Monday, January 25, 2016

Behmin gelh tawh kisai

Behmin gelh tawh kisai.
Hong kipilsak mahmah ding ka hi. Ka muhdan leh ngaihdan hong gelh ding ka hihman in a ute na heh in hong mudah un. Poi sa ke'ng.
Behmin gelh leh gelh loh ding hoihsa om hi hang. Kei muhna ah gelh teitei ding hi ci ing. Dik sa lo ten point by point in hong kalh un. Kei panna point te ahihleh-
1. Zomi te in minphuak kinei hi. Na min phuak pa/nu in ama min tawpna pen tawh nang min ding in hong piak khop ahi. English te gen bang in Given name ahk First name pen na min hong piak teng hi pah hi. Kei Given name ahihleh Kamzalian hi pah lel hi.
2. International system of naming zui ding hi a, zuih zong kul ta hi. Hih system ah Given name leh Last name/Surname gelh kul hi. Kei min gelh ding hileng Kamzalian Tomging hipah hi.
3. Gam khangto zaw a sangkah te na dongh sin ua, min koi ci gelh ding hiam,  I min malte a beubeu a gelh ding mah hiam?
4. Mundang ah pai le cin behmin hong ki dong in gelh pah kul hi. Kei min mal tawpna Lian pen ka behmin hi hetlo hi. Ka behmin mah ka gelh ding hi lel hi.
5. Min tawpna Kim, Thang, Mung, Mang cihte a nei om hi hang. Amau behmin gelh lo in hih a min mal tawpna pen a Surname bang in gelh mawk le uh Kim I cih Japanese leh Korean zong na om uhi. Tua bang mah in Mung zong Zomi ahihlam ki thei lo ding hi. Zomi it in a ki Zomi sak mahmah hang in a ta leh tu ten Kim hi in Mung cihte a behmin ding in zang le uh a hihna uh ki thei nonlo ding hi.
6. India Zomi te beh pai lua beh thupi sak lua ci kha niteh,  ngaihsun kik le cin Myanmar a Zomi ten zong a khua uh thupi sak mahmah hi. A min banah ah khua min gen/gelh uhi. Khua I cih pen behte teen khopna ahihman in beh pai mah hi lel uhi.
7. Thangboi, Thangno, Vungkok,  Cingta, nuSeen,  Vungseen leh adg dg in gelh hetloh ding hi. I min hikei in I ki nou tawi na min hi lel hi. Hih te sakmin ci in a malmal in gelh ni. I behmin pen Boi, No, Kok, Ta, Seen adg dg hong ki cih sak leh diklo a hihna cian mahmah ni. Min pi leh minneu I theih siam na ding in kei ka hong ki introduce ding. My name is Kamzalian but you can call me Kamno.
8. I sakmin I sapna min I khentel theih na ding in midang te kiangah I ki introduce ciang in 'My name is Kamzalian but you can call me Kamno' cih in gencian in thei ing.
9. Behmin gelh ding deih lo te pen lai lamah pilna tawm nei te hi. Muhna sau leh zai zolo uhi. Behmin gelh ding deihlo na hihleh na lai pilna bang tan ahia na lunggeel sin aw.
10. Behmin thupi sak lo ding I hihleh I passport hi in application form te ah Surname/Lastname ah bang gelh ding I hia? Surname neilo mihing omlo ahihman in a dik mah I gelh ding hilo hiam?!
11. I beh pai manin Zomi movement zawngkhal lawh ngei ahi hiam? I beh min in ki-it in kingaihnatna tawh pangkhom zaw hang e.
12. Beh min gelh dan leh I theih dan kibatloh man in kitawng ngei khang. Amau zong I behte hi kici zaw in mu ing.
13. Khua khat ah Thangpi, Thanglian, Chinlun sakmin nei tam ken teh. Khua bangzah hiam gen kha hile cin hibang min nei na tam ding hi. A pa, beh, khua gen beh kul hi. Piak min kia tawh hi theilo ahihdan thei siam ding hi teh. Behmin gelh hong kul cihna hilo hiam?
14. Na etna lian sak zaw lai le cin Nemlun Tonsing mi bangzah hiam om kha ding hi. Kua tanu gen na hi hiam ci pah ding na hih manin a pa min tawh gelh le hang ki cian sitset pah hi. Hi tak ah Middle name poimohna mu ding hi teh. Nemlun Tonsing gen pen Lianthang tanu ahihman in Nemlun Lianthang Tonsing ci in gelh le hang ki cian pah hilo hia maw. A mal mal a gelh ding ci le cin hih min pen mal bangzah pha. Bang ci gelh mawk ding!
15. Piak min pen English in Given name kici in I first name hi. A vek a kigawm in I first given name hi na pi bang ding a gelhkhom lo ding!?
16. I inkuan sungah 'boineu' hi kha ni. I khua sungah boineu sangin Thangpi hi kha ni. I huam sungah Lianminthang hikha ni. I gam sungah Lianminthang Tangpua cih bang in hong ki thei zaw ding hi.
17. LST ah kei leh ka inkuan te bang hi uh ka hiam na ci hi. Mun tuam tuam ah zong inkuan na gen. Suan leh paak zong na gen in na kikan mahmah hi. Hih hong suang I pupi pen I behmin hi lel lo hiam? Pasian pen minam ah a lunglut zah in mimal leh inkuan ah lunglut hi. Inkuan pen beh hilel lo hiam?
18. English leh namdang ten na minmal tawpna pen family name hong cih sak ding. Na tate zong nang min tawpna hong koih sak ding. Family name,  behmin suak ding ahih hang behmin hi hetlo!
19. Na minmal tawpna pen midang ten family name hong cih sak ding hi. A hihloh dan bangzah vei gen ding. A genna ding hun zong hong ki pia lo pi. A dik te pen gen kul lo. A diklo te pen saupi gen kul hizaw lo hiam?
20. I mipil misiam masate in na gelh kei ci kha ni teh. Amau na gelh khalo mah uhi. A minmal tawpna pen family name suak mawk ahih ciang in deihlo, diklo sa un te. Mawk khek ziauziau theih hikei ven ci in cillum tawh valh mai unte.
21. Behmin I zat kei leh Lastname/ Surname/ Family name ki cihna ah gelh hetlo ding, a neilo bang a om ding ci na hi ve maw! Estsakna ding in Facebook account nei a behmin gelhna ding mun ah gelh lo in a diklo leh paizia kician hetlo tawh ut peuh va gelh.
22. First name I ci hiam given name a kici a khiatna theilo hilo na pi in I zo min mal nih/thum/li hong kipia/Given name  teng gelh khop na ding mun ah phelkham sese hi hang. Tua bek hilo phelkhap pen a minmal tawpna pen behmin gelhna ding mun ah gelh phei lai son son hi hang.
23. Behmin gelh I ngeina hilo cih mok pen koiah min gelh dan ngeina nei I hia? Mihing I tawm lai in a mimal theih baih lel in historian leh Missionary hong lut ten poimoh sa lo uh hikha ding hi. Amau gelh bang in a malmal a hong gelh sak u leh en ahi ding mah sa kha I hi diam ci ing. I tam deuh deuh ciang in behmin gelh poimoh ta. Khang khat sung leh khua khat sung mahmah ah min ki bang nei tam ta I hih ciang a gam khangto te hihdan in behmin gelh kul hi veh aw.
24. I behmin te uh zong a tam zaw i pupi te uh sakmin hi. Behmin kammal te ki gelhkhom veh aw maw. Tua bang mah in I phuak min te uh bang hang in gelhkhom lo ding?

I tuahkhak, muhdan leh ngaihsutna ki bang lo cih tawh hunsak lel ni.

No comments: