Tuesday, October 13, 2015

Lamthakna

Lamthakna
Tulai I gam I nam a buai mahmah a, kuamah peuh a hong lawngkha hi. Hih tawh kizui in LST a Nehemiah laibu tungtawn in Lamthakna I gen ding.
Nehemiah laibu bung 13 a pha a, khenpi nih in a khen theih hi; Jerusalem kulhbang lamkikna leh Thupiakte gen kik na ahi. Bung 1-6 pen kulhbang lamkikna tawh kisai ahi a, bung 7-13 pen mipite kiangah thupiak gen kik na ahi.

Nehemiah laibu pen BC 445 lak pawl a thu tung hi ding in a ki ummoh hi. LST bu Ezra, Nehemiah pen Hebru Bible ah bu khat in gawmkhom ahi. A tangthu gen te a hun kizom ahi a, hih laibu thumte; Ezra, Nehemiah leh Esther pen Israel te tangthu, Jerusalem lamthakna tangthu ahi a, Nehemiah laibu pen ahileh a thumvei lamthakna a hi deuh hi.

A laibu sung a mi poimohte gen masa ni. Kumpi Artaxerxes kici hunlai ahi a Atexerxes I cih pen Kumpi pa min ahikei a title ahi ci in LST siamten a gen uhi. Artexeres min khiatna ahihleh ‘kumpi thupi’ cihna ahi. Tua bang mah in Ahasuerus zong sakmin hilo in title ahi a ‘hangsan pa’ cihna ahi.

Nehemiah ahihleh kumpi ahi het kei, Siampu zong a hikei. Zawlnei zong ahi tuan sam kei. Kumpi pa haitawi - cup bearer ahi a. Gam kumpi a dia sepna poimoh tak leen ahihman in tulai pau in gen le hang civil servant a cih theih ding. Gen sau le hang Nehemiah pen Kumpi hilo, siampu zong hisamlo, Zawlnei zong hilo in eimah bang in mi maimai khat ahi cih mangngilh kei ni. Mi maimai khat makaihna in Jerusalem kulhbang kilamkik ahi. Tua mah banging I gam I nam lamkikna dingin pang thei ciat hi hang cih phawk ni.
Jerusalem khulhbang lamthakna I gen sang in eimah mimal kilamthakna ding in I gen som ding. 
Lamthakna ding a poimohte:
Awlmohna: Nehemiah 1:4 en le hang a samgampa in Jerusalem kulhbang siatgawpna thu a gen ciang in Nehemiah a tusuk a a kap hi cih I mu hi. Hitak ah I muh theih pen I hinkhua kilamthakna ding in awlmohna poimoh masa ahi cih a cepteh tuak mahmah hi. Jerusalem khopi Israel te a ding in poimoh mahmah, Pasian khopi, pasian omna ahi. Eite zong I hihkhua poimoh mahmah ahihman in lamkik ding awlmohna lianpi I neih ding ahi. Awlmohna omlo in I lamkik thei kei ding.

Topa ah ki encian1:4 sim kik le hang bang kigelh a I cihleh ‘ka tusuk a ka kap hi. Ni bangzah hiam vantung Pasian mai ah anngawl in ka thuum hi’ cih I mu thei hiAn ngawl in Pasian mai ah thuum ahi. Lamthak na ding in I biak Pasian kiang ah tailut ding ahi. Kap zual ahi kei. Dingkhia pah a kipat pah ding cihna hilo hi. Hoihtak in bangtan hiam ngaihsun le hang I lampialna, bangtan a lampial I hia cihte I theician pan ding hi. Lamthak ding in a kipat ma in Nehemiah in zan khuamial nuai ah kulhbaang a siatdan a study hi. A siatdan hoihtak in a theician masa cihna ahi. A om dan,  a siatdan a theihcian ciangin Nehemiah in kipuankhiatna, ngaihdam nget in a zom hi. Eite zong I ki lamthak na ding in I hihkhelhna te puangkhia in ngaihdam I nget ding ahi. A thuumna ah hi bang in a gen hi  ‘…na sikhate thumna na bilin hungaih hen: ka honngen ahi, tuniin na sikha lohchingsak..’ (Nehemiah 1:11). A lohcinna ding in zong a ngen hi. 

Topa seemsak: Nehemiah in Topa seemsak hi. Amah mihing lel tak in a septheihloh te Pasian in seem thei ahi cih a thei hi. Tua bek tham lo in Kumpi pa kiang ah a paina ding leh sing leh suangte a poimoh bang a pe thei vaihawm te kiangah a ngetna lai a tawi hiA lai tawi in sepaih te leh sakol tungtuan siam tampi te zong a ngah lawh hi. LST I etleh Kumpi pa kiangah a tu numei a gen kha hi. Hih numei pen kua dang hilo in Esther hi ding in ki ummoh hi. Esther thu a kigelh louh hang in ana angvan na ciang om ngeingei ding in upmohhuai hi.

Lamthak ding in kiman: Kulhbaang lamthak ding in hong kipat sawm a mipite kiang ahi a tup a gen ciang in mipite zong ana kiman mahmah ua ana Amen pah uhi. Bung 3 na I etleh a mipi te pen lam thak ki  ding in lawpna, phurna nei uh cih I mu hi.
Lamthakna hong kipan in sun leh zan in hong lam charchar uhi. Gaal nei uh ahi cih I thei ding. Ana langpang leh heksia kua dang ahikei a Israel te langpang gige Ammonte, Amote leh Amelekte ahi uh. A makai deuh Sanbalat leh Horonite ahi uhi. 2:9-10.
Last haksa I pat ciangin mihing lam apan nanna in a zui hi. Eite zong I hinkhua I hihdik dek ciangin Satan zong kipan geih in haksatna leh nanna ci tuamtuam hongs awl geih ahi cih thei hi.

Geelna: Nehemiah pen a pilvang mahmah hi. Thazohtak in a lamthak theih na ding in hoihtak study masa cih I gen ta. Tua kia hilo in a mipite a dia koi ci in seem in, amau siamna tawh kisui in leh amau tenna mun tawh kinai cikcik ah mapang ding in a vaihawm hi. I pantheihdan bang takin I pan ding ahi. 
Haksakna leh kalhna kawmkal ah hong lam toto uhi. Khut khat ah teipi tawi, khut khut a seem in tha-it tak in hong seem ua, ni 52 lel in hong lamkik zo uhi. Haleluijah. Lamthakna a sep khit un latna a nei ua nuamsatak in a om uhi.

Hih a lamthak kulhbang a kongpi te apat zillai I la ding.
A masa pen in Belam kongpi. Hih kongpi pen kithawihna ding a lutna kongpi ahi. Eite zong I biakna I lamthak masak ngeingei ding ahi cih hong musak hi.
A banah Ngasa kongpi. Ngasa I gen ciangin I Topa Jesu in hong zui in Ngaman hilo in mihing man ding in ka hong bawl ding cih I thei ciat ding. Hih midang tawh kisaina ahihman in gospel theihpitu hih ding. Theihpihtu nasep I bawl dik thak ding cih thei ni.
Kongpi lui. A lui in a etsak ahihleh thudik ahi. Thudik a kilamdang ngei kei. I hinkhua ah diktatna I bawl thak ding ahi.
Ninpaihna kongpi. I hinkhua ah hoihlo te, I lungsim hoihlohna, ngaihtuah na hoihlo leh I ut a hoihlo nnate I paikhia hiam cih etthak ding ahi.
Valley Gate. Valley pen mum niam, mum mam ahi. A etsak ahihleh kiniamkhiatna hi. Ei le ei iki sang koih leh kiniam geih ahi. Siam kisa, hoih kisa, pil kisa cih bang hilo ding. Midang ten hong theih ding hizaw hi.

Tuikhuk kongpi. Hih pen I hinna ding a poimoh Khasiangtho etsakna ahi. I hinkhua ah Khasiangtho pawlhna poimoh gige, tui I poimoh bang in in hinkhua ah poimoh gige ahi cih thei ni. Tua bang mah in tui kongpi ahi. Dawn theih I hi na hia? 
Suahlam kongpi. Suahlam in lametna a gen ut hi. Topa ah lametna I neih gige ding ahi.
Sakol kongpi. LST in 'I dou te zaw sa leh sisan ahikei uh'  a ci hi. Kristian ihihna ah gaal dou ding in kisakkholhna I neih ding, I lamthak ding ahi. (Ephesians 6:12)
Muster Gate pen kisimna, kietcianna gen ahi. I hinkhua I etkik jel ding a poimohdan a hong theisak.

Hi bang a kulhbaang lamthak a hih khit in Ezra a kipan a thupiakte simkhiat non na a hong nei hi. Hi bang a thupiakte a zak kik uh ciangin mipite zong Topa thuzui ding in a ki piakhia kik uhi.

Hun nuam a hong zat ciang in Khawlni nasan in van hong zuak som in kongpi bulah ngak in mi a om uhi. Hih Nipina a hong tawkbuai theite a hawlkhia uhi. A temple room zong Levi mi hilo a luah khate zong hong hawlkhia uhi. A biakbuk uh siansuahna a nei uhi. Siansuahna thumal ciamteh ni. 
A buaina dang khat ahihleh zi leh pasal kineihna ahi. Namdang te tawh kiteeng tuah cih pen poi asa uhi. Ei zong I hinkhua pen teeltuam ihihman in I kiim I kiangte tawh kiteeng a i nitlouh ding ahi. Nehemiah 13:25.

Tampi I gen siam kei a hih Nehemiah laibu tungtawn in I hihkhua lamthak ciat le hang cih deihna in I gen theih hi teng bang ahi ding.

Thungetna nei ni:
Topa tuni in Na thute apat zillai hoihtak koute hihkhua lamthakna ding tawh kisai ka sin theih man un lungdam ung. Hih tungtawn in a za leh a thei kia hilo in ko mau hinkhua ciat nangma deih bang in lamthak a hih theih na ding in hong panpih in. Jesu Kris min in ka hong ngen hi. Amen.

1 comment:

Ayshwarya Singh said...

Wonderful blog post. I read almost all blogs on this website and really loved them. I bookmarked it. Thank you guys for your great work.Online Shopping Offer Amazon