Monday, January 5, 2015

Book review : Hong tung lai ding

Book review : Hong tung lai ding.
100pages, Rs.100/-, 2014.

Pu J K Cin in a bawl laibu ahi. Amah nidang pek in still camera tawh photography a matawng, Agape Photo Studio Lamka ah ana pankhia kia hilo in Film zong 14 ana bawl khia hi. Film minthang 'Na paal lo lah tang' cih zong ama bawl khiat ahi. Comedy film, Lung kham huai zong ana bawl hi. Ciamnuih zong gen siam in mi polh nuam mahmah khat ahi.
 
 Pasian nasepna a hih theih bang bang a sepna tawh kisai a gelh hi. A laibu sungah amah a ki gelh bang in: Kum 1975, April kha bul lam kigini nitak khat lawmte tawh vaakna a teep ding zatep lei zo, BYF kikhop simin min kikan(sam) zeel ahih manin, lawmte kiangah Biakin mai ah na ngak un OM(present) kava ci ding a kong paipah ding, ci in ka lut kei leh kei hun pat ni na hi in Thungetna ka neih leh ka mawhna hang a suang a denlup hunlai hi leh denlup ding ka hi, cih TOPA Kha Siangtho in hong phawk sak ahih manin kisiikin khitui naptui tawh lungdam thu puak tawh mawh maisakna ngen in hun patna ka zo hi...ka thuumna in 'Topa aw ka sunga om mawhnate tawh na gam hong luut theilo ding ka hih manin ka sung hong uk Satan hong nawh khiat sak inla na Kha Siangtho hong guan in' cih ahi.
 
 A laibu pen ama diary cih ding ahi mai. Sin ding leh theih ding tampi a om hi. Gospel sms tampi leh sermon hoih mahmah zong a kihel hi.
Nisim 17 March 1980 in Rev. En Za Sian, Rev. J M Paupu, Zam Za Cing leh Kam Khaw Dim tawh gup ngahlote a ding in thungetna ana pankhia uhi. 1974 kum in Lamka Mike Association phutkhia uh a, gospel tawh kisai a zat ahih ciang in a saap tawm sak in thu kigen te ana note khia thei ahihman in hampha kisa hi.
 
 Mouth organ tawh laa sa, Pangzawl Female voice tape record tawh ana khum kia hilo in Gospel Drama Team zong na pankhia hi. A cast manlo cih bang om ahihman in record na ding in 1989 kum in video camera leikhia in pang zawzen hi.

Agape Cable Network a kici 1995 in pankhia in nipini teng in Pasian thu mite gensak in tua hun laitak in channel dangte a off jel hi.
 
Mi phatuam ngai mahmah ahihman in a khua ua biakin (Pangzawl CBA church) keem ding in a zi tawh a kipia uhi.
Pasian thu theih a utna lian ahihman in Grace Bible College, Lamka apat in MTC, B+ grade in na zo hi.
 
Lamka leh Mizogam ah gospel pai in I minam te omna khua te ah ana pai suak hi.
A hun tawh kituak in technology ana zang phatuam hi. SMS zang in gospel message zong 2010 in ana pankhia hi.
 
Kei mahmah in zong hih a laibu sung pan in Christmas message/sermon pen hoihsa in kana sim hi.
A laphuah hoih kasak khat, tulai pawlpi paidan tawh kisai ka hong gelh ding:

Chorus
Na thei ta hiam lawm aw,
Nam sung leh Pawlpi sung;
Mo leh teek kaal na ngawn ah,
Bang teng in hong khen hiam;
Hong gen ning maw... Zomi aw. 

1. Nang kua mi koi khua pan a hong pai,
Kuate suanh na hia, meel hoih sii cia;
A meel a puam in hong suun khin veh aw,
Dot kuul se kei Zomi meel hi;
Ki-it ta ni... Zomi aw. 

2. Pawlpi sung ki-tuah theih loh nate,
Nang kua beh ko' behte hilo maw... ;
To Jesu'n pumh khat diing hong deih hi,
Pa' na seem teng beh khat pum khat di'n;
Hong deih hi e nungzuite. 

3. Mo leh teek ki-tuah theih loh nate,
To Jesu'n gah un a cih bang in;
Gap lo-in kithu tuaklo,
Jesu'n gen bang gah uh leh kituak pah ding. 
 

1 comment:

Biakmuancj said...

Simnuam mah2 e heutupa,,