Tuesday, October 29, 2013

Ka sakmin phuah masak pen


Dt 22 October 2013, nitaklam dak 2:15 in ka u Thang in hong phone hi. Tapa nihna damtakin nei uh ahihdan a hong gen a, amin kei ( ama nau, a nuai geih) phuah ding cih a hong theisak hi. Ken zong, hoih ei, lungdam ei, Topa thupha hi ei, ka cih pen ama'n zong Topa thupha ci in pasal kiho cih mahtak ka hunsak pah uhi.

Ka ngaihsutna ah thu tampi a hong lut a minphuah I cih noptuak mahmah napi haksa ahihdan ka theikhia hi. Bangtan hiam khitin ka zi ka phone phei a, u Thang te'n tapa damtakin nei uh. Amin kei phuah ding ci. Hong kuppih pah in, amin ding bang hoih na sa a, ci in a hong dong pah hi. Ken zong hoihtak ngaihsut ding thu hi, a hoih kia hilo in a kilawm leh kituak khat ngaihsut ding, hih vengvung louh ding ahihdan ka gen hi.

A min ding hoih kasak tampi om mahleh ka theihloh omkha inte ci in I Zo min uh a khiatna ka google a ka simsuk detdet hi. A hoih leh deihhuai tam ei. Ka deih teng ka ban gualhsuk hi. Siam, Thang, Mang, Muan, Hau, Biak, Sing, Zam cihte hoih na pi ka ngaihsut vengveng ciangin ki thupisakna toh kinai kasa deuh hi. Hihte tawh teh in kei nuntakna minThang leh a thupi, Muantaak, Biaktaak, Sing in Zam zoulo cih thei kilkel ka hihmanin ka teel ngam kei hi. Etdan khatah I Pasian hihtheihna hiciang bek hilo; a hong hihsak theih sangin niamzaw mahmah lai ka kisa hi. Pasian in hihsang a sangzaw in hong Siam thei, hong minThang sak in hong Mang sak zaw lai thei lua hi. Biak cih pen bang midangte a dia biaktaak leh ka nau a hong sihsan Biabiak phawkna ding ka cih dek ciangin mi khat phawkna ding in midang khat sakmin hi zawzen keileh ka ci jel hi.

Minphuah toh kisai ka pomdan bel I minphuah pa/nu hong hih ding I deihna hileh zong nidang leh tuhun a I hihna gennopna a zat ding hizaw in kamu hi. Ama hong hih ding deih lua; min thupi I phuah ciangin paw zolo thei ahi hiam peuh ci ing. A omdan tak bel a paisa, tuhun leh amanban ding deihsakna in sakmin kiphuak ahi peuhmah cih kician mahmah.

Min phuah toh kisai ka pa khang a damlai omsun ka paneu Vunglal leh ka u Kaikhopau ka dong hi. Kei phuah ding mah hia, eipawl in min I phuah ciangin k i bangci phuah deuh cihte leh kei a min phuaktu in bang teng ka hih kul ci in ka dong hi. Ka ute'n tapa upapen leh tanu nih neita uh. A piite'n piang masa nihna numei phuakta ahihman in ka paidan un kei phuah ding mah ahihdan a hong hilh ua, a phuaktu deihdan a phuak himai ahi. Na utleh zong hih Sialpi toh a min na phuak uau ci thei ka hihdan ciamnuih in hong gen hi. A min pen a phuaktu in a koksak nop dandan ahi a cih ban uah amau min phuahte uleh a deihnasan uh a hong hilh uhi. Genneitak a phuak ding ahihdan ka cian hi. Ken zong a nalh maimai hilo in a hoih leh kilawm a phuah ding ka hanciam hi.

Ka ngaihsut khakloh om inteh ci in ka sanggam leh ka lawmte tawh bang phuak leng hoih ding cih ka kikum uhi. Hi bang teng toh thu thum deihna-a beisa hun a kei mahmah leh ka inkuanpihte Pasian in hong khotuah leh khualna hangin hitan tung ka hihlam ka phawk na, mailam hun ah zong a hong khual touh lai ding deihna leh tua bang mah in a sakmin nei pa in zong midangte a khual na ding deihna in a pianzoh ni sagih ni (nisim 29 October 2013) in Kamzalian> Liankhual Tomging ka ci hi. Topa'n ompih henla midangte khual thei dingin phungcing hen aw.

[HILHCETNA: Sian in hong khual peuh leh i thupha tan te tawh midangte a KHUAL thei ding dinmun luah ding. LAMkhia in SUANhuai in MUNG in HAU ding hihang. Lawm leh gual te SING leh KHUP ding hang a, LAL in minTHANG leh MUANhuai pen a hikhin ziau hi ding hi. Hibang teng a tunkha thei dingin Pasian in hong KHUAL ding bek kisam hilel e ci ing. A dik lel in gen le hang, i minphuah te a hoihpen a i phuah ciat hilel e.]

No comments: