Monday, November 11, 2013

Kitamzan

Lungsim a gentheite a hampha uh; vangam amau a ding ahi ngala.
Lungkhamte a hampha uh; khamuan a om ding ahi ngal ua.
Thunuailutte a hampha uh; Leigou luah ding ahi ngal ua…
Hih I theih ciat uh Mualtung thuhilhna ahi. Mathai 5: 3-5.


Mihing te ih utpen leh I deih gige Lungnopna leh nopsakna ahi. I neih theih na ding in bang poimoh hiam I cihleh kitapkhapna ahi. Kitamkham I cih a hoihlo leh deihhuai hetlo dinmun ahi. I van neih, um le beel, a kitam baih glass tuamtuam I neihte banah I lungsim kitam thei hi. A koi a bang hileh Lungsim kitam ahi I gen ut.
Kitamkham i cih bang ahia?
Lungsim kitamzan I theihsiamna ding in nidang a Video film minthang mahmah 'Tui buasa kiluak kik thei lo' i pansan ding. A tangval Kapno in midang a sai ciangin a nungak Manbawi in ka lungsim kitamzan a cih hi. Tua ban ah, a them a neng in lengmang khin a ci hi. Hitak a I gen utpen lungsim kitamkham tungtawn in kilamdanna/kikhekna ahi. Hih kitapkhapna pen i sung lam a kipan thupiang khia ahi a ki deihsak thutawh a piang theite ahikei hi. Ei ma sunggil ciat apat a pawtkhiat ding ahi.
Kitamzan dinmun pen khasiatna ding hipah samlo hi. Bang hang in maw I cihleh kikhekna/a thak hong tun ahihmanin. I LST sim na ah “Lungkhamte a hampha uh; khamuan a om ding ahi ngal ua” cih ahi. Mi kitamkham sate’n khamuanna a mu ua, mi a khamuan thei ua, midang te dinmun a theisiam ua, ciamnuih zong a dongh theih ban uah a deal nop uhi. Laisiangtho enle hang kitapzanna toh kisai mun tampi ah om hi.
Laisiangtho a kitapkhapna
Leitung mihingte lakah Topa’ lungtunna laphuak siam David zong ana kitamkham ngei hi. Sam laibu 31:12 ah 'Kei a sisa bangin hong manggilh uh a; leibeel kitamsa tawh ka kibang hi.' a ci hi.
Gim namtui koihna Alabastar jar a kici Jesu khebulah hihtam in zutna in a hong neih tak ciangin a hihna/namtui hong kilangkhia in tua tungtawn in Jesu in hihdik ahihlam numei nu leh midangte theih ding in a gen hi.
Mathai 14:19 Tua ciangin mipite lopa tungah a tusak uh hi. Tua anlum nga le ngasate gel la-a vantung lam ento in, lungdam a koh khit ciangin anlumte a balkham hi. Tua ciangin nungzuite pia a, nungzuite in mipite lakah a hawm uh hi. Hih in hong hilh ahihleh ikitapkhap ciangin zattheih pat cih imu. Thupha, gualzawlna a hong luanglut na ding kitam kham poimoh ahi. Hihtak ah a dimletin a luanglut zomah hi.
Gualzohna ding in Gibeon leh a sepaih ten ahih uh en ni. Vaihawmmite 6:17 ah Gibeon in, Kei hong en gige unla kong makaihna bangbang zui un. Giahphual mong ka tun ciangin kei hih bang tektekin hih un. 18 Ka pengkul uh ka mut uh ciangin no zong giahphual kimkot apat no aa ciat na mut unla, ‘TOPA le Gideon ading,’ ci-in kiho un,” a ci hi...Amaute in pengkul mut uh a, a khut ua a tawi uh beelte a sukham uh hi... 21 Tua ciangin Midian-te tai-in a tai kawmun a kiko uh hi.
A hon a lohcinna i neih na ding in i makai pa’ thuman poimoh cih hong theihsak. Makai in a thugente zuihpen gualzohna ahi cih i mu. Inkuan sungah i makai, insungpa in a gen pen zuih ding ahi. Naupangte kia hilo kou nasem pawl a dingin zong thumanna a poimoh mahmah hi. Boss pa thu man a zuih ding himai ahi. Nasep ding a bei ngeikei. I boss ten poimoh a cihte utoh kituak in i priority i set ding ahi. Poimoh a cihte uh poimoh ngaih masa leng hih dik ding ihi. Hihte banah a dangte feltak a ana sai ding ahi. Zanlam a pen hihkhin nailo maw, a hong cih zenzen leh, na deihna bang a hihte hih a buai ing a, hong hih khit pah som ning ei, ci leng, a gensau non kei ding hi.
Joshua 6: 16; TOPA in khopi, no tungah hong pia ta ei! kiko uau!” ci-in thu a pia hi.… 20 Pengkulte a kimut ciangin mite awng uh a, pengkul aw le mite aw ngaihtaka a gin ciangin kulh a kiciim hi; tua ciangin mite in amau omna ciat panin delh uh a khuapi a luh uh hi.
Sound toh pang a gualzohna thu i zata hi. Science in ah a ging nih a pankhop ciangin nna nakpitakin sem thei aci hi. Opera singer ten la a sak taktak ciangin window glass bang kissing kekzou hi. Hih Gideon, Joshua leh Opera singer te ahihpen uh science in constructive resonance a ci hi. Pengkul leh awging te a pankhop ciangin nna thupi tak a semkhia hi. Science dan in sut le hang a ngaihtaka a ginkhop man in kicim hikha ding hi. Gingkhom in pangkhom peuh le hang i gaalte nasan i kicimsak zo ding hi.
Siamsinna leh lungsim kitamkham
Siamsinna toh I mekmat ding. Tuhun ciang in learning kia hilo in unlearning zong ahita. Kitamkham lo a ei deihdan i let tentun ciangin a hong thuhilh heutu te, nu/pa, ute leh ih lawmte tungpan in I sin theihna i lungsim kikhak hi. Khat veivei bang I theihsa concept teng nawlkhin kuul hi. Ngaihsun le hang ama ngaihdan paipih tentun te slow learner hi ut mah2 hi. Lungsim hatlo I cihte mi kikheklo, amau cih ci tentun te ahi ut mahmah. Eskna: Arithmetic a substraction pen eite kihilhdan leh vaite hihdan kibanglo ahi. En bel a tamzaw apat a tawmzaw pen paikhia tuntun hi hang. Amau pen a tawmzaw apat a tamzaw tan simtou lel uh ahi. Hih neng neng bang zong ih unlearn leh learn kul ka cih.
Midang te’n ngaihdan leh etdan a tuamdeuh a neih man in nuisan in tuamkoih ding ahi hetkei. Ama muhdan in etcian a theihsiam som ding ahizaw. Kou pawl gendan in Creativity leh innovation pen concept simple, phatuamtak a zatna ahi.
Computer ah flowchart a kici a om hi. A pai dingdan geelna ahi. A bul a pat geel sangin na deih end product apat leh geel suk cih bang paidan khat ahita. I paidan leh geeldan zong a phatuam dingin khek kul ahi. Hih leitungah i survive leh khosak na ding in kikhekna, innovative mahmah kuul ta hi. Hih toh kisai in Dr Jack Matson in laibu khat Innovate or Die cih ana gelh zawzen hi. Laigelhsiam, ka ngaihsan mahmah Malcolm Gladwell in laibu in Blink, Outliers khong ana gelhta. A laibu thak David and Goliath: Underdogs, Misfits, and the Art of Battling Giants ah Goliath toh kisai a gelh hi. Goliat pen milian, ze-ol leh mithatlo a ci hi. A kiangah David va paileh a malchai zou ding hi. Hileh zong David pen a kiangah a va pai kei a, a gaal apat a kaap puk geih hi. Hinkhua ah galdo dan siam kul hi.
Nna neu cikte English in data a kici hi. Hih data te pen amau hihna toh kituak in koihkhom in sehkhen le hang information piang khia a, information pen thei le hang tua toh kisai knowledge ki ci hi. Hih knowledge I neih pen I zatkhiat theih hun dinmun pen wisdom cih a hi. Theihsiamna apat pilna piangkhia cih I mu thei hi.
Pianthakna icih zong I hoihlohna lungsim zansak le hang mithak kisuak a kikhenna pen pianthakna ci hi hang. Jesu a sihna pen eite hotdamna ahi. Ei te ikitapkhap ding i Topa’n deih ahihman in Alarm bell I ci hiam pataudak i hinkhua ah a hong tungsak jel hi. Buaina, haksatna te a hikha mai thei. Pataudak kua teng in I theikha diam ah. A tangpi in meikang leh dipkuathuai a hong tun ciangin a kisat dak ahi. Misi dak I theih mahmah. Hih pataudak pen a kin a kin a kikhen ging ahi. I kiginloh laitaka thil tung te tawh kisai ahi pha diak hi. Hi bang a hong om ciangin eite a kitam tawh ikibang hi. Na hinkhua a pataudak a ginta hiam, a gin ciangin na phawk hiam? I kitamkham ciangin Topa'n hong bawl thak thei pan hi. Jeremiah 18:4-6. Ahi hangin beel dinga a bawlsa a khut sunga tungman a kisia hi; tua ciangin beelseekpa in beel dang khat dingin bawl kika ama deih bangbangin a seek hi. 5 Tua ciangin TOPA thu kei tungah hong tunga: 6"Israel innkuante aw, hih beelseekpa hih bangin nang hong hih thei hi lo ka hi hiam?" TOPA in cikhia hi, "Israel innkuante aw, beelseekpa tungman bangin no zong ka khut sungah na om uh hi.
Topa aw, nang beelsekpa kei tungman bang.
I vanzatte a kisiat ciangin a bawlkhia company te kiangah i paipih a hong bawl hoih sak uhi. Tua mah bangin i kitapkhap ciangin zu leh sa peuh in kithoihdam som lo in, mundang ah tai mailo in, eite a hong bawlpa kiang mah ah i tai tenten ding ahi.
Mihing siamna: Genesis 1:26 Tua ciangin Pasian in, “Ei lim ei tawh a kibangin mihing bawl ni, in, tuipi sunga ngasate, leitunga om huihlak vasate, innsate le a bokvak ganhingte khempeuh amau uksak ni,” a ci hi. 27 Tua bangin Pasian in ama lim sunin mihing piangsak a, Pasian lim sunin numei le pasal a piangsak hi.
Psalm 51: 16 Biakpiakna hangin na lungkim kei hi, lungkim lecin kong puak ding hi; tua bang in meihal biaknate zong. 17 Pasian deih biakpiakna ahileh a tamkham lungsim ahi hi; Pasian aw, a kitamkham lungsim kisikna na nolh kei.
Topa thuciam: 2 Chronicles 7:14 ah kigelh bang in Topa thuciam pen kitapkhapna toh kisai ahi. English a kigelhdan hoihsa ka hihmanin ka hong sim ding. If my people, who are called by my name, will humble themselves and pray and seek my face and turn from their wicked ways, then will I hear from heaven and will forgive their sin and will heal their land.”
Kitamzan in Topa kiangah pai phot phot le hang aman hong bawlhoih dingdan theilua ahi. Topa'n hong khotuah leh hong khual ding poimoh a, tua ding in iki tapkhap kul hi. Hih bang dinmun poimoh sa ka hihman in apaita nung kaal masa in ka ute naungek min ding in Liankhual ka na phuak hi. Topa’n hong khual peuh leh hi lel ding ka ci hi. I LST sim masak leigou luah ding cih hong tangtun na ding in kitamkham in i Topa maipha mu le hang Mathew 6:33 a kigelh bangin ...and all these things will be given unto you. A theisiam ding in Topa'n hong ompih hen.



No comments: