pah geih. A luipen nutsiat som in, koiah ka koih dia, ka cihleh 'hiah nusia lel in' a ci hi. Sum pe din ka paiphei a Rs199 ana manta hi. Nikum a ka lei lai in Rs149 hiven inflation ziakin Rs50 ana pungman ahive maw ka ci a. Ka khedap lei lungkim mahmah zaw ka hi ding Re1 ka ngaihsak nonkei hi.


Ka khedap luipen ka nutsiatna ah om ka en a, kum khat vingveng a zu a ham hong palpih leh hong mualsuahpih ahih ka phawk hi. Vuikhiat, koihkhiat dan kilawmtak bawltuak ahi cih ngaihtuah in ka bag sung a niliap kawt kepna din polythene ka puak pen sungah ka guangsuk hi. E khai, ka hong mok koihkhiat kei ding. Ofis ah hinonlo in local area conveyence din ka hong jangta ding ka ci hi. Ka khedap luipen in ka siakbok hong heet bangin a bhong heet hetkei hi. A thak hiven ci in lungnuamtak leh hangsantak in guah leh tui ka maituah ta hi.

1 comment:

Piang CK said...

Hih tawh kibat na khat nei :-)
http://jaxwan.blogspot.com/2011/02/goodbye-my-dear-kickers.html